ਮੈਲਬੌਰਨ : ਪ੍ਰਸਿੱਧ ਪੰਜਾਬੀ ਪੌਪ ਗਾਇਕ ਕਰਨ ਔਜਲਾ ਦਾ ਆਸਟ੍ਰੇਲੀਆ ਦਾ ਦੌਰਾ ਵੀਜ਼ਾ ਵਿੱਚ ਹੋਈ ਦੇਰੀ ਕਾਰਨ ਸੰਕਟ ਵਿੱਚ ਘਿਰ ਗਿਆ ਹੈ। ਆਸਟ੍ਰੇਲੀਆਈ ਇਮੀਗ੍ਰੇਸ਼ਨ ਵਿਭਾਗ ਨੇ ਉਨ੍ਹਾਂ ਦੇ ਵੀਜ਼ੇ 'ਤੇ ਰੋਕ ਲਗਾ ਦਿੱਤੀ ਹੈ, ਜਿਸ ਬਾਰੇ ਗਾਇਕ ਦੇ ਨੁਮਾਇੰਦਿਆਂ ਦਾ ਦਾਅਵਾ ਹੈ ਕਿ ਇਹ 'ਗਲਤ ਪਛਾਣ' ਦਾ ਮਾਮਲਾ ਹੈ। ਦੁਨੀਆ ਭਰ ਵਿੱਚ ਮਕਬੂਲ ਅਤੇ 7 ਅਰਬ ਤੋਂ ਵੱਧ ਸਪੋਟੀਫਾਈ ਸਟ੍ਰੀਮਜ਼ ਵਾਲੇ ਇਸ ਕੈਨੇਡੀਅਨ-ਇੰਡੀਅਨ ਸਟਾਰ ਦਾ ''ਪੀ -ਪੌਪ ਕਲਚਰ ਵਰਲਡ ਟੂਰ ' ਵੀਰਵਾਰ ਨੂੰ ਪਰਥ ਤੋਂ ਸ਼ੁਰੂ ਹੋਣਾ ਸੀ, ਪਰ ਵੀਜ਼ਾ ਦੀ ਸਮੱਸਿਆ ਕਾਰਨ ਗਾਇਕ ਅਤੇ ਉਨ੍ਹਾਂ ਦੀ ਟੀਮ ਨੂੰ ਬੁੱਧਵਾਰ ਨੂੰ ਇਹ ਸ਼ੋਅ ਮੁਲਤਵੀ ਕਰਕੇ 24 ਅਗਸਤ 'ਤੇ ਪਾਉਣਾ ਪਿਆ।
ਸਾਲ 2024 ਦੇ ਅਕਤੂਬਰ ਅਤੇ ਨਵੰਬਰ ਮਹੀਨੇ ਵਿੱਚ ਆਸਟ੍ਰੇਲੀਆ ਵਿੱਚ ਬਿਨਾਂ ਕਿਸੇ ਸਮੱਸਿਆ ਦੇ ਸ਼ੋਅ ਕਰਨ ਵਾਲੇ ਕਰਨ ਔਜਲਾ ਦੀ ਇਸ ਵਾਰ ਦੀ ਅਰਜ਼ੀ ਨੂੰ ਹੋਰ "ਸਬੂਤਾਂ" ਲਈ ਰੋਕ ਦਿੱਤਾ ਗਿਆ ਹੈ। ਇਮੀਗ੍ਰੇਸ਼ਨ ਵਿਭਾਗ ਨੇ ਆਸਟ੍ਰੇਲੀਆਈ ਪ੍ਰਮੋਟਰ 'ਲਾਈਵ ਨੇਸ਼ਨ' ਨੂੰ ਸੂਚਿਤ ਕੀਤਾ ਹੈ ਕਿ ਗਾਇਕ ਨੂੰ ਜਾਂਚ ਦੇ ਘੇਰੇ ਵਿੱਚ ਰੱਖਿਆ ਗਿਆ ਹੈ। ਵਿਭਾਗ ਵੱਲੋਂ ਜਿਸ ਵਿਅਕਤੀ ਦਾ ਹਵਾਲਾ ਦਿੱਤਾ ਗਿਆ ਹੈ, ਉਹ ਜਸਕਰਨ ਸਿੰਘ ਹੈ, ਜਿਸ ਨੂੰ ਮਈ 2024 ਵਿੱਚ ਓਨਟਾਰੀਓ ਵਿੱਚ ਜ਼ਬਰਦਸਤੀ ਵਸੂਲੀ ਅਤੇ ਹਥਿਆਰਾਂ ਦੇ ਦੋਸ਼ਾਂ ਹੇਠ ਗ੍ਰਿਫ਼ਤਾਰ ਕੀਤਾ ਗਿਆ ਸੀ।
ਹਾਲਾਂਕਿ ਕਰਨ ਔਜਲਾ ਦਾ ਅਸਲ ਨਾਂ ਜਸਕਰਨ ਸਿੰਘ ਔਜਲਾ ਹੈ, ਉਨ੍ਹਾਂ ਦੀ ਉਮਰ ਵੀ ਉਸ ਮੁਲਜ਼ਮ ਨਾਲੋਂ ਵੱਖਰੀ ਹੈ। ਸਿਸਟਮ ‘ਚ ਪਛਾਣ ਰਲਗੱਡ ਹੋਣ ਕਾਰਨ ਆਸਟ੍ਰੇਲੀਆ ਵੱਲੋਂ ਫਿਲਹਾਲ ਵੀਜ਼ਾ ਜਾਰੀ ਨਹੀਂ ਕੀਤਾ ਜਾ ਰਿਹਾ ਤੇ ਹੋਰ ਕਲਾਕਾਰ ਦੇ ਵੇਰਵਿਆਂ ਦੀ ਪੂਰੀ ਤਫਸੀਲ ਮੰਗੀ ਹੈ। ਇਸ ਵੀਜ਼ਾ ਫੀਤਾਸ਼ਾਹੀ ਦੇ ਚਲਦਿਆਂ ਕਰਨ ਔਜਲਾ ਨੂੰ ਆਸਟ੍ਰੇਲੀਆ ਟੂਰ ਦਾ ਪਹਿਲਾ ਪਰਥ ਸ਼ੋਅ ਰੱਦ ਕਰਨਾ ਪਿਆ ਹੈ। ਔਜਲਾ ਮੇ ਸਰੋਤਿਆਂ ਤੋਂ ਮਾਫੀ ਮੰਗਦਿਆਂ ਮਸਲੇ ਦਾ ਹੱਲ ਹੋਣ ਦੀ ਉਮੀਦ ਪ੍ਰਗਟਾਈ ਹੈ । ਉਸਦੇ ਰੱਖੇ ਗਏ ਕ੍ਰਮਵਾਰ ਸ਼ੋਅ 16 ਅਗਸਤ ਨੂੰ ਐਡੀਲੇਡ, 18 ਅਤੇ 19 ਅਗਸਤ ਨੂੰ ਮੈਲਬੌਰਨ, 21 ਅਗਸਤ ਨੂੰ ਸਿਡਨੀ ਵਿੱਚ ਹਨ। ਜੋ ਵੀਜ਼ੇ 'ਤੇ ਨਿਰਭਰ ਹੋ ਗਏ ਹਨ।