ਦੇਸ਼ ’ਚ 15 ਸਾਲ ਅਤੇ ਉਸ ਤੋਂ ਵੱਧ ਉਮਰ ਦੇ ਲੋਕਾਂ ਦੀ ਬੇਰੋਜ਼ਗਾਰੀ ਦਰ ਜੁਲਾਈ ’ਚ ਘਟ ਕੇ 5.1 ਫੀਸਦੀ ਰਹਿ ਗਈ, ਜਦੋਂ ਕਿ ਜੂਨ ’ਚ ਇਹ 5.5 ਫੀਸਦੀ ਸੀ। ਰਾਸ਼ਟਰੀ ਅੰਕੜਾ ਦਫ਼ਤਰ (ਐੱਨ. ਐੱਸ. ਓ.) ਦੇ ਤੈਅ ਵਕਫੇ ਪਿੱਛੋਂ ਹੋਣ ਵਾਲੇ ਲੇਬਰ ਫੋਰਸ ਸਰਵੇਖਣ (ਪੀ. ਐੱਲ. ਐੱਫ. ਐੱਸ.) ਦੇ ਜਾਰੀ ਅੰਕੜਿਆਂ ’ਚ ਇਹ ਜਾਣਕਾਰੀ ਦਿੱਤੀ ਗਈ।
ਦਿਹਾਤੀ ਖੇਤਰਾਂ ’ਚ ਬੇਰੋਜ਼ਗਾਰੀ ਦਰ ਜੂਨ ’ਚ 5 ਫੀਸਦੀ ਤੋਂ ਘਟ ਕੇ ਜੁਲਾਈ ’ਚ 4.5 ਫੀਸਦੀ ਹੋ ਗਈ। ਉੱਥੇ ਹੀ, ਸ਼ਹਿਰੀ ਖੇਤਰਾਂ ’ਚ ਇਹ ਮਾਮੂਲੀ ਵਧ ਕੇ 6.7 ਫੀਸਦੀ ਰਹੀ, ਜੋ ਜੂਨ ’ਚ 6.6 ਫੀਸਦੀ ਸੀ। ਹਾਲਾਂਕਿ, ਸ਼ਹਿਰੀ ਬੇਰੋਜ਼ਗਾਰੀ ਦਰ ਜੁਲਾਈ 2025 ਦੇ 7.2 ਫੀਸਦੀ ਤੋਂ ਘੱਟ ਰਹੀ।
ਲੇਬਰ ਫੋਰਸ ਹਿੱਸੇਦਾਰੀ ’ਚ ਸੁਧਾਰ
ਜੁਲਾਈ ’ਚ ਕੁੱਲ ਲੇਬਰ ਫੋਰਸ ਹਿੱਸੇਦਾਰੀ ਦਰ ਵਧ ਕੇ 55.4 ਫੀਸਦੀ ਹੋ ਗਈ, ਜੋ ਜੂਨ ’ਚ 54.4 ਫੀਸਦੀ ਸੀ। ਦਿਹਾਤੀ ਖੇਤਰਾਂ ’ਚ ਇਹ 56.6 ਫੀਸਦੀ ਤੋਂ ਵਧ ਕੇ 58 ਫੀਸਦੀ ਅਤੇ ਸ਼ਹਿਰੀ ਖੇਤਰਾਂ ’ਚ 50.1 ਫੀਸਦੀ ਤੋਂ ਵਧ ਕੇ 50.4 ਫੀਸਦੀ ਰਹੀ। ਔਰਤਾਂ ਦੀ ਕੁੱਲ ਲੇਬਰ ਫੋਰਸ ਹਿੱਸੇਦਾਰੀ ਵੀ 32.7 ਫੀਸਦੀ ਤੋਂ ਵਧ ਕੇ 34.4 ਫੀਸਦੀ ਹੋ ਗਈ।
ਕੰਮਕਾਜੀ ਜਨਸੰਖਿਆ ਅਨੁਪਾਤ ਵਧਿਆ
ਕੰਮਕਾਜੀ ਜਨਸੰਖਿਆ ਅਨੁਪਾਤ ਜੂਨ ਦੇ 51.4 ਫੀਸਦੀ ਤੋਂ ਵਧ ਕੇ ਜੁਲਾਈ ’ਚ 52.5 ਫੀਸਦੀ ਹੋ ਗਿਆ। ਦਿਹਾਤੀ ਖੇਤਰਾਂ ’ਚ ਇਹ 53.8 ਫੀਸਦੀ ਤੋਂ ਵਧ ਕੇ 55.4 ਫੀਸਦੀ ਰਿਹਾ, ਜਦੋਂ ਕਿ ਸ਼ਹਿਰੀ ਖੇਤਰਾਂ ’ਚ ਮਾਮੂਲੀ ਵਾਧੇ ਨਾਲ 47 ਫੀਸਦੀ ਹੋ ਗਿਆ। ਜੁਲਾਈ ਦੇ ਅੰਕੜੇ 3,71,021 ਲੋਕਾਂ ਤੋਂ ਜੁਟਾਈ ਗਈ ਜਾਣਕਾਰੀ ’ਤੇ ਆਧਾਰਿਤ ਹਨ।