ਧੁਰੰਦਰ' ਦੀ ਸਫਲਤਾ ਪਿੱਛੇ ਰਣਵੀਰ ਸਿੰਘ ਦੀ ਸਖ਼ਤ ਮਿਹਨਤ, ਮੇਕਅਪ ਆਰਟਿਸਟ ਨੇ ਖੋਲ੍ਹੇ ਕਈ ਅਹਿਮ ਰਾਜ਼

ਮੁੰਬਈ : ਮੇਕਅਪ ਅਤੇ ਪ੍ਰੋਸਥੈਟਿਕ ਆਰਟਿਸਟ ਕਰਨਦੀਪ ਸਿੰਘ ਨੇ ਫਿਲਮ 'ਧੁਰੰਦਰ: ਦਿ ਰੀਵੈਂਜ' ਦੇ ਕਲਾਈਮੈਕਸ ਦੀ ਸ਼ੂਟਿੰਗ ਦੌਰਾਨ ਆਈਆਂ ਮੁਸ਼ਕਲਾਂ ਅਤੇ ਅਦਾਕਾਰ ਰਣਵੀਰ ਸਿੰਘ ਦੇ ਜਜ਼ਬੇ ਬਾਰੇ ਹੈਰਾਨੀਜਨਕ ਖੁਲਾਸੇ ਕੀਤੇ ਹਨ। ਕਰਨਦੀਪ ਨੇ ਦੱਸਿਆ ਕਿ ਕਿਵੇਂ ਰਣਵੀਰ ਨੇ ਅਤਿ ਦੀ ਗਰਮੀ ਵਿੱਚ ਵੀ ਆਪਣੇ ਕੰਮ ਪ੍ਰਤੀ ਸਮਰਪਣ ਦਿਖਾਇਆ, ਜਿਸ ਸਦਕਾ ਅੱਜ ਇਹ ਫਿਲਮ ਇਤਿਹਾਸ ਰਚ ਰਹੀ ਹੈ।

ਲੁਧਿਆਣਾ ਦੀ 48 ਡਿਗਰੀ ਗਰਮੀ 'ਚ ਹੋਈ ਸ਼ੂਟਿੰਗ

ਕਰਨਦੀਪ ਨੇ ਦੱਸਿਆ ਕਿ ਫਿਲਮ ਦੇ ਹਾਈ-ਓਕਟੇਨ ਕਲਾਈਮੈਕਸ ਸੀਨ ਦੀ ਸ਼ੂਟਿੰਗ ਲੁਧਿਆਣਾ ਦੇ ਬਾਹਰੀ ਇਲਾਕੇ ਵਿੱਚ ਹੋਈ ਸੀ। ਉਸ ਸਮੇਂ ਉੱਥੇ ਤਾਪਮਾਨ 47 ਤੋਂ 48 ਡਿਗਰੀ ਦੇ ਕਰੀਬ ਸੀ। ਸ਼ੂਟਿੰਗ ਵਾਲੀ ਜਗ੍ਹਾ 'ਤੇ ਦੂਰ-ਦੂਰ ਤੱਕ ਕੋਈ ਦਰੱਖਤ ਜਾਂ ਛਾਂ ਨਹੀਂ ਸੀ। ਆਲੇ-ਦੁਆਲੇ ਖੜ੍ਹੀਆਂ ਗੱਡੀਆਂ, ਕੰਟੇਨਰਾਂ ਅਤੇ ਮਾਲ ਗੱਡੀਆਂ ਦੀਆਂ ਮੈਟਲ ਸਤਹਾਂ ਕਾਰਨ ਗਰਮੀ ਹੋਰ ਵੀ ਵਧ ਗਈ ਸੀ।

ਤਪਦੇ ਕੰਟੇਨਰਾਂ 'ਤੇ ਰਣਵੀਰ ਦੇ ਐਕਸ਼ਨ ਸੀਨ

ਕਰਨਦੀਪ ਮੁਤਾਬਕ, ਰਣਵੀਰ ਸਿੰਘ ਅਜਿਹੀ ਭਿਆਨਕ ਗਰਮੀ ਵਿੱਚ ਇੱਕ ਕੰਟੇਨਰ ਤੋਂ ਦੂਜੇ ਕੰਟੇਨਰ 'ਤੇ ਛਾਲਾਂ ਮਾਰ ਕੇ ਫਾਈਟ ਸੀਨ ਸ਼ੂਟ ਕਰ ਰਹੇ ਸਨ। ਇੰਨੀ ਗਰਮੀ ਸੀ ਕਿ ਪੱਖੇ ਅਤੇ ਏਸੀ ਵੀ ਫੇਲ੍ਹ ਹੋ ਗਏ ਸਨ। ਇਸ ਦੇ ਬਾਵਜੂਦ ਰਣਵੀਰ ਨੇ, ਭਾਰੀ ਪਠਾਨੀ ਸੂਟ, ਲੈਦਰ ਜੈਕਟ ਅਤੇ ਓਵਰਕੋਟ ਪਹਿਨ ਕੇ ਸ਼ੂਟਿੰਗ ਜਾਰੀ ਰੱਖੀ। ਭਾਰੀ ਵਿੱਗ ਪਹਿਨੀ ਹੋਈ ਸੀ, ਜੋ ਕਿ ਗਰਮੀ ਵਿੱਚ ਕਿਸੇ ਸਜ਼ਾ ਤੋਂ ਘੱਟ ਨਹੀਂ ਸੀ। ਇੰਨੀ ਤਪਿਸ਼ ਸੀ ਕਿ ਅਸੀਂ ਠੀਕ ਤਰ੍ਹਾਂ ਖਾਣਾ ਤੱਕ ਨਹੀਂ ਸੀ ਖਾ ਪਾ ਰਹੇ, ਪਰ ਰਣਵੀਰ ਨੇ ਆਪਣੀ ਪਰਫਾਰਮੈਂਸ ਨਾਲ ਕਦੇ ਕੋਈ ਸਮਝੌਤਾ ਨਹੀਂ ਕੀਤਾ।

1000 ਕਰੋੜ ਦੇ ਕਲੱਬ ਵੱਲ ਵਧ ਰਹੀ ਹੈ 'ਧੁਰੰਦਰ'

ਰਣਵੀਰ ਸਿੰਘ ਦੀ ਇਹ ਮਿਹਨਤ ਰੰਗ ਲਿਆ ਰਹੀ ਹੈ। 'ਧੁਰੰਧਰ: ਦਿ ਰੀਵੈਂਜ' ਭਾਰਤ ਵਿੱਚ 1000 ਕਰੋੜ ਦਾ ਅੰਕੜਾ ਪਾਰ ਕਰਨ ਦੇ ਬਿਲਕੁਲ ਨੇੜੇ ਹੈ। ਇਹ ਅਜਿਹਾ ਇਤਿਹਾਸਕ ਬੈਂਚਮਾਰਕ ਹਾਸਲ ਕਰਨ ਵਾਲੀ ਪਹਿਲੀ ਹਿੰਦੀ ਫਿਲਮ ਬਣਨ ਲਈ ਤਿਆਰ ਹੈ। ਰਣਵੀਰ ਦੀ ਇਸ ਪਰਫਾਰਮੈਂਸ ਨੂੰ ਹਾਲ ਦੇ ਸਮੇਂ ਦੀ ਸਭ ਤੋਂ ਪ੍ਰਭਾਵਸ਼ਾਲੀ ਅਦਾਕਾਰੀ ਮੰਨਿਆ ਜਾ ਰਿਹਾ ਹੈ।