ਜਲੰਧਰ : ਪੰਜਾਬ 'ਚ ਸੜਕਾਂ 'ਤੇ ਲੁੱਟ-ਖੋਹ ਕਰਨ ਦਾ ਬੇਹੱਦ ਖ਼ਤਰਨਾਕ ਤਰੀਕਾ ਸਾਹਮਣੇ ਆਇਆ ਹੈ। ਇਸ ਸਕੈਮ 'ਚ ਲੁਟੇਰੇ ਸੁੰਨਸਾਨ ਸੜਕਾਂ 'ਤੇ ਪਰਸ ਸੁੱਟ ਕੇ ਰਾਹਗੀਰਾਂ, ਖ਼ਾਸ ਕਰਕੇ ਐਕਟਿਵਾ ਸਵਾਰ ਔਰਤਾਂ ਨੂੰ ਆਪਣਾ ਨਿਸ਼ਾਨਾ ਬਣਾ ਰਹੇ ਹਨ। ਇਸ ਨੂੰ ਲੈ ਕੇ ਜਲੰਧਰ ਪੁਲਸ ਵੱਲੋਂ ਹਦਾਇਤਾਂ ਜਾਰੀ ਕਰਦੇ ਹੋਏ ਲੋਕਾਂ ਨੂੰ ਸਕੈਮ ਤੋਂ ਬਚਣ ਲਈ ਸਾਵਧਾਨੀ ਵਰਤਣ ਲਈ ਕਿਹਾ ਹੈ।
ਕਿਵੇਂ ਕੰਮ ਕਰਦਾ ਹੈ ਇਹ 'ਕੈਮੀਕਲ ਪਰਸ ਸਕੈਮ'
ਜਾਣਕਾਰੀ ਦਿੰਦੇ ਹੋਏ ਇੰਸਪੈਕਟਰ ਹਰਦੀਪ ਸਿੰਘ ਨੇ ਕਿਹਾ ਕਿ ਜਦੋਂ ਕੋਈ ਵਿਅਕਤੀ ਕਿਸੇ ਅਜਿਹੀ ਸੜਕ ਤੋਂ ਲੰਘ ਰਿਹਾ ਹੁੰਦਾ ਹੈ, ਜਿੱਥੇ ਆਲੇ-ਦੁਆਲੇ ਝੋਨੇ ਦੇ ਖੇਤ ਜਾਂ ਸੁੰਨਸਾਨ ਜਗ੍ਹਾ ਹੋਵੇ ਤਾਂ ਸਕੈਮਰ ਉੱਥੇ ਸੜਕ 'ਤੇ ਇਕ ਪਰਸ ਸੁੱਟ ਦਿੰਦੇ ਹਨ। ਰਾਹਗੀਰ ਅਕਸਰ ਪਰਸ ਨੂੰ ਚੁੱਕ ਕੇ ਉਸ ਨੂੰ ਖੋਲ੍ਹ ਲੈਂਦੇ ਹਨ। ਉਹ ਪਰਸ ਦੇ ਮਾਲਕ ਦਾ ਪਤਾ ਲਗਾਉਣ ਲਈ ਉਸ ਵਿੱਚੋਂ ਕੋਈ ਦਸਤਾਵੇਜ਼ (ਜਿਵੇਂ ਕਿ ਆਧਾਰ ਕਾਰਡ ਜਾਂ ਕੋਈ ਐਡਰੈੱਸ ਪਰੂਫ਼) ਜਾਂ ਪਰਸ 'ਚ ਮੌਜੂਦ ਪੈਸੇ ਵੇਖਣ ਲੱਗ ਪੈਂਦੇ ਹਨ। ਇਨ੍ਹਾਂ ਪਰਸਾਂ 'ਤੇ ਕੈਮੀਕਲ ਲੱਗਾ ਹੁੰਦਾ ਹੈ।
ਖ਼ਤਰਨਾਕ ਕੈਮੀਕਲ ਦਾ ਅਸਰ
ਸਕੈਮਰਾਂ ਨੇ ਪਰਸ ਦੇ ਅੰਦਰਲੇ ਪੈਸਿਆਂ (ਨੋਟਾਂ) 'ਤੇ ਇਕ ਖ਼ਾਸ ਕੈਮੀਕਲ ਲਗਾਇਆ ਹੁੰਦਾ ਹੈ। ਜਦੋਂ ਕੋਈ ਵਿਅਕਤੀ ਉਨ੍ਹਾਂ ਪੈਸਿਆਂ ਨੂੰ ਹੱਥ ਲਗਾਉਂਦਾ ਹੈ ਤਾਂ ਉਸ ਦੀਆਂ ਉਂਗਲਾਂ ਚਿਪਚਿਪੀਆਂ ਹੋਣ ਲੱਗਦੀਆਂ ਹਨ। ਇਸ ਦੇ ਬਾਅਦ ਆਮ ਤੌਰ 'ਤੇ ਉਂਗਲਾਂ ਚਿਪਚਿਪੀਆਂ ਹੋਣ 'ਤੇ ਲੋਕ ਤੁਰੰਤ ਉਸ ਚੀਜ਼ ਨੂੰ ਸੁੰਘਣ ਦੀ ਗਲਤੀ ਕਰਦੇ ਹਨ। ਜਿਵੇਂ ਹੀ ਕੋਈ ਇਸ ਕੈਮੀਕਲ ਨੂੰ ਸੁੰਘਦਾ ਹੈ ਤਾਂ ਉਹ ਉੱਥੇ ਹੀ ਬੇਹੋਸ਼ ਹੋ ਜਾਂਦਾ ਹੈ। ਬੇਹੋਸ਼ ਹੋਣ ਤੋਂ ਬਾਅਦ ਹੁੰਦੀ ਹੈ ਲੁੱਟਖੋਹ ਕਰਨ ਵਾਲੇ ਪੀੜਤ ਵਿਅਕਤੀ ਦੇ ਬੇਹੋਸ਼ ਹੁੰਦੇ ਹੀ ਸਕੈਮਰ ਉਸ ਦਾ ਮੋਬਾਇਲ ਫ਼ੋਨ, ਪੈਸੇ ਅਤੇ ਹੋਰ ਕੀਮਤੀ ਸਾਮਾਨ ਲੈ ਕੇ ਫ਼ਰਾਰ ਹੋ ਜਾਂਦੇ ਹਨ ਅਤੇ ਪੀੜਤ ਨੂੰ ਉੱਥੇ ਹੀ ਸੜਕ 'ਤੇ ਬੇਹੋਸ਼ੀ ਦੀ ਹਾਲਤ ਵਿੱਚ ਛੱਡ ਦਿੰਦੇ ਹਨ।
ਬਚਾਅ ਲਈ ਅਹਿਮ ਦਿਸ਼ਾ-ਨਿਰਦੇਸ਼
ਜਲੰਧਰ ਪੁਲਸ ਨੇ ਇਸ ਦੇ ਬਚਾਅ ਲਈ ਅਹਿਮ ਦਿਸ਼ਾ-ਨਿਰਦੇਸ਼ ਜਾਰੀ ਕੀਤੇ ਹਨ। ਪੁਲਸ ਦਾ ਕਹਿਣਾ ਹੈ ਕਿ ਜੇਕਰ ਸੜਕ 'ਤੇ ਕੋਈ ਵੀ ਪਰਸ ਜਾਂ ਅਜਿਹੀ ਚੀਜ਼ ਪਈ ਵਿਖਾਈ ਦੇਵੇ ਤਾਂ ਉਸ ਨੂੰ ਬਿਲਕੁਲ ਨਾ ਚੁੱਕੋ ਅਤੇ ਨਜ਼ਰਅੰਦਾਜ਼ ਕਰੋ। ਅਜਿਹੀ ਕੋਈ ਵੀ ਸ਼ੱਕੀ ਚੀਜ਼ ਮਿਲਣ 'ਤੇ ਤੁਰੰਤ ਪੁਲਸ ਨੂੰ ਸੂਚਨਾ ਦਿਓ। ਜਲੰਧਰ ਪੁਲਸ ਜਨਤਾ ਦੀ ਸਹਾਇਤਾ ਲਈ ਹਮੇਸ਼ਾ ਤਿਆਰ ਹੈ।