ਪਿਆਜ਼ ਅਤੇ ਹੋਰ ਖੁਰਾਕੀ ਵਸਤਾਂ ਦੀਆਂ ਕੀਮਤਾਂ ’ਚ ਤੇਜ਼ੀ ਕਾਰਨ ਪ੍ਰਚੂਨ ਮਹਿੰਗਾਈ ਸਤੰਬਰ ’ਚ ਵਧ ਕੇ 5.54 ਫੀਸਦੀ ਹੋ ਗਈ। ਹਾਲਾਂਕਿ, ਇਹ ਭਾਰਤੀ ਰਿਜ਼ਰਵ ਬੈਂਕ (ਆਰ. ਬੀ. ਆਈ.) ਲਈ ਨਿਰਧਾਰਿਤ ਸੰਤੋਸ਼ਜਨਕ ਹੱਦ ਦੇ ਅੰਦਰ ਹੈ।
ਖਪਤਕਾਰ ਮੁੱਲ ਸੂਚਕ ਅੰਕ (ਸੀ. ਪੀ. ਆਈ.) ’ਤੇ ਆਧਾਰਿਤ ਪ੍ਰਚੂਨ ਮਹਿੰਗਾਈ ਅਗਸਤ ’ਚ 4.83 ਫੀਸਦੀ ਸੀ। ਰਾਸ਼ਟਰੀ ਅੰਕੜਾ ਦਫ਼ਤਰ (ਐੱਨ. ਐੱਸ. ਓ.) ਦੇ ਅੰਕੜਿਆਂ ਅਨੁਸਾਰ, ਖੁਰਾਕ ਮਹਿੰਗਾਈ ਸਤੰਬਰ ’ਚ ਵਧ ਕੇ 7.74 ਫੀਸਦੀ ਹੋ ਗਈ, ਜੋ ਅਗਸਤ ’ਚ 5.97 ਫੀਸਦੀ ਸੀ। ਸਾਲ 2024 ਨੂੰ ਆਧਾਰ ਸਾਲ ਮੰਨ ਕੇ ਤਿਆਰ ਕੀਤੇ ਗਏ ਕੁੱਲ ਭਾਰਤੀ ਖਪਤਕਾਰ ਮੁੱਲ ਸੂਚਕ ਅੰਕ ਦੇ ਆਧਾਰ ’ਤੇ ਮਹਿੰਗਾਈ 5.54 ਫੀਸਦੀ ਰਹੀ। ਜਨਵਰੀ ’ਚ ਸਾਲ 2024 ਨੂੰ ਆਧਾਰ ਸਾਲ ਮੰਨ ਕੇ ਨਵੀਂ ਲੜੀ ਸ਼ੁਰੂ ਹੋਣ ਤੋਂ ਬਾਅਦ ਸਤੰਬਰ ’ਚ ਪ੍ਰਚੂਨ ਮਹਿੰਗਾਈ ਸਭ ਤੋਂ ਉੱਚੇ ਪੱਧਰ ’ਤੇ ਪਹੁੰਚ ਗਈ। ਪਿਛਲੇ ਹਫ਼ਤੇ ਭਾਰਤੀ ਰਿਜ਼ਰਵ ਬੈਂਕ (ਆਰ. ਬੀ. ਆਈ.) ਨੇ ਆਪਣੀ ਮੁੱਖ ਨੀਤੀਗਤ ਦਰ ਰੈਪੋ ’ਚ 0.25 ਫੀਸਦੀ ਦਾ ਵਾਧਾ ਕਰ ਕੇ ਇਸ ਨੂੰ 5.50 ਫੀਸਦੀ ਕਰ ਦਿੱਤਾ ਸੀ।
ਵਿਦੇਸ਼ੀ ਪੂੰਜੀ ਦੀ ਨਿਕਾਸੀ ਨਾਲ ਸੈਂਸੈਕਸ 547.65 ਅੰਕ ਟੁੱਟਿਆ
ਕੱਚੇ ਤੇਲ ਦੇ ਭਾਅ ’ਚ ਤੇਜ਼ੀ ਅਤੇ ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ ਦੀ ਬਿਕਵਾਲੀ ਦੇ ਦਬਾਅ ਨਾਲ ਘਰੇਲੂ ਸ਼ੇਅਰ ਬਾਜ਼ਾਰ ਸੋਮਵਾਰ ਨੂੰ ਨੁਕਸਾਨ ’ਚ ਰਹੇ। ਬੀ. ਐੱਸ. ਈ. ਦਾ ਮਿਆਰੀ ਸੂਚਕ ਅੰਕ ਸੈਂਸੈਕਸ ਲੱਗਭਗ 547.65 ਅੰਕ ਟੁੱਟ ਗਿਆ, ਜਦਕਿ ਐੱਨ. ਐੱਸ. ਈ. ਦੇ ਮਿਆਰੀ ਸੂਚਕ ਅੰਕ ਨਿਫ਼ਟੀ ’ਚ 157.10 ਅੰਕ ਦੀ ਗਿਰਾਵਟ ਆਈ।
ਵਿਸ਼ਲੇਸ਼ਕਾਂ ਅਨੁਸਾਰ, ਅਮਰੀਕਾ ’ਚ ਬਾਂਡ ਪ੍ਰਤੀਫਲ ’ਚ ਵਾਧੇ ਨਾਲ ਵੀ ਨਿਵੇਸ਼ਕਾਂ ਦੀ ਧਾਰਨਾ ਪ੍ਰਭਾਵਿਤ ਹੋਈ। ਸੈਂਸੈਕਸ 547.65 ਅੰਕ ਭਾਵ 0.76 ਫੀਸਦੀ ਦੀ ਗਿਰਾਵਟ ਨਾਲ 71,924.68 ਅੰਕ ’ਤੇ ਬੰਦ ਹੋਇਆ।
ਡਾਲਰ ਦੇ ਮੁਕਾਬਲੇ ਰੁਪਇਆ 93 ਪੈਸੇ ਮਜ਼ਬੂਤ
ਭਾਰਤੀ ਰਿਜ਼ਰਵ ਬੈਂਕ (ਆਰ. ਬੀ. ਆਈ.) ਵੱਲੋਂ ਘਰੇਲੂ ਕਰੰਸੀ ਨੂੰ ਮਜ਼ਬੂਤੀ ਦੇਣ ਲਈ ਹਫਤੇ ਦੇ ਅੰਤ ’ਚ ਕਈ ਕਦਮ ਚੁੱਕੇ ਜਾਣ ਤੋਂ ਬਾਅਦ ਰੁਪਇਆ ਸੋਮਵਾਰ ਨੂੰ ਅਮਰੀਕੀ ਕਰੰਸੀ ਦੇ ਮੁਕਾਬਲੇ 93 ਪੈਸੇ ਮਜ਼ਬੂਤ ਹੋ ਕੇ 95.78 ਪ੍ਰਤੀ ਡਾਲਰ ’ਤੇ ਬੰਦ ਹੋਇਆ। 6 ਮਹੀਨਿਆਂ ਤੋਂ ਵੱਧ ਸਮੇਂ ’ਚ ਰੁਪਏ ਦਾ ਇਹ ਇਕ ਦਿਨਾ ਸਭ ਤੋਂ ਵੱਡਾ ਵਾਧਾ ਹੈ।