ਆਰਮੀ ਡੇਅ 'ਤੇ ਭਾਵੁਕ ਪਲ ! ਸ਼ਹੀਦ ਦੀ ਮਾਂ ਆਰਮੀ ਮੈਡਲ ਲੈਂਦੇ ਸਮੇਂ ਸਟੇਜ 'ਤੇ ਹੋਈ ਬੇਹੋਸ਼

ਰਾਜਸਥਾਨ ਦੀ ਰਾਜਧਾਨੀ ਜੈਪੁਰ 'ਚ ਅੱਜ ਭਾਰਤੀ ਫੌਜ ਦੀ ਤਾਕਤ ਦਾ ਸ਼ਾਨਦਾਰ ਪ੍ਰਦਰਸ਼ਨ ਦੇਖਣ ਨੂੰ ਮਿਲਿਆ। ਇਤਿਹਾਸ 'ਚ ਪਹਿਲੀ ਵਾਰ ਆਰਮੀ ਡੇਅ ਪਰੇਡ ਫੌਜੀ ਖੇਤਰ ਤੋਂ ਬਾਹਰ ਜੈਪੁਰ ਦੇ ਮਹਿਲ ਰੋਡ 'ਤੇ ਆਯੋਜਿਤ ਕੀਤੀ ਗਈ, ਜਿਸ ਵਿੱਚ ਹਜ਼ਾਰਾਂ ਲੋਕ ਇਸ ਇਤਿਹਾਸਕ ਪਲ ਦੇ ਗਵਾਹ ਬਣੇ। ਇਸ ਮੌਕੇ ਚੀਫ਼ ਆਫ਼ ਡਿਫੈਂਸ ਸਟਾਫ਼ (CDS) ਜਨਰਲ ਅਨਿਲ ਚੌਹਾਨ ਤੇ ਮੁੱਖ ਮੰਤਰੀ ਭਜਨ ਲਾਲ ਸ਼ਰਮਾ ਵਿਸ਼ੇਸ਼ ਤੌਰ 'ਤੇ ਹਾਜ਼ਰ ਸਨ।

ਮੈਡਲ ਲੈਂਦੇ ਸਮੇਂ ਸ਼ਹੀਦ ਦੀ ਮਾਂ ਹੋਈ ਬੇਹੋਸ਼
ਪਰੇਡ ਦੀ ਸ਼ੁਰੂਆਤ 'ਆਪਰੇਸ਼ਨ ਸਿੰਦੂਰ' ਵਿੱਚ ਸ਼ਹੀਦ ਹੋਏ ਜਵਾਨਾਂ ਨੂੰ ਸੈਨਾ ਮੈਡਲ (ਬਹਾਦਰੀ) ਨਾਲ ਸਨਮਾਨਿਤ ਕਰਨ ਨਾਲ ਹੋਈ। ਇਸ ਦੌਰਾਨ ਇੱਕ ਬਹੁਤ ਹੀ ਭਾਵੁਕ ਪਲ ਦੇਖਣ ਨੂੰ ਮਿਲਿਆ ਜਦੋਂ 1 ਪੈਰਾ ਸਪੈਸ਼ਲ ਫੋਰਸ ਦੇ ਸ਼ਹੀਦ ਲਾਂਸ ਨਾਇਕ ਪ੍ਰਦੀਪ ਕੁਮਾਰ ਦੀ ਮਾਂ ਆਪਣੇ ਪੁੱਤਰ ਦਾ ਮੈਡਲ ਲੈਂਦੇ ਹੋਏ ਮੰਚ 'ਤੇ ਹੀ ਬੇਹੋਸ਼ ਹੋ ਗਈ। ਮਿਲਟਰੀ ਅਧਿਕਾਰੀਆਂ ਨੇ ਤੁਰੰਤ ਉਨ੍ਹਾਂ ਨੂੰ ਸੰਭਾਲਿਆ ਤੇ ਐਂਬੂਲੈਂਸ ਰਾਹੀਂ ਹਸਪਤਾਲ ਪਹੁੰਚਾਇਆ।

ਜੈਪੁਰ ਦੀਆਂ ਸੜਕਾਂ 'ਤੇ 'ਸ਼ਕਤੀ ਪ੍ਰਦਰਸ਼ਨ' 
ਪਰੇਡ ਦੌਰਾਨ ਜੈਪੁਰ ਦੀਆਂ ਸੜਕਾਂ 'ਤੇ ਭਾਰਤੀ ਫੌਜ ਦੇ ਸਭ ਤੋਂ ਘਾਤਕ ਹਥਿਆਰਾਂ ਦਾ ਪ੍ਰਦਰਸ਼ਨ ਕੀਤਾ ਗਿਆ। ਇਨ੍ਹਾਂ ਵਿੱਚ ਬ੍ਰਹਮੋਸ ਮਿਜ਼ਾਈਲ, ਭੀਸ਼ਮ (T-90) ਅਤੇ ਅਰਜੁਨ ਟੈਂਕ, ਪਿਨਾਕਾ ਰਾਕੇਟ ਲਾਂਚਰ ਅਤੇ ਆਧੁਨਿਕ ਰੋਬੋਟਿਕ ਡੌਗਸ (ਸੈਂਸਰ ਅਤੇ ਕੈਮਰਿਆਂ ਨਾਲ ਲੈਸ) ਸ਼ਾਮਲ ਸਨ। 'ਆਤਮਨਿਰਭਰ ਭਾਰਤ' ਤਹਿਤ ਬਣਿਆ ਅਰਜੁਨ ਟੈਂਕ 120 mm ਰਾਈਫਲ ਗਨ ਅਤੇ ਐਂਟੀ-ਏਅਰਕ੍ਰਾਫਟ ਮਸ਼ੀਨ ਗਨ ਨਾਲ ਲੈਸ ਹੋ ਕੇ ਸਭ ਦੀ ਖਿੱਚ ਦਾ ਕੇਂਦਰ ਰਿਹਾ।

ਅਸਮਾਨ ਵਿੱਚ ਜਗੁਆਰ ਅਤੇ ਅਪਾਚੇ ਦਾ ਜਲਵਾ 
ਸਿਰਫ਼ ਜ਼ਮੀਨ 'ਤੇ ਹੀ ਨਹੀਂ, ਸਗੋਂ ਅਸਮਾਨ ਵਿੱਚ ਵੀ ਭਾਰਤੀ ਹਵਾਈ ਫੌਜ ਅਤੇ ਫੌਜੀ ਹਵਾਬਾਜ਼ੀ ਨੇ ਆਪਣੀ ਤਾਕਤ ਦਿਖਾਈ। ਬੀਕਾਨੇਰ ਦੇ ਨਾਲ (Nal) ਏਅਰਬੇਸ ਤੋਂ ਉਡਾਣ ਭਰ ਕੇ ਆਏ ਜਗੁਆਰ ਫਾਈਟਰ ਜੈੱਟ ਅਤੇ ਅਪਾਚੇ ਅਟੈਕ ਹੈਲੀਕਾਪਟਰਾਂ ਨੇ ਅਸਮਾਨ ਵਿੱਚ ਹੈਰਾਨੀਜਨਕ ਕਰਤਬ ਦਿਖਾਏ। 251 ਆਰਮੀ ਐਵੀਏਸ਼ਨ ਸਕੁਐਡਰਨ ਦੀ ਕੈਪਟਨ ਹੰਸਜਾ ਸ਼ਰਮਾ, ਜੋ ਕਿ ਰੁਦਰ ਹੈਲੀਕਾਪਟਰ ਦੀ ਪਹਿਲੀ ਮਹਿਲਾ ਪਾਇਲਟ ਹੈ, ਦੀ ਅਗਵਾਈ ਵਿੱਚ 'ਹੈਲੀਨਾ' ਐਂਟੀ-ਟੈਂਕ ਗਾਈਡਡ ਮਿਜ਼ਾਈਲ ਦਾ ਪ੍ਰਦਰਸ਼ਨ ਵੀ ਕੀਤਾ ਗਿਆ।

ਵਿਲੱਖਣ ਤਕਨਾਲੋਜੀ ਦਾ ਪ੍ਰਦਰਸ਼ਨ 
ਪਰੇਡ ਵਿੱਚ ਅਪਗ੍ਰੇਡਡ 'ਸ਼ਿਲਕਾ' (ਆਟੋਮੈਟਿਕ ਐਂਟੀ-ਏਅਰਕ੍ਰਾਫਟ ਗਨ) ਦਾ ਵੀ ਪ੍ਰਦਰਸ਼ਨ ਹੋਇਆ, ਜਿਸ ਦੀ ਵਰਤੋਂ ਦੁਸ਼ਮਣ ਦੇ ਜਹਾਜ਼ਾਂ ਅਤੇ ਡਰੋਨਾਂ ਨੂੰ ਮਾਰ ਸੁੱਟਣ ਲਈ ਕੀਤੀ ਜਾਂਦੀ ਹੈ। ਇਹ ਗਨ 4 ਕਿਲੋਮੀਟਰ ਦੀ ਦੂਰੀ ਤੋਂ ਨਿਸ਼ਾਨਾ ਵਿੰਨ੍ਹਣ ਦੀ ਸਮਰੱਥਾ ਰੱਖਦੀ ਹੈ। ਇਸ ਪੂਰੀ ਪਰੇਡ ਦੀ ਅਗਵਾਈ ਅਸ਼ੋਕ ਚੱਕਰ, ਪਰਮਵੀਰ ਚੱਕਰ ਅਤੇ ਮਹਾਵੀਰ ਚੱਕਰ ਨਾਲ ਸਨਮਾਨਿਤ ਫੌਜੀ ਅਧਿਕਾਰੀਆਂ ਨੇ ਕੀਤੀ।