ਬਿਹਾਰ ਦੀ ਰਾਜਨੀਤੀ ਭਖੀ ਹੋਈ ਹੈ। ਤੇਜ ਪ੍ਰਤਾਪ ਯਾਦਵ ਦੀ ਨਵੀਂ ਪਾਰਟੀ ਜਨਸ਼ਕਤੀ ਜਨਤਾ ਦਲ (JJD) ਨੇ ਮੌਜੂਦਾ NDA ਸਰਕਾਰ ਨੂੰ ਨੈਤਿਕ ਸਮਰਥਨ ਦੇਣ ਦਾ ਫੈਸਲਾ ਕੀਤਾ ਹੈ। ਇਸ ਕਦਮ ਨੂੰ ਸਿਆਸੀ ਤੌਰ 'ਤੇ ਅਹਿਮ ਮੰਨਿਆ ਜਾ ਰਿਹਾ ਹੈ, ਕਿਉਂਕਿ ਇਸ ਨਾਲ ਲਾਲੂ-ਪਰਿਵਾਰ ਤੋਂ ਤੇਜ ਪ੍ਰਤਾਪ ਦੀ ਦੂਰੀ ਹੋਰ ਵੀ ਸਪੱਸ਼ਟ ਹੋ ਜਾਂਦੀ ਹੈ।
ਰੋਹਿਣੀ ਆਚਾਰੀਆ ਨੂੰ ਬਣਾਇਆ ਜਾਵੇਗਾ ਸਰਪ੍ਰਸਤ
JJD ਦੀ ਹਾਲ ਹੀ ਵਿੱਚ ਹੋਈ ਬੈਠਕ ਵਿੱਚ ਇਹ ਪ੍ਰਸਤਾਵ ਵੀ ਪਾਸ ਕੀਤਾ ਗਿਆ ਕਿ ਲਾਲੂ ਪਰਿਵਾਰ ਦੀ ਧੀ ਰੋਹਿਣੀ ਆਚਾਰੀਆ ਨੂੰ ਉਨ੍ਹਾਂ ਦੀ ਪਾਰਟੀ ਦਾ ਰਾਸ਼ਟਰੀ ਸਰਪ੍ਰਸਤ (National Patron) ਬਣਾਇਆ ਜਾਵੇ।
ਪਾਰਟੀ ਦੇ ਰਾਸ਼ਟਰੀ ਬੁਲਾਰੇ (National Spokesperson) ਪ੍ਰੇਮ ਯਾਦਵ ਨੇ ਮੀਡੀਆ ਨੂੰ ਦੱਸਿਆ ਕਿ ਤੇਜ ਪ੍ਰਤਾਪ ਯਾਦਵ ਨੇ ਇਹ ਪ੍ਰਸਤਾਵ ਰੱਖਿਆ ਹੈ। ਪ੍ਰੇਮ ਯਾਦਵ ਨੇ ਅੱਗੇ ਕਿਹਾ ਕਿ ਤੇਜ ਪ੍ਰਤਾਪ ਜਲਦੀ ਹੀ ਖੁਦ ਰੋਹਿਣੀ ਆਚਾਰੀਆ ਨਾਲ ਇਸ ਵਿਸ਼ੇ 'ਤੇ ਗੱਲ ਕਰਨਗੇ ਅਤੇ ਉਨ੍ਹਾਂ ਨੂੰ ਪਾਰਟੀ ਦਾ ਰਾਸ਼ਟਰੀ ਸਰਪ੍ਰਸਤ ਬਣਨ ਦੀ ਬੇਨਤੀ ਕਰਨਗੇ।
RJD ਨੂੰ ਦੱਸਿਆ 'ਫਰਜ਼ੀ ਪਾਰਟੀ'
ਤੇਜ ਪ੍ਰਤਾਪ ਯਾਦਵ ਨੇ ਪਹਿਲਾਂ ਹੀ ਲਾਲੂ-ਪਰਿਵਾਰ ਨਾਲ ਆਪਣੇ ਸਿਆਸੀ ਅਤੇ ਪਰਿਵਾਰਕ ਮਤਭੇਦਾਂ ਨੂੰ ਜਨਤਕ ਕਰ ਦਿੱਤਾ ਸੀ। ਉਹ ਹੁਣ ਆਪਣੀ ਵੱਖਰੀ ਰਾਹ 'ਤੇ ਚੱਲਣ ਦੀ ਕੋਸ਼ਿਸ਼ ਕਰ ਰਹੇ ਹਨ। ਉਨ੍ਹਾਂ ਨੇ ਰਾਸ਼ਟਰੀ ਜਨਤਾ ਦਲ (RJD) ਨੂੰ 'ਫਰਜ਼ੀ ਪਾਰਟੀ' ਦੱਸਿਆ ਹੈ ਅਤੇ ਦਾਅਵਾ ਕੀਤਾ ਹੈ ਕਿ ਉਨ੍ਹਾਂ ਦੀ ਜਨਸ਼ਕਤੀ ਜਨਤਾ ਦਲ ਹੀ "ਅਸਲੀ ਲਾਲੂ ਯਾਦਵ ਪਾਰਟੀ" ਹੈ। ਸਿਆਸੀ ਵਿਸ਼ਲੇਸ਼ਕਾਂ ਮੁਤਾਬਕ, NDA ਨੂੰ ਨੈਤਿਕ ਸਮਰਥਨ ਦੇਣ ਦਾ ਇਹ ਕਦਮ ਤੇਜ ਪ੍ਰਤਾਪ ਦੀ ਰਣਨੀਤੀ ਦਾ ਹਿੱਸਾ ਹੈ, ਜਿਸ ਤਹਿਤ ਉਹ RJD ਦੇ ਟੁੱਟੇ ਗੱਠਜੋੜ ਤੋਂ ਬਾਹਰ ਆਉਣ ਤੋਂ ਬਾਅਦ ਆਪਣੀ ਸੁਤੰਤਰ ਪਛਾਣ ਬਣਾਉਣਾ ਚਾਹੁੰਦੇ ਹਨ ਅਤੇ ਸੱਤਾ ਸਮੀਕਰਨ ਵਿੱਚ ਸਬੰਧਤ ਬਣੇ ਰਹਿਣਾ ਚਾਹੁੰਦੇ ਹਨ।