ਟਾਟਾ ਕੰਸਲਟੈਂਸੀ ਸਰਵਿਸਿਜ਼ (ਟੀ. ਸੀ. ਐੱਸ.) ਦੇ ਚੇਅਰਮੈਨ ਐੱਨ. ਚੰਦਰਸ਼ੇਖਰਨ ਨੇ ਕਿਹਾ ਕਿ ਅਜਿਹਾ ਸਮਾਂ ਦੂਰ ਨਹੀਂ ਜਦੋਂ ਟੀ. ਸੀ. ਐੱਸ. ਕੋਲ ਕਰਮਚਾਰੀਆਂ ਦੀ ਗਿਣਤੀ ਦੇ ਬਰਾਬਰ ਏ. ਆਈ. ਏਜੰਟ ਹੋਣਗੇ। ਕੰਪਨੀ ਦੀ 31ਵੀਂ ਸਾਲਾਨਾ ਆਮ ਮੀਟਿੰਗ ’ਚ ਉਨ੍ਹਾਂ ਸਪੱਸ਼ਟ ਕੀਤਾ ਕਿ ਟੀ. ਸੀ. ਐੱਸ. ਕਰਮਚਾਰੀਆਂ ਦੀ ਗਿਣਤੀ ਘਟਾਉਣ ਦੀ ਯੋਜਨਾ ਨਹੀਂ ਬਣਾ ਰਹੀ, ਸਗੋਂ ਸਹੀ ਹੁਨਰਮੰਦਾਂ ਦੀ ਭਰਤੀ ਜਾਰੀ ਰੱਖੇਗੀ।
ਚੰਦਰਸ਼ੇਖਰਨ ਅਨੁਸਾਰ ਕੰਪਨੀ ਅੰਦਰੂਨੀ ਸੰਚਾਲਨ, ਹੱਲ ਵਿਕਾਸ ਅਤੇ ਗਾਹਕ-ਵਿਸ਼ੇਸ਼ ਕਾਰਜਾਂ ਲਈ ਏ. ਆਈ. ਏਜੰਟ ਬਣਾਉਣ ’ਚ ਨਿਵੇਸ਼ ਕਰ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਭਵਿੱਖ ’ਚ ਮਨੁੱਖੀ ਕਰਮਚਾਰੀ ਅਤੇ ਏ. ਆਈ. ਏਜੰਟ ਮਿਲ ਕੇ ਕੰਮ ਕਰਨਗੇ ਅਤੇ ਇਸ ਨਾਲ ਨਵੇਂ ਰੋਜ਼ਗਾਰ ਦੇ ਮੌਕੇ ਪੈਦਾ ਹੋਣਗੇ, ਹਾਲਾਂਕਿ ਵੱਡੇ ਪੱਧਰ ’ਤੇ ਭਰਤੀ ਦੀ ਰਵਾਇਤੀ ਰਫ਼ਤਾਰ ਨਹੀਂ ਰਹੇਗੀ।
ਉਨ੍ਹਾਂ ਦੱਸਿਆ ਕਿ ਪਿਛਲੀ ਤਿਮਾਹੀ ’ਚ ਕੰਪਨੀ ਦਾ ਏ. ਆਈ.-ਸਬੰਧਤ ਮਾਲੀਆ ਸਾਲਾਨਾ ਆਧਾਰ ’ਤੇ ਲੱਗਭਗ 2.5 ਅਰਬ ਡਾਲਰ ਤੱਕ ਪਹੁੰਚ ਗਿਆ। ਮਾਲੀ ਸਾਲ 2025-26 ’ਚ ਟੀ. ਸੀ. ਐੱਸ. ਦੀ ਕਰਮਚਾਰੀ ਗਿਣਤੀ 23,460 ਘਟ ਕੇ ਲੱਗਭਗ 5. 84 ਲੱਖ ਰਹਿ ਗਈ ਹੈ।