ਦੇਸ਼ ਦੀ ਬਰਾਮਦ ’ਚ ਬੰਪਰ ਵਾਧਾ, ਕੱਚੇ ਤੇਲ ਦੀ ਵਜ੍ਹਾ ਨਾਲ ਵਧਿਆ ਵਪਾਰ ਘਾਟਾ

ਦੇਸ਼ ਦੀ ਬਰਾਮਦ ਮਈ ’ਚ 18 ਫੀਸਦੀ ਵਧ ਕੇ 6 ਮਹੀਨਿਆਂ ਦੇ ਉੱਚੇ ਪੱਧਰ 45.2 ਅਰਬ ਅਮਰੀਕੀ ਡਾਲਰ ’ਤੇ ਪਹੁੰਚ ਗਈ। ਉੱਥੇ ਹੀ, ਕੱਚੇ ਤੇਲ ਦੀਆਂ ਕੀਮਤਾਂ ’ਚ ਤੇਜ਼ੀ ਦਰਮਿਆਨ ਕੱਚੇ ਤੇਲ ਅਤੇ ਪੈਟਰੋਲੀਅਮ ਉਤਪਾਦਾਂ ਦੀ ਦਰਾਮਦ ’ਚ ਹੋਏ ਵਾਧੇ ਨਾਲ ਵਪਾਰ ਘਾਟਾ 28.21 ਅਰਬ ਡਾਲਰ ਤੱਕ ਵਧ ਗਿਆ।

ਹਾਲਾਂਕਿ, ਮਹੀਨਾਵਾਰੀ ਆਧਾਰ ’ਤੇ ਵਪਾਰ ਘਾਟਾ ਅਪ੍ਰੈਲ ਦੇ 28.38 ਅਰਬ ਡਾਲਰ ਦੇ ਮੁਕਾਬਲੇ ਮਾਮੂਲੀ ਤੌਰ ’ਤੇ ਘੱਟ ਹੋਇਆ ਹੈ। ਪਿਛਲੇ ਸਾਲ ਮਈ ’ਚ ਵਪਾਰ ਘਾਟਾ 21.88 ਅਰਬ ਡਾਲਰ ਸੀ।

ਇਸ ਸਾਲ ਮਈ ’ਚ ਦੇਸ਼ ਦੀ ਦਰਾਮਦ ਸਾਲਾਨਾ ਆਧਾਰ ’ਤੇ 10 ਫੀਸਦੀ ਵਧ ਕੇ 3 ਮਹੀਨਿਆਂ ਦੇ ਉੱਚੇ ਪੱਧਰ 73.41 ਅਰਬ ਡਾਲਰ ’ਤੇ ਪਹੁੰਚ ਗਈ, ਜਿਸ ਨਾਲ ਪਿਛਲੇ ਸਾਲ ਵਾਂਗ ਵਪਾਰ ਘਾਟਾ ਹੋਰ ਜ਼ਿਆਦਾ ਵਧ ਗਿਆ। ਵਣਜ ਸਕੱਤਰ ਰਾਜੇਸ਼ ਅਗਰਵਾਲ ਨੇ ਦੱਸਿਆ ਕਿ ਗਲੋਬਲ ਭੂ-ਸਿਆਸੀ ਅਸਥਿਰਤਾ ਦੇ ਬਾਵਜੂਦ ਦੇਸ਼ ਦੀ ਬਰਾਮਦ ਵਧੀਆ ਪ੍ਰਦਰਸ਼ਨ ਕਰ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਮਈ ਦੇ ਅੰਕੜੇ ਸਭ ਤੋਂ ਜ਼ਿਆਦਾ ਮਹੀਨਾਵਾਰੀ ਬਰਾਮਦ ਅੰਕੜਿਆਂ ’ਚੋਂ ਇਕ ਹਨ ਅਤੇ ਰੁਝਾਨ ਨੂੰ ਦੇਖਦੇ ਹੋਏ ਇਹ ਸਾਲ ਬਰਾਮਦ ਲਈ ਚੰਗਾ ਰਹੇਗਾ।

ਚਾਲੂ ਮਾਲੀ ਸਾਲ ਦੇ ਸ਼ੁਰੂਆਤੀ 2 ਮਹੀਨਿਆਂ ’ਚ ਕਿਵੇਂ ਦੀ ਰਹੀ ਦਰਾਮਦ-ਬਰਾਮਦ
ਚਾਲੂ ਮਾਲੀ ਸਾਲ ਦੇ ਸ਼ੁਰੂਆਤੀ 2 ਮਹੀਨਿਆਂ (ਅਪ੍ਰੈਲ-ਮਈ) ’ਚ ਦੇਸ਼ ਦੀ ਬਰਾਮਦ 16.09 ਫੀਸਦੀ ਵਧ ਕੇ 88.91 ਅਰਬ ਡਾਲਰ ਹੋ ਗਈ, ਜਦੋਂ ਕਿ ਦਰਾਮਦ 15.14 ਫੀਸਦੀ ਵਧ ਕੇ 145.35 ਅਰਬ ਅਮਰੀਕੀ ਡਾਲਰ ਰਹੀ। ਇਸ ਦੌਰਾਨ ਵਪਾਰ ਘਾਟਾ 56.44 ਅਰਬ ਅਮਰੀਕੀ ਡਾਲਰ ਰਿਹਾ।

ਰਾਜੇਸ਼ ਅਗਰਵਾਲ ਨੇ ਕਿਹਾ ਕਿ ਇਸ ਸਾਲ ਮਈ ’ਚ ਪੱਛਮੀ ਏਸ਼ੀਆ ਨੂੰ ਭਾਰਤ ਦੀ ਬਰਾਮਦ ਲੱਗਭਗ ਪਿਛਲੇ ਸਾਲ ਦੇ ਬਰਾਬਰ ਪੱਧਰ ’ਤੇ ਪਹੁੰਚ ਗਈ, ਜਦੋਂ ਕਿ ਉਸ ਖੇਤਰ ’ਚ ਕਈ ਤਰ੍ਹਾਂ ਦੀਆਂ ਰੁਕਾਵਟਾਂ ਬਣੀਆਂ ਰਹੀਆਂ। ਭਾਰਤ ਦੀ ਪੱਛਮੀ ਏਸ਼ੀਆ ਨੂੰ ਬਰਾਮਦ ਮਈ ’ਚ ਮਾਮੂਲੀ ਤੌਰ ’ਤੇ ਘਟ ਕੇ 5.30 ਅਰਬ ਡਾਲਰ ਰਹੀ।

ਮਈ ’ਚ ਸੋਨੇ ਦੀ ਦਰਾਮਦ 34 ਫੀਸਦੀ ਵਧੀ
ਦੇਸ਼ ’ਚ ਸੋਨੇ ਦੀ ਦਰਾਮਦ ਮਈ ’ਚ ਸਾਲਾਨਾ ਆਧਾਰ ’ਤੇ 34 ਫੀਸਦੀ ਵਧ ਕੇ 3.41 ਅਰਬ ਡਾਲਰ ’ਤੇ ਪਹੁੰਚ ਗਈ, ਜਦੋਂ ਕਿ ਇਸੇ ਮਿਆਦ ’ਚ ਚਾਂਦੀ ਦੀ ਦਰਾਮਦ ’ਚ 86.65 ਫੀਸਦੀ ਦੀ ਭਾਰੀ ਗਿਰਾਵਟ ਦਰਜ ਕੀਤੀ ਗਈ। ਵਣਜ ਮੰਤਰਾਲਾ ਨੇ ਇਹ ਜਾਣਕਾਰੀ ਦਿੱਤੀ। ਸਰਕਾਰ ਨੇ ਕੀਮਤੀ ਧਾਤਾਂ ’ਤੇ ਇੰਪੋਰਟ ਡਿਊਟੀ 6 ਫੀਸਦੀ ਤੋਂ ਵਧਾ ਕੇ 15 ਫੀਸਦੀ ਕਰ ਦਿੱਤੀ, ਜੋ 13 ਮਈ ਤੋਂ ਲਾਗੂ ਹੋਈ।

ਵਣਜ ਮੰਤਰਾਲਾ ਦੇ ਅੰਕੜਿਆਂ ਅਨੁਸਾਰ ਸਮੀਖਿਆ ਅਧੀਨ ਮਿਆਦ ’ਚ ਚਾਂਦੀ ਦੀ ਦਰਾਮਦ ਘਟ ਕੇ 7.55 ਕਰੋੜ ਡਾਲਰ ਰਹਿ ਗਈ। ਸੋਨੇ ਦੀ ਦਰਾਮਦ ’ਚ ਵਾਧੇ ਕਾਰਨ ਮਈ ’ਚ ਦੇਸ਼ ਦਾ ਵਪਾਰ ਘਾਟਾ ਵਧ ਕੇ 28.21 ਅਰਬ ਡਾਲਰ ਹੋ ਗਿਆ। ਸਵਿਟਜ਼ਰਲੈਂਡ ਸੋਨਾ ਦਰਾਮਦ ਦਾ ਸਭ ਤੋਂ ਵੱਡਾ ਸੋਮਾ ਬਣਿਆ ਹੋਇਆ ਹੈ, ਜਿਸ ਦੀ ਹਿੱਸੇਦਾਰੀ ਲੱਗਭਗ 40 ਫੀਸਦੀ ਹੈ। ਇਸ ਤੋਂ ਬਾਅਦ ਸੰਯੁਕਤ ਅਰਬ ਅਮੀਰਾਤ (16 ਫੀਸਦੀ ਤੋਂ ਵੱਧ) ਅਤੇ ਦੱਖਣ ਅਫਰੀਕਾ (ਲੱਗਭਗ 10 ਫੀਸਦੀ) ਦਾ ਸਥਾਨ ਹੈ। ਸਵਿਟਜ਼ਰਲੈਂਡ ਤੋਂ ਮਈ ’ਚ ਸੋਨੇ ਦੀ ਦਰਾਮਦ 57.73 ਫੀਸਦੀ ਘਟ ਗਈ, ਜਦੋਂ ਕਿ ਮਾਲੀ ਸਾਲ 2026-27 ਦੇ ਪਹਿਲੇ 2 ਮਹੀਨਿਆਂ ’ਚ ਇਸ ’ਚ 20.34 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ।

ਸੋਨੇ ਦੀ ਦਰਾਮਦ ਅਪ੍ਰੈਲ-ਮਈ 2026-27 ਦੌਰਾਨ 60.14 ਫੀਸਦੀ ਵਧ ਕੇ 9.04 ਅਰਬ ਡਾਲਰ ਹੋ ਗਈ, ਜਦੋਂ ਕਿ ਚਾਂਦੀ ਦੀ ਦਰਾਮਦ ’ਚ ਲੱਗਭਗ 33 ਫੀਸਦੀ ਦੀ ਗਿਰਾਵਟ ਦਰਜ ਕੀਤੀ ਗਈ। ਸੋਨੇ ਦੀ ਦਰਾਮਦ ਮਾਲੀ ਸਾਲ 2025-26 ’ਚ 24 ਫੀਸਦੀ ਵਧ ਕੇ ਹੁਣ ਤੱਕ ਦੇ ਸਭ ਤੋਂ ਉੱਚੇ ਪੱਧਰ 71.98 ਅਰਬ ਡਾਲਰ ’ਤੇ ਰਹੀ ਸੀ। ਹਾਲਾਂਕਿ, ਮਾਤਰਾ ਦੇ ਹਿਸਾਬ ਨਾਲ ਇਸ ’ਚ 4.76 ਫੀਸਦੀ ਦੀ ਗਿਰਾਵਟ ਰਹੀ ਅਤੇ ਇਹ 721.03 ਟਨ ਰਿਹਾ।