ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਦੀ ਕਪਤਾਨ ਅਤੇ ਵਰਲਡ ਕੱਪ ਜੇਤੂ ਹਰਮਨਪ੍ਰੀਤ ਕੌਰ ਨੂੰ ਪੰਜਾਬ ਨੈਸ਼ਨਲ ਬੈਂਕ (PNB) ਨੇ ਆਪਣੀ ਪਹਿਲੀ ਮਹਿਲਾ ਬ੍ਰਾਂਡ ਅੰਬੈਸਡਰ ਬਣਾਇਆ ਹੈ। ਬੈਂਕ ਨੇ ਇਹ ਐਲਾਨ ਆਪਣੇ ਕਾਰਪੋਰੇਟ ਦਫਤਰ ਵਿੱਚ ‘ਬੈਂਕਿੰਗ ਆਨ ਚੈਂਪੀਅਨਜ਼’ ਥੀਮ ਦੇ ਤਹਿਤ ਇੱਕ ਸ਼ਾਨਦਾਰ ਸਮਾਰੋਹ ਵਿੱਚ ਕੀਤਾ, ਜਿਸ ਨੂੰ PNB ਦੀ ਬ੍ਰਾਂਡ ਬਦਲਾਅ ਦੀ ਯਾਤਰਾ ਵਿੱਚ ਇੱਕ ਮਹੱਤਵਪੂਰਨ ਪੜਾਅ ਮੰਨਿਆ ਜਾ ਰਿਹਾ ਹੈ।
ਇਸ ਮੌਕੇ 'ਤੇ, ਹਰਮਨਪ੍ਰੀਤ ਕੌਰ ਨੇ ਬੈਂਕ ਦੇ ਚਾਰ ਨਵੇਂ ਉਤਪਾਦ ਵੀ ਲਾਂਚ ਕੀਤੇ। ਇਸ ਸਮਾਰੋਹ ਵਿੱਚ PNB ਦੇ MD&CEO ਅਸ਼ੋਕ ਚੰਦਰਾ ਅਤੇ ਹੋਰ ਸੀਨੀਅਰ ਲੀਡਰਸ਼ਿਪ ਸ਼ਾਮਲ ਸੀ।
4 ਨਵੇਂ ਵਿੱਤੀ ਪ੍ਰੋਡਕਟ ਲਾਂਚ ਕੀਤੇ
ਵਰਲਡ ਚੈਂਪੀਅਨ ਕੌਰ ਨੇ PNB RuPay ਮੈਟਲ ਕ੍ਰੈਡਿਟ ਕਾਰਡ 'Luxura' ਵੀ ਲਾਂਚ ਕੀਤਾ। ਇਹ Luxura ਕਾਰਡ PNB ਦਾ ਇੱਕ ਪ੍ਰੀਮੀਅਮ ਕ੍ਰੈਡਿਟ ਕਾਰਡ ਹੈ। ਹਰਮਨ ਇਸ ਕ੍ਰੈਡਿਟ ਕਾਰਡ ਦੀ ਪਹਿਲੀ ਗਾਹਕ ਵੀ ਬਣੀ।
PNB ਦੇ MD&CEO ਅਸ਼ੋਕ ਚੰਦਰਾ ਦੇ ਨਾਲ ਮਿਲ ਕੇ, ਹਰਮਨਪ੍ਰੀਤ ਕੌਰ ਨੇ ਕੁੱਲ ਚਾਰ ਵਿੱਤੀ ਉਤਪਾਦ ਲਾਂਚ ਕੀਤੇ: PNB RuPay ਮੈਟਲ ਕ੍ਰੈਡਿਟ ਕਾਰਡ Luxura, PNB One 2.0, Digi Surya Ghar, ਅਤੇ IIBX ਪੋਰਟਲ 'ਤੇ PNB ਦੀ ਆਨਬੋਰਡਿੰਗ। ਬੈਂਕ ਅਨੁਸਾਰ, ਇਹ ਲਾਂਚ ਨਵੀਨਤਾ, ਡਿਜੀਟਲ-ਪਹਿਲੀਆਂ ਸੇਵਾਵਾਂ, ਅਤੇ ਗਾਹਕ-ਕੇਂਦ੍ਰਿਤ ਹੱਲਾਂ ਪ੍ਰਤੀ PNB ਦੀ ਵਚਨਬੱਧਤਾ ਨੂੰ ਹੋਰ ਮਜ਼ਬੂਤ ਕਰੇਗਾ।
ਮੋਗਾ ਬ੍ਰਾਂਚ ਨਾਲ ਪੁਰਾਣਾ ਨਾਤਾ
ਬ੍ਰਾਂਡ ਅੰਬੈਸਡਰ ਬਣਨ 'ਤੇ ਹਰਮਨਪ੍ਰੀਤ ਕੌਰ ਨੇ ਆਪਣੀ ਖੁਸ਼ੀ ਜ਼ਾਹਰ ਕਰਦਿਆਂ ਕਿਹਾ ਕਿ ਉਹ 18 ਸਾਲ ਦੀ ਉਮਰ ਤੋਂ PNB ਦਾ ਬੈਂਕ ਖਾਤਾ ਚਲਾ ਰਹੀ ਹੈ, ਜਿਸਦੀ ਸ਼ੁਰੂਆਤ PNB ਦੀ ਮੋਗਾ ਬ੍ਰਾਂਚ ਵਿੱਚ ਹੋਈ ਸੀ। ਕੌਰ ਨੇ ਕਿਹਾ ਕਿ ਅੱਜ ਬੈਂਕ ਦੀ ਬ੍ਰਾਂਡ ਅੰਬੈਸਡਰ ਵਜੋਂ ਇੱਥੇ ਖੜ੍ਹੇ ਹੋਣਾ ਉਨ੍ਹਾਂ ਲਈ ਸਨਮਾਨ ਦੀ ਗੱਲ ਹੈ। ਉਨ੍ਹਾਂ ਨੂੰ PNB ਦੀ ਲੋਕਾਂ, ਖਾਸ ਕਰਕੇ ਔਰਤਾਂ ਅਤੇ ਨੌਜਵਾਨ ਪ੍ਰਤਿਭਾ ਨੂੰ ਮਜ਼ਬੂਤ ਕਰਨ ਦੀ ਵਚਨਬੱਧਤਾ ਨੇ ਬਹੁਤ ਪ੍ਰਭਾਵਿਤ ਕੀਤਾ ਹੈ।
ਜ਼ਿਕਰਯੋਗ ਹੈ ਕਿ ਹਰਮਨਪ੍ਰੀਤ ਕੌਰ ਦੀ ਅਗਵਾਈ ਹੇਠ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਨੇ ਬੀਤੇ 2 ਨਵੰਬਰ 2025 ਨੂੰ ਦੱਖਣੀ ਅਫਰੀਕਾ ਨੂੰ ਫਾਈਨਲ ਵਿੱਚ ਹਰਾ ਕੇ ਵਰਲਡ ਕੱਪ ਆਪਣੇ ਨਾਮ ਕੀਤਾ ਸੀ। ਬੈਂਕ ਨੇ ਕੌਰ ਨੂੰ ਸਨਮਾਨ ਵਜੋਂ ਉਨ੍ਹਾਂ ਦੇ ਨਾਮ ਅਤੇ ਨੰਬਰ ਵਾਲੀ ਇੱਕ ਫਰੇਮ ਕੀਤੀ ਹੋਈ PNB ਜਰਸੀ ਅਤੇ ਇੱਕ ਕਸਟਮ-ਐਨਗ੍ਰੇਵਡ PNB ਬੈਟ ਵੀ ਭੇਂਟ ਕੀਤਾ।