ਸ਼੍ਰੀਹਰੀਕੋਟਾ : ਭਾਰਤੀ ਪੁਲਾੜ ਖੋਜ ਸੰਗਠਨ (ਇਸਰੋ) ਦਾ 4,000 ਕਿਲੋਗ੍ਰਾਮ ਤੋਂ ਵੱਧ ਭਾਰ ਵਾਲਾ ਸੰਚਾਰ ਸੈਟੇਲਾਈਟ ਸੀ. ਐੱਮ. ਐੱਸ.-03 ਐਤਵਾਰ ਯਾਨੀ ਅੱਜ ਸ਼ਾਮ 5.26 ਵਜੇ ਇਸ ਪੁਲਾੜ ਕੇਂਦਰ ਤੋਂ ਲਾਂਚ ਕਰ ਦਿੱਤਾ ਗਿਆ। ਪੁਲਾੜ ਏਜੰਸੀ ਨੇ ਦੱਸਿਆ ਕਿ ਲੱਗਭਗ 4,410 ਕਿਲੋਗ੍ਰਾਮ ਭਾਰ ਵਾਲਾ ਇਹ ਸੈਟੇਲਾਈਟ ਭਾਰਤ ਦੀ ਧਰਤੀ ਤੋਂ ਜੀਓਸਿੰਕ੍ਰੋਨਸ ਟਰਾਂਸਫਰ ਆਰਬਿਟ (ਜੀ. ਟੀ. ਓ.) ’ਚ ਲਾਂਚ ਕੀਤਾ ਜਾਣ ਵਾਲਾ ਸਭ ਤੋਂ ਭਾਰਾ ਸੈਟੇਲਾਈਟ ਹੈ।
ਸੀ. ਐੱਮ. ਐੱਸ.-03 (ਜੀਸੈੱਟ-7 ਆਰ.) ਸੈਟੇਲਾਈਟ ਦੇ ਨਾਲ ਨੇਵੀ ਨੂੰ ਰੀਅਲ ਟਾਈਮ ਕਮਿਊਨੀਕੇਸ਼ਨ, ਨਿਗਰਾਨੀ ਤੇ ਰਣਨੀਤਿਕ ਕੰਟਰੋਲ ’ਚ ਕ੍ਰਾਂਤੀਕਾਰੀ ਤਬਦੀਲੀ ਦਾ ਲਾਭ ਮਿਲੇਗਾ ਅਤੇ ਉਸ ਦੀ ਤਾਕਤ ਵਧੇਗੀ। ਇਹ ਸੈਟੇਲਾਈਟ ਐੱਲ. ਵੀ. ਐੱਮ. 3-ਐੱਮ. 5 ਰਾਕੇਟ ਰਾਹੀਂ ਲਾਂਚ ਕੀਤਾ ਜਾਵੇਗਾ, ਜਿਸ ਨੂੰ ਇਸ ਦੀ ਭਾਰ ਚੁੱਕਣ ਦੀ ਵੱਡੀ ਸਮਰੱਥਾ ਕਾਰਨ ‘ਬਾਹੂਬਲੀ’ ਨਾਂ ਦਿੱਤਾ ਗਿਆ ਹੈ।
ਇਸਰੋ ਨੇ ਦੱਸਿਆ ਕਿ 4,000 ਕਿਲੋਗ੍ਰਾਮ ਤਕ ਭਾਰੀ ਪੇਲੋਡ ਲਿਜਾਣ ਦੀ ਸਮਰੱਥਾ ਕਾਰਨ ‘ਬਾਹੂਬਲੀ’ ਨਾਂ ਨਾਲ ਜਾਣਿਆ ਜਾਣ ਵਾਲਾ 43.5 ਮੀਟਰ ਲੰਮਾ ਇਹ ਵਾਹਨ 2 ਨਵੰਬਰ ਨੂੰ ਸ਼ਾਮ 5.26 ਵਜੇ ’ਤੇ ਲਾਂਚ ਹੋਇਆ। ਐੱਲ. ਵੀ. ਐੱਮ.-3 ਨੂੰ ਇਸਰੋ ਦੇ ਵਿਗਿਆਨੀ ਜੀਓਸਿੰਕ੍ਰੋਨਸ ਸੈਟੇਲਾਈਟ ਲਾਂਚ ਵਹੀਕਲ (ਜੀ. ਐੱਸ. ਐੱਲ. ਵੀ.) ਐੱਮ. ਕੇ. 3 ਵੀ ਕਹਿੰਦੇ ਹਨ।
ਇਸਰੋ ਨੇ ਕਿਹਾ ਹੈ ਕਿ ਐੱਲ. ਵੀ. ਐੱਮ. 3-ਐੱਮ. 5 ਪੰਜਵੀਂ ਮੁਹਿੰਮ ਉਡਾਣ ਹੈ। ਐਤਵਾਰ ਦੇ ਮਿਸ਼ਨ ਦਾ ਮਨੋਰਥ ਇਹ ਹੈ ਕਿ ਮਲਟੀ ਬੈਂਡ ਸੰਚਾਰ ਉਪਗ੍ਰਹਿ ਸੀ. ਐੱਮ. ਐੱਸ.-03 ਭਾਰਤੀ ਇਲਾਕੇ ਸਮੇਤ ਇਕ ਵਿਸਤ੍ਰਿਤ ਸਮੁੰਦਰੀ ਖੇਤਰ ’ਚ ਸੇਵਾਵਾਂ ਮੁਹੱਈਆ ਕਰਵਾਏਗਾ। ਐੱਲ. ਵੀ. ਐੱਮ.-3 ਰਾਕੇਟ ਨੇ ਇਸ ਤੋਂ ਪਹਿਲਾਂ ਚੰਦਰਯਾਨ-3 ਦੀ ਸਫਲ ਲਾਂਚਿੰਗ ਕੀਤੀ ਸੀ, ਜਿਸ ਦੇ ਰਾਹੀਂ ਭਾਰਤ 2023 ’ਚ ਚੰਨ ਦੇ ਦੱਖਣੀ ਧਰੁਵ ਦੇ ਨੇੜੇ ਸਫਲ ਢੰਗ ਨਾਲ ਉਤਰਨ ਵਾਲਾ ਪਹਿਲਾ ਦੇਸ਼ ਬਣ ਗਿਆ।