ਮੁੰਬਈ : ਬਾਲੀਵੁੱਡ ਦੀ ਮਸ਼ਹੂਰ ਅਦਾਕਾਰਾ ਰਾਣੀ ਮੁਖਰਜੀ ਨੇ ਆਪਣੀ ਫ਼ਿਲਮ 'ਮਰਦਾਨੀ 3' ਦੀ ਸ਼ਾਨਦਾਰ ਸਫ਼ਲਤਾ 'ਤੇ ਖੁਸ਼ੀ ਜ਼ਾਹਰ ਕਰਦਿਆਂ ਇਸ ਨੂੰ ਆਪਣੇ ਲਈ ਇੱਕ ਬੇਹੱਦ ਭਾਵੁਕ ਸਫ਼ਰ ਦੱਸਿਆ ਹੈ। ਯਸ਼ ਰਾਜ ਫਿਲਮਜ਼ ਦੁਆਰਾ ਨਿਰਮਿਤ "ਮਰਦਾਨੀ 3" ਵਿੱਚ ਰਾਣੀ ਮੁਖਰਜੀ ਮੁੱਖ ਭੂਮਿਕਾ ਵਿੱਚ ਹਨ। ਫ਼ਿਲਮ ਸਿਨੇਮਾਘਰਾਂ ਵਿੱਚ ਮਜ਼ਬੂਤ ਪ੍ਰਦਰਸ਼ਨ ਕਰਨ ਤੋਂ ਬਾਅਦ ਨੈੱਟਫਲਿਕਸ 'ਤੇ ਲਗਾਤਾਰ 30 ਦਿਨਾਂ ਤੱਕ ਟ੍ਰੈਂਡ ਕਰਦੀ ਰਹੀ ਹੈ, ਜੋ ਕਿ ਇਸ ਚਰਚਿਤ ਫਰੈਂਚਾਇਜ਼ੀ ਲਈ ਇੱਕ ਵੱਡੀ ਉਪਲਬਧੀ ਹੈ। ਇਸ ਦੇ ਨਾਲ ਹੀ 'ਮਰਦਾਨੀ' ਦੇਸ਼ ਦੀ ਇਕੋ-ਇਕ ਅਜਿਹੀ ਸਫ਼ਲ ਮਹਿਲਾ-ਪ੍ਰਧਾਨ ਫ਼ਿਲਮ ਫਰੈਂਚਾਇਜ਼ੀ ਹੈ ਜਿਸ ਨੇ ਦੁਨੀਆ ਭਰ ਦੇ ਦਰਸ਼ਕਾਂ ਨਾਲ ਡੂੰਘਾ ਸਬੰਧ ਬਣਾਇਆ ਹੈ।
ਰਾਣੀ ਮੁਖਰਜੀ ਨੇ ਕਿਹਾ, 'ਮਰਦਾਨੀ 3 ਦਾ ਸਫ਼ਰ ਮੇਰੇ ਲਈ ਬਹੁਤ ਭਾਵੁਕ ਰਿਹਾ ਹੈ, ਕਿਉਂਕਿ ਇਹ ਹਰ ਜਗ੍ਹਾ ਦਰਸ਼ਕਾਂ ਨਾਲ ਜੁੜੀ ਰਹੀ ਹੈ। ਪਹਿਲਾਂ ਸਿਨੇਮਾਘਰਾਂ ਵਿੱਚ ਅਤੇ ਹੁਣ ਦੁਨੀਆ ਭਰ ਵਿੱਚ ਨੈੱਟਫਲਿਕਸ 'ਤੇ। ਇੱਕ ਮਹਿਲਾ-ਪ੍ਰਧਾਨ ਐਕਸ਼ਨ ਫ਼ਿਲਮ ਦਾ ਸਟ੍ਰੀਮਿੰਗ ਪਲੇਟਫਾਰਮ 'ਤੇ ਇੰਨੇ ਲੰਬੇ ਸਮੇਂ ਤੱਕ ਟੌਪ 'ਤੇ ਰਹਿਣਾ ਇਹ ਸਾਬਤ ਕਰਦਾ ਹੈ ਕਿ ਦਰਸ਼ਕ ਹੁਣ ਤਾਕਤਵਰ ਔਰਤਾਂ ਅਤੇ ਸੱਚਾਈ 'ਤੇ ਆਧਾਰਿਤ ਕਹਾਣੀਆਂ ਨੂੰ ਪਸੰਦ ਕਰ ਰਹੇ ਹਨ।
ਅਦਾਕਾਰਾ ਨੇ ਅੱਗੇ ਕਿਹਾ ਕਿ ਇਹ ਸਫ਼ਲਤਾ ਸਮਾਜਿਕ ਬਦਲਾਅ ਨੂੰ ਦਰਸਾਉਂਦੀ ਹੈ। ਲੋਕ ਹੁਣ ਅਜਿਹਾ ਕੰਟੈਂਟ ਚਾਹੁੰਦੇ ਹਨ ਜਿਸ ਵਿੱਚ ਸਾਹਸ, ਨਿਆਂ ਅਤੇ ਅਸਲ ਮੁੱਦਿਆਂ ਦੀ ਗੱਲ ਕੀਤੀ ਗਈ ਹੋਵੇ। ਇਸ ਤਰ੍ਹਾਂ ਦੀ ਸਫਲਤਾ ਮੇਰੇ ਲਈ ਬਹੁਤ ਮਾਇਨੇ ਰੱਖਦੀ ਹੈ। ਅਭਿਰਾਜ ਮੀਨਾਵਾਲਾ ਦੁਆਰਾ ਨਿਰਦੇਸ਼ਿਤ ਅਤੇ ਆਦਿਤਿਆ ਚੋਪੜਾ ਦੁਆਰਾ ਨਿਰਮਿਤ 'ਮਰਦਾਨੀ 3' ਆਪਣੀ ਸਮਾਜਿਕ ਤੌਰ 'ਤੇ ਪ੍ਰਸੰਗਿਕ ਕਹਾਣੀ ਦੀ ਵਿਰਾਸਤ ਨੂੰ ਸਫ਼ਲਤਾਪੂਰਵਕ ਅੱਗੇ ਵਧਾ ਰਹੀ ਹੈ। ਰਾਣੀ ਮੁਖਰਜੀ ਦਾ ਮੰਨਣਾ ਹੈ ਕਿ ਇਮਾਨਦਾਰੀ ਅਤੇ ਮਜ਼ਬੂਤ ਨੈਤਿਕ ਆਵਾਜ਼ ਵਾਲੀਆਂ ਕਹਾਣੀਆਂ ਦੁਨੀਆ ਭਰ ਦੇ ਲੱਖਾਂ ਦਿਲਾਂ ਵਿੱਚ ਆਪਣੀ ਜਗ੍ਹਾ ਬਣਾਉਣ ਦੀ ਤਾਕਤ ਰੱਖਦੀਆਂ ਹਨ।