ਚੰਡੀਗੜ੍ਹ : ਮੁਅੱਤਲ ਪੰਜਾਬ ਪੁਲਸ ਡੀ. ਆਈ. ਜੀ. ਹਰਚਰਨ ਸਿੰਘ ਭੁੱਲਰ ਰਿਸ਼ਵਤ ਮਾਮਲੇ 'ਚ ਸੀ. ਬੀ. ਆਈ. ਦੀ ਵਿਸ਼ੇਸ਼ ਅਦਾਲਤ 'ਚ ਪੇਸ਼ ਕੀਤੀ ਗਈ ਪੂਰਕ ਅੰਤਿਮ ਆਦੇਸ਼ ਰਿਪੋਰਟ 'ਚ ਕਿਹਾ ਗਿਆ ਹੈ ਕਿ ਜਾਂਚ ਦੌਰਾਨ ਨਾਭਾ 'ਚ ਵਿਚੋਲੇ ਕ੍ਰਿਸ਼ਨੂ ਦੇ ਘਰ ਦੀ ਤਲਾਸ਼ੀ ਲਈ ਸੀ। 16 ਅਕਤੂਬਰ ਦੀ ਖੋਜ ਸੂਚੀ ਦੇ ਅਨੁਸਾਰ ਅਪਰਾਧਕ ਸਮੱਗਰੀ ਵਾਲੀ ਡਾਇਰੀ ਜ਼ਬਤ ਕੀਤੀ ਗਈ ਸੀ। ਇਸ ਲਈ ਵਾਧੂ ਸ਼ੱਕੀ ਲੈਣ-ਦੇਣ ਦੀ ਜਾਂਚ ਕਰਨ ਅਤੇ ਸ਼ਾਮਲ ਹੋਰ ਵਿਅਕਤੀਆਂ ਦੀ ਭੂਮਿਕਾ ਦਾ ਪਤਾ ਲਗਾਉਣ ਲਈ ਮੌਜੂਦਾ ਮਾਮਲੇ ਵਿਚ ਬੀ.ਐੱਨ. ਐੱਨ. ਐੱਸ. ਦੀ ਧਾਰਾ 193 (9) ਦੇ ਤਹਿਤ ਜਾਂਚ ਸ਼ੁਰੂ ਕੀਤੀ ਗਈ ਹੈ। ਰਿਪੋਰਟ ਵਿਚ ਜਾਂਚ ਏਜੰਸੀ ਨੇ ਕਿਹਾ ਕਿ ਅਪਰਾਧਾਂ ਨਾਲ ਸਿੱਧੇ ਤੌਰ ’ਤੇ ਸਬੰਧਤ ਕੋਈ ਨਵੀਂ ਵਾਧੂ ਅਪਰਾਧਕ ਸਮੱਗਰੀ ਰਿਕਾਰਡ ’ਤੇ ਨਹੀਂ ਆਈ ਹੈ। ਰਿਸ਼ਵਤ ਦੀ ਮੰਗ, ਸਵੀਕ੍ਰਿਤੀ ਜਾਂ ਜ਼ਬਰੀ ਵਸੂਲੀ ਵਿਚ ਕਿਸੇ ਹੋਰ ਜਨਤਕ ਜਾਂ ਨਿੱਜੀ ਵਿਅਕਤੀ ਦੀ ਸ਼ਮੂਲੀਅਤ ਦਾ ਕੋਈ ਸਬੂਤ ਨਹੀਂ ਮਿਲਿਆ ਹੈ।
ਅਦਾਲਤ ਦੇ ਸਾਹਮਣੇ ਪੇਸ਼ ਕੀਤਾ ਗਿਆ ਮੁਕੱਦਮਾ ਦੋ ਮੁੱਖ ਮੁਲਜ਼ਮਾਂ, ਐੱਚ.ਐੱਸ. ਭੁੱਲਰ ਅਤੇ ਕ੍ਰਿਸ਼ਨੂ ਸ਼ਾਰਦਾ ਦੀ ਭੂਮਿਕਾ ਤੱਕ ਸੀਮਤ ਹੈ। ਇਸ ਦੌਰਾਨ ਵਿਚੋਲੇ ਕ੍ਰਿਸ਼ਨੂ ਸ਼ਾਰਦਾ ਦੇ ਘਰੋਂ ਬਰਾਮਦ ਹੋਈ ਡਾਇਰੀ ਦਾ ਰਹੱਸ ਖੁੱਲ੍ਹ ਗਿਆ ਹੈ। ਸੀ. ਬੀ. ਆਈ. ਜਾਂਚ ਦੌਰਾਨ ਬਰਾਮਦ ਹੋਈ ਡਾਇਰੀ ਅਤੇ ਮੋਬਾਇਲ ਫੋਨ ਡੇਟਾ ਦੇ ਵਿਸ਼ਲੇਸ਼ਣ ਤੋਂ ਅਜਿਹੀਆਂ ਚੈਟਾਂ ਦਾ ਖ਼ੁਲਾਸਾ ਹੋਇਆ ਹੈ, ਜਿਨ੍ਹਾਂ ਨੇ ਹੋਰ ਸਰਕਾਰੀ ਸੇਵਕਾਂ ਅਤੇ ਵਿਅਕਤੀਆਂ ਨਾਲ ਕਥਿਤ ਗੈਰ-ਕਾਨੂੰਨੀ ਲੈਣ-ਦੇਣ ਦਾ ਸ਼ੱਕ ਪੈਦਾ ਕੀਤਾ।
ਇਸ ਤੋਂ ਬਾਅਦ ਸੀ. ਬੀ. ਆਈ. ਨੇ ਸਾਰਾ ਮੋਬਾਇਲ ਫੋਨ ਡਾਟਾ ਸੁਤੰਤਰ ਗਵਾਹ ਦੀ ਮੌਜੂਦਗੀ ਵਿਚ ਟੀ. ਏ. ਐੱਫ. ਐੱਸ. ਯੂ. ਤੋਂ ਕੱਢਵਾਇਆ। ਮੌਖਿਕ, ਦਸਤਾਵੇਜ਼ੀ ਅਤੇ ਇਲੈਕਟ੍ਰਾਨਿਕ ਸਬੂਤਾਂ ਅਤੇ ਡਾਇਰੀ ਸਮੇਤ ਸਾਰੀ ਸਮੱਗਰੀ ਦੀ ਪੂਰੀ ਜਾਂਚ ਕੀਤੀ ਗਈ, ਇਹ ਨਿਰਧਾਰਤ ਕਰਨ ਲਈ ਕਿ ਕੀ ਕੋਈ ਹੋਰ ਸਰਕਾਰੀ ਸੇਵਕ ਜਾਂ ਵਿਅਕਤੀ ਇਸ ਮਾਮਲੇ ਵਿਚ ਸ਼ਾਮਲ ਸਨ ਜਾਂ ਨਹੀਂ। ਵਿਸਤ੍ਰਿਤ ਵਿਸ਼ਲੇਸ਼ਣ ਤੋਂ ਬਾਅਦ ਜਾਂਚ ਏਜੰਸੀ ਨੇ ਸਪੱਸ਼ਟ ਕੀਤਾ ਕਿ ਮੌਜੂਦਾ ਮਾਮਲੇ ਨਾਲ ਸਿੱਧੇ ਤੌਰ ’ਤੇ ਸਬੰਧਿਤ ਕੋਈ ਨਵਾਂ ਜਾਂ ਵਾਧੂ ਅਪਰਾਧਕ ਸਬੂਤ ਨਹੀਂ ਮਿਲਿਆ ਹੈ। ਹਾਲਾਂਕਿ ਮਾਮਲੇ ਦੀ ਜਾਂਚ ਜਾਰੀ ਹੈ ਅਤੇ ਜੇਕਰ ਲੋੜ ਪਈ ਤਾਂ ਪੁੱਛਗਿੱਛ ਕੀਤੀ ਜਾ ਸਕਦੀ ਹੈ।