ਸੁਨਾਮ ਊਧਮ ਸਿੰਘ ਵਾਲਾ (ਰਮੇਸ਼ ਗਰਗ) : ਪੰਜਾਬ ਨੈਸ਼ਨਲ ਬੈਂਕ, ਸੁਨਾਮ ਮੇਨ ਬਰਾਂਚ ਜਾਖਲ ਰੋਡ ਵਿੱਚ ਕਾਰਜਰਤ ਹੈਡ ਪਿਓਨ ਛੱਜੂ ਰਾਮ ਅੱਜ ਆਪਣੀਆਂ ਸੇਵਾਵਾਂ ਤੋਂ ਸੇਵਾਨਿਵ੍ਰਿਤ ਹੋ ਗਏ। ਇਸ ਮੌਕੇ ਬੈਂਕ ਸਟਾਫ ਵੱਲੋਂ ਇੱਕ ਸਾਦਾ ਅਤੇ ਗੌਰਵਮਈ ਵਿਦਾਈ ਸਮਾਰੋਹ ਆਯੋਜਿਤ ਕੀਤਾ ਗਿਆ, ਜਿਸ ਵਿੱਚ ਬੈਂਕ ਮੈਨੇਜਰ ਜਸ਼ਨਵੀਰ ਸਿੰਘ ਅਤੇ ਸੰਗਰੂਰ ਜ਼ਿਲ੍ਹਾ ਬੈਂਕ ਸਟਾਫ ਯੂਨੀਅਨ ਦੇ ਆਗੂ ਰੋਬਿਨ ਗਰਗ ਨੇ ਸਮੂਹ ਸਟਾਫ ਨਾਲ ਮਿਲ ਕੇ ਉਨ੍ਹਾਂ ਨੂੰ ਸਨਮਾਨਪੂਰਵਕ ਵਿਦਾਈ ਦਿੱਤੀ। ਸਮਾਰੋਹ ਦੌਰਾਨ ਮੈਨੇਜਰ ਜਸ਼ਨਵੀਰ ਸਿੰਘ ਨੇ ਕਿਹਾ ਕਿ ਛੱਜੂ ਰਾਮ ਨੇ ਆਪਣੇ ਪੂਰੇ ਸੇਵਾ ਕਾਲ ਦੌਰਾਨ ਬੈਂਕ ਪ੍ਰਤੀ ਨਿਸ਼ਠਾ, ਇਮਾਨਦਾਰੀ ਅਤੇ ਜ਼ਿੰਮੇਵਾਰੀ ਨਾਲ ਆਪਣਾ ਫਰਜ਼ ਨਿਭਾਇਆ। ਉਨ੍ਹਾਂ ਕਿਹਾ ਕਿ ਛੱਜੂ ਰਾਮ ਵਰਗੇ ਸਮਰਪਿਤ ਕਰਮਚਾਰੀ ਕਿਸੇ ਵੀ ਸੰਸਥਾ ਦੀ ਰੀੜ੍ਹ ਦੀ ਹੱਡੀ ਹੁੰਦੇ ਹਨ ਅਤੇ ਉਨ੍ਹਾਂ ਦੀਆਂ ਸੇਵਾਵਾਂ ਸਦਾ ਯਾਦ ਰੱਖੀਆਂ ਜਾਂਦੀਆਂ ਹਨ।
ਇਸ ਮੌਕੇ ਸਟਾਫ ਮੈਂਬਰਾਂ ਨੇ ਛੱਜੂ ਰਾਮ ਨਾਲ ਬਿਤਾਏ ਸੁਹਾਵਨੇ ਪਲਾਂ ਨੂੰ ਸਾਂਝਾ ਕੀਤਾ ਅਤੇ ਉਨ੍ਹਾਂ ਦੇ ਚਮਕਦਾਰ ਭਵਿੱਖ ਤੇ ਸਿਹਤਮੰਦ ਜੀਵਨ ਦੀ ਕਾਮਨਾ ਕੀਤੀ। ਸਮਾਰੋਹ ਦੇ ਅੰਤ ਵਿੱਚ ਛੱਜੂ ਰਾਮ ਨੂੰ ਯਾਦਗਾਰੀ ਨਿਸ਼ਾਨ ਅਤੇ ਵੱਖ-ਵੱਖ ਤੋਹਫੇ ਭੇਂਟ ਕਰਕੇ ਸ਼ੁਭਕਾਮਨਾਵਾਂ ਨਾਲ ਵਿਦਾ ਕੀਤਾ ਗਿਆ। ਛੱਜੂ ਰਾਮ ਨੇ ਵੀ ਸਾਰੇ ਅਧਿਕਾਰੀਆਂ ਅਤੇ ਕਰਮਚਾਰੀਆਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਬੈਂਕ ਪਰਿਵਾਰ ਨਾਲ ਬਿਤਾਇਆ ਸਮਾਂ ਅਤੇ ਕੀਤਾ ਕੰਮ ਉਹ ਸਾਰੀ ਉਮਰ ਨਹੀਂ ਭੁੱਲਣਗੇ। ਇਸ ਮੌਕੇ ਸਪੈਸ਼ਲ ਅਸਿਸਟੈਂਟ ਰੋਬਿਨ ਗਰਗ, ਮੈਨੇਜਰ ਮਨੋਜ ਕੁਮਾਰ, ਮੈਨੇਜਰ ਜਸ਼ਨਵੀਰ ਸਿੰਘ, ਨਵੀਨ ਕੁਮਾਰ (ਹੈੱਡ ਕੈਸ਼ੀਅਰ), ਗੁਰਮੀਤ ਸਿੰਘ, ਜੋਤੀ ਰਾਣੀ, ਸ਼ੰਮੀ ਬੰਸਲ ਅਤੇ ਗਾਰਡ ਭੋਲਾ ਸਿੰਘ ਸਮੇਤ ਸਮੂਹ ਸਟਾਫ ਮੈਂਬਰ ਹਾਜ਼ਰ ਰਹੇ।