ਮੌਜੂਦਾ ਵਿੱਤੀ ਸਾਲ (2026-27) ਦੇ ਪਹਿਲੇ ਪੰਜ ਮਹੀਨਿਆਂ (ਅਪ੍ਰੈਲ ਤੋਂ ਅਗਸਤ) 'ਚ, ਐਪਲ ਨੇ ਭਾਰਤ ਤੋਂ ਲਗਭਗ $13.2 ਬਿਲੀਅਨ ਦੇ ਆਈਫੋਨ ਬਰਾਮਦ ਕੀਤੇ। ਇਹ ਪਿਛਲੇ ਸਾਲ ਦੀ ਇਸੇ ਮਿਆਦ ਦੇ ਮੁਕਾਬਲੇ 47% ਵਾਧਾ ਦਰਸਾਉਂਦਾ ਹੈ। ਇਸ ਪ੍ਰਭਾਵਸ਼ਾਲੀ ਪ੍ਰਦਰਸ਼ਨ ਦੇ ਨਾਲ, ਦੇਸ਼ ਦੇ ਕੁੱਲ ਇਲੈਕਟ੍ਰਾਨਿਕਸ ਸ਼ਿਪਮੈਂਟ ਦਾ ਲਗਭਗ ਅੱਧਾ ਹਿੱਸਾ ਇਕੱਲੇ ਐਪਲ ਦਾ ਸੀ, ਜਦੋਂ ਕਿ ਆਈਫੋਨਜ਼ ਨੇ ਕੁੱਲ ਸਮਾਰਟਫੋਨ ਨਿਰਯਾਤ ਦਾ 82% ਹਿੱਸਾ ਬਣਾਇਆ।
ਇਕ ਨਿਊਜ਼ ਏਜੰਸੀ ਦੇ ਅੰਕੜਿਆਂ ਅਨੁਸਾਰ, ਅਪ੍ਰੈਲ-ਅਗਸਤ ਦੀ ਮਿਆਦ ਦੌਰਾਨ ਭਾਰਤ ਦੇ ਕੁੱਲ ਸਮਾਰਟਫੋਨ ਨਿਰਯਾਤ 'ਚ ਪਿਛਲੇ ਸਾਲ ਦੇ ਮੁਕਾਬਲੇ 36% ਦਾ ਵਾਧਾ ਹੋਇਆ ਹੈ, ਜੋ ਕਿ $15.96 ਬਿਲੀਅਨ ਤੱਕ ਪਹੁੰਚ ਗਿਆ ਹੈ। ਇਸ ਵਾਧੇ 'ਚ ਇਕੱਲੇ ਆਈਫੋਨ ਨੇ ਬੇਮਿਸਾਲ 98% ਯੋਗਦਾਨ ਪਾਇਆ। ਇਸ ਦੌਰਾਨ, ਭਾਰਤ ਦਾ ਕੁੱਲ ਇਲੈਕਟ੍ਰਾਨਿਕਸ ਨਿਰਯਾਤ 34% ਵਧ ਕੇ $26.66 ਬਿਲੀਅਨ ਹੋ ਗਿਆ। ਇਕ ਸਰਕਾਰੀ ਅਧਿਕਾਰੀ ਨੇ ਦੱਸਿਆ ਕਿ ਸਮਾਰਟਫੋਨ ਹੁਣ ਭਾਰਤ ਦੀ ਨੰਬਰ ਇੱਕ ਨਿਰਯਾਤ ਵਸਤੂ ਬਣ ਗਏ ਹਨ। ਪਿਛਲੇ ਪੰਜ ਮਹੀਨਿਆਂ 'ਚ ਇਸਦੀ ਬਰਾਮਦ ਆਟੋਮੋਟਿਵ ਡੀਜ਼ਲ ਨਾਲੋਂ 21% ਵੱਧ ਰਹੀ ਹੈ।
ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਸ ਸਾਲ ਅਪ੍ਰੈਲ 'ਚ ਸ਼ੁਰੂ ਕੀਤੀ ਗਈ ਸਰਕਾਰ ਦੀ ਨਵੀਂ 'ਮੋਬਾਈਲ ਫੋਨ ਨਿਰਮਾਣ ਯੋਜਨਾ' (ਜਿਸਨੇ ਪੁਰਾਣੀ PLI ਯੋਜਨਾ ਦੀ ਥਾਂ ਲਈ) ਨੇ ਐਪਲ ਦੇ ਰਿਕਾਰਡ ਪ੍ਰਦਰਸ਼ਨ ਨੂੰ ਹੁਲਾਰਾ ਦਿੱਤਾ ਹੈ। ਹਾਲਾਂਕਿ ਐਪਲ ਨੇ ਅਧਿਕਾਰਤ ਤੌਰ 'ਤੇ ਕੋਈ ਟਿੱਪਣੀ ਨਹੀਂ ਕੀਤੀ ਹੈ, ਪਰ ਸੂਤਰਾਂ ਦਾ ਕਹਿਣਾ ਹੈ ਕਿ ਸੈਮਸੰਗ ਅਤੇ ਡਿਕਸਨ/ਮੋਟੋਰੋਲਾ ਵਰਗੀਆਂ ਕੰਪਨੀਆਂ ਨੇ ਵੀ ਦੇਸ਼ ਦੇ ਸਮਾਰਟਫੋਨ ਨਿਰਯਾਤ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ ਹੈ।