ਮੁੰਬਈ : ਅਦਾਕਾਰਾ ਅਤੇ ਭਾਜਪਾ ਸੰਸਦ ਮੈਂਬਰ ਕੰਗਨਾ ਰਣੌਤ ਨੇ ਇੱਕ ਗਹਿਣਿਆਂ ਦੇ ਬ੍ਰਾਂਡ ਲਈ ਅਦਾਕਾਰਾ ਕ੍ਰਿਤੀ ਸੈਨਨ ਦੀ ਨਵੀਂ ਐਡ 'ਤੇ ਚੁਟਕੀ ਲੈਂਦੇ ਹੋਏ ਮੰਗਲਵਾਰ ਨੂੰ ਕਿਹਾ ਕਿ ਇਹ ਐਡ "ਜਾਣਬੁੱਝ ਕੇ ਅਸਹਿਜ ਕਰਨ ਵਾਲੀ" ਲੱਗਦਾ ਹੈ। ਉਸਨੇ ਇਹ ਵੀ ਸਵਾਲ ਕੀਤਾ ਕਿ ਕੋਈ ਕੁੜੀ ਆਪਣੇ ਭਰਾ ਨੂੰ ਬਿਕਨੀ ਪਹਿਨ ਕੇ ਰੱਖੜੀ ਕਿਉਂ ਬੰਨ੍ਹੇਗੀ? ਸੈਨਨ ਦੀ ਨਵੀਂ ਗਹਿਣਿਆਂ ਦੀ ਐਡ ਵਿੱਚ ਸਲੀਵਲੈੱਸ ਪਹਿਰਾਵੇ ਨੂੰ ਲੈ ਕੇ ਸੋਸ਼ਲ ਮੀਡੀਆ 'ਤੇ ਵਿਵਾਦ ਛਿੜ ਗਿਆ ਹੈ। ਕੁਝ ਲੋਕਾਂ ਨੇ ਇਸਨੂੰ ਅਸ਼ਲੀਲ ਕਿਹਾ, ਜਦੋਂ ਕਿ ਕੁੱਝ ਨੇ ਕਿਹਾ ਕਿ ਅਦਾਕਾਰਾ ਨੇ ਜੋ ਪਹਿਨਿਆ ਹੈ, ਉਸ ਵਿੱਚ ਕੁਝ ਵੀ ਗਲਤ ਨਹੀਂ ਹੈ।
ਰਣੌਤ ਨੇ ਵਿਵਾਦ 'ਤੇ ਪ੍ਰਤੀਕਿਰਿਆ ਦਿੱਤੀ, ਹਾਲਾਂਕਿ ਉਸਨੇ ਸੈਨਨ ਦਾ ਨਾਮ ਨਹੀਂ ਲਿਆ। ਉਸਨੇ ਆਪਣੀ ਇੰਸਟਾਗ੍ਰਾਮ ਸਟੋਰੀ ਵਿੱਚ ਲਿਖਿਆ, "ਮਹਿਲਾ ਹੋਣ ਲਈ ਇਹ ਇੱਕ ਸ਼ਾਨਦਾਰ ਸਮਾਂ ਹੈ। ਸਾਡੀਆਂ ਅਲਮਾਰੀਆਂ ਵੱਖ-ਵੱਖ ਤਰ੍ਹਾਂ ਦੇ ਕੱਪੜਿਆਂ ਨਾਲ ਭਰੀਆਂ ਹੋਈਆਂ ਹਨ। ਅੱਜ ਦੀ ਔਰਤ ਗਲੋਬਲ ਔਰਤ ਹੈ - ਕਾਕਟੇਲ ਡਰੈੱਸਾਂ ਤੋਂ ਲੈ ਕੇ ਲਹਿੰਗਾ-ਚੋਲੀ, ਜੀਨਸ ਤੋਂ ਸਾੜੀਆਂ, ਅਤੇ ਬਿਕਨੀ ਤੋਂ ਸਲਵਾਰ-ਕਮੀਜ਼ ਤੱਕ।" ਰਣੌਤ ਨੇ ਕਿਹਾ, "ਅੱਜ ਸਾਡੇ ਕੋਲ ਕੱਪੜਿਆਂ ਦੇ ਇੰਨੇ ਸਾਰੇ ਵਿਕਲਪ ਹਨ, ਤਾਂ ਤੁਸੀਂ ਆਪਣੀ ਬਿਕਨੀ/ਲਿੰਗਰੀ ਵਿੱਚ ਆਪਣੇ ਭਰਾ ਨੂੰ ਰੱਖੜੀ ਕਿਉਂ ਬੰਨ੍ਹੋਗੇ? ਤੁਹਾਡੇ ਕੋਲ ਸਟਾਈਲ ਦੇ ਸਾਰੇ ਵਿਕਲਪ ਕਿੱਥੇ ਹਨ? ਹਾਹਾ, ਇਹ ਐਡ ਜਾਣਬੁੱਝ ਕੇ ਅਸਹਿਜ ਕਰਨ ਵਾਲੀ ਲੱਗਦੀ ਹੈ।"
ਸੈਨਨ ਦੀ ਐਡ ਨੂੰ ਲੈ ਕੇ ਸੋਮਵਾਰ ਨੂੰ ਸੋਸ਼ਲ ਮੀਡੀਆ 'ਤੇ ਬਹਿਸ ਛਿੜ ਗਈ ਅਤੇ ਬਹੁਤ ਸਾਰੇ ਲੋਕਾਂ ਨੇ ਅਦਾਕਾਰਾ ਨੂੰ ਟ੍ਰੋਲ ਕੀਤਾ। ਇੱਕ ਸੋਸ਼ਲ ਮੀਡੀਆ ਯੂਜ਼ਰ ਨੇ ਲਿਖਿਆ, "ਕ੍ਰਿਤੀ ਸੈਨਨ ਬ੍ਰਾ ਵਰਗੇ ਕੱਪੜੇ ਪਾ ਕੇ ਰੱਖੜੀ ਬੰਨ੍ਹ ਰਹੀ ਹੈ। ਪਹਿਲਾਂ ਨਗਨਤਾ ਇੰਨੀ ਆਮ ਨਹੀਂ ਸੀ।" ਇੱਕ ਹੋਰ ਯੂਜ਼ਰ ਨੇ ਲਿਖਿਆ, "ਰਚਨਾਤਮਕ ਆਜ਼ਾਦੀ ਚੰਗੀ ਗੱਲ ਹੈ, ਪਰ ਇਸ ਨਾਲ ਪਰੰਪਰਾ ਦੇ ਸਾਰ ਨੂੰ ਨਹੀਂ ਬਦਲਣਾ ਚਾਹੀਦਾ।" ਹਾਲਾਂਕਿ ਕਈਆਂ ਨੇ ਅਦਾਕਾਰਾ ਦਾ ਬਚਾਅ ਵੀ ਕੀਤਾ।