ਜਲੰਧਰ : ਪੰਜਾਬੀ ਸਿਨੇਮਾ ਵਿਚ ਇਸ ਵੇਲੇ ਜਿਸ ਫਿਲਮ ਦੀ ਸਭ ਤੋਂ ਵੱਧ ਚਰਚਾ ਹੋ ਰਹੀ ਹੈ, ਉਹ ਹੈ ‘ਇਸ਼ਕਨਾਮਾ’। ਫ਼ਿਲਮ ਦਾ ਨਾਂ ਸਾਹਮਣੇ ਆਉਣ ਤੋਂ ਬਾਅਦ ਹੀ ਦਰਸ਼ਕਾਂ ਵਿਚ ਇਸ ਨੂੰ ਲੈ ਕੇ ਭਾਰੀ ਉਤਸੁਕਤਾ ਬਣੀ ਹੋਈ ਹੈ। ਇਸ ਦੀ ਇਕ ਵੱਡੀ ਵਜ੍ਹਾ ਹੈ ਪਹਿਲੀ ਵਾਰ ਵੱਡੇ ਪਰਦੇ ’ਤੇ ਇਕੱਠੇ ਨਜ਼ਰ ਆ ਰਹੀ ਜੈ ਰੰਧਾਵਾ ਅਤੇ ਸ਼ਹਿਨਾਜ਼ ਗਿੱਲ ਦੀ ਨਵੀਂ ਜੋੜੀ। ਦੋਵੇਂ ਕਲਾਕਾਰ ਆਪਣੀ ਵੱਖਰੀ ਅਦਾਕਾਰੀ ਅਤੇ ਮਜ਼ਬੂਤ ਪ੍ਰਸ਼ੰਸਕ ਵਰਗ ਲਈ ਜਾਣੇ ਜਾਂਦੇ ਹਨ, ਜਿਸ ਕਾਰਨ ਇਹ ਜੋੜੀ ਪਹਿਲਾਂ ਹੀ ਮਨੋਰੰਜਨ ਜਗਤ ਵਿਚ ਚਰਚਾ ਦਾ ਕੇਂਦਰ ਬਣ ਚੁੱਕੀ ਹੈ।
ਫਿਲਮ ਨੂੰ ਲੈ ਕੇ ਇਕ ਹੋਰ ਖ਼ਾਸ ਗੱਲ ਇਹ ਵੀ ਸਾਹਮਣੇ ਆ ਰਹੀ ਹੈ ਕਿ ‘ਇਸ਼ਕਨਾਮਾ’ ਦੀ ਕਹਾਣੀ ਨਿਰਮਲ ਨਿੰਮਾ ਅਤੇ ਨਸੀਮਾ ਦੀ ਪ੍ਰੇਮ ਕਹਾਣੀ ਤੋਂ ਪ੍ਰੇਰਿਤ ਦੱਸੀ ਜਾ ਰਹੀ ਹੈ। ਦੋ ਵੱਖ-ਵੱਖ ਪਿਛੋਕੜਾਂ ਨਾਲ ਸਬੰਧਤ ਦੋ ਲੋਕਾਂ ਦੇ ਪਿਆਰ, ਸੰਘਰਸ਼, ਕੁਰਬਾਨੀ ਅਤੇ ਭਾਵਨਾਵਾਂ ਨੂੰ ਇਸ ਕਹਾਣੀ ਰਾਹੀਂ ਪਰਦੇ ’ਤੇ ਪੇਸ਼ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਹੈ। ਇਹੀ ਕਾਰਨ ਹੈ ਕਿ ਦਰਸ਼ਕ ਇਸ ਨੂੰ ਸਿਰਫ਼ ਇਕ ਰੋਮਾਂਟਿਕ ਫ਼ਿਲਮ ਨਹੀਂ, ਸਗੋਂ ਜਜ਼ਬਾਤਾਂ ਨਾਲ ਭਰੀ ਇਕ ਵੱਖਰੀ ਤੇ ਨਵੀਂ ਪ੍ਰੇਮ ਕਹਾਣੀ ਵਜੋਂ ਦੇਖ ਰਹੇ ਹਨ।
ਜੈ ਰੰਧਾਵਾ ਨੇ ਪੰਜਾਬੀ ਸਿਨੇਮਾ ਵਿਚ ਆਪਣੇ ਐਕਸ਼ਨ ਅਤੇ ਗੰਭੀਰ ਕਿਰਦਾਰਾਂ ਨਾਲ ਵੱਖਰੀ ਪਛਾਣ ਬਣਾਈ ਹੈ। ਉਨ੍ਹਾਂ ਦੀ ਦਮਦਾਰ ਸ਼ਖਸੀਅਤ ਅਤੇ ਕੁਦਰਤੀ ਅਦਾਕਾਰੀ ਨੂੰ ਹਮੇਸ਼ਾ ਹੀ ਦਰਸ਼ਕਾਂ ਨੇ ਪਸੰਦ ਕੀਤਾ ਹੈ। ਸੋਸ਼ਲ ਮੀਡੀਆ ’ਤੇ ਵੀ ਦੋਵਾਂ ਦੀ ਜੋੜੀ ਨੂੰ ਲੈ ਕੇ ਲਗਾਤਾਰ ਚਰਚਾ ਹੋ ਰਹੀ ਹੈ ਅਤੇ ਪ੍ਰਸ਼ੰਸਕ ਫ਼ਿਲਮ ਦੀ ਹਰ ਨਵੀਂ ਝਲਕ ਦਾ ਬੇਸਬਰੀ ਨਾਲ ਇੰਤਜ਼ਾਰ ਕਰ ਰਹੇ ਹਨ।
ਫ਼ਿਲਮ ਦਾ ਪਹਿਲਾ ਗੀਤ ‘ਨਰਕ’ ਪਹਿਲਾਂ ਹੀ ਰਿਲੀਜ਼ ਹੋ ਚੁੱਕਾ ਹੈ, ਜਿਸ ਨੂੰ ਬੀ ਪ੍ਰਾਕ ਅਤੇ ਜੋਤਿਕਾ ਤਾਂਗਰੀ ਨੇ ਆਪਣੀ ਸੁਰੀਲੀ ਆਵਾਜ਼ ਨਾਲ ਸਜਾਇਆ ਹੈ। ਸਾਹਮਣੇ ਆਈਆਂ ਝਲਕਾਂ ਤੋਂ ਇਹ ਸੰਕੇਤ ਮਿਲਦੇ ਹਨ ਕਿ ‘ਇਸ਼ਕਨਾਮਾ’ ਸਿਰਫ਼ ਦੋ ਦਿਲਾਂ ਦੀ ਮੁਹੱਬਤ ਦੀ ਕਹਾਣੀ ਨਹੀਂ, ਸਗੋਂ ਸਮਾਜਿਕ ਹਾਲਾਤ, ਪਰਿਵਾਰਕ ਰਿਸ਼ਤਿਆਂ, ਵਿਸ਼ਵਾਸ ਅਤੇ ਕੁਰਬਾਨੀ ਨੂੰ ਵੀ ਬਹੁਤ ਹੀ ਸੰਵੇਦਨਸ਼ੀਲ ਢੰਗ ਨਾਲ ਪੇਸ਼ ਕਰੇਗੀ। ਫ਼ਿਲਹਾਲ ‘ਇਸ਼ਕਨਾਮਾ’ ਪੰਜਾਬੀ ਸਿਨੇਮਾ ਦੀਆਂ ਸਭ ਤੋਂ ਵੱਧ ਉਡੀਕੀਆਂ ਜਾਣ ਵਾਲੀਆਂ ਫ਼ਿਲਮਾਂ ਵਿਚ ਸ਼ਾਮਲ ਹੈ।