ਨਵੀਂ ਦਿੱਲੀ : ਸੋਨਾਲੀਕਾ ਟਰੈਕਟਰਸ ਨੇ ਮਾਲੀ ਸਾਲ 2027 ਦੀ ਪਹਿਲੀ ਤਿਮਾਹੀ ਦਾ ਰਿਕਾਰਡ ਤੋੜ ਪ੍ਰਦਰਸ਼ਨ ਨਾਲ ਖਤਮ ਕੀਤਾ ਹੈ ਅਤੇ ਸਿਰਫ਼ 3 ਮਹੀਨਿਆਂ ’ਚ 50,000 ਤੋਂ ਵੱਧ ਟਰੈਕਟਰਾਂ ਨੂੰ ਵੇਚਦੇ ਹੋਏ ਨਵਾਂ ਕੀਰਤੀਮਾਨ ਸਥਾਪਤ ਕੀਤਾ ਹੈ।
ਇਸ ਦੇ ਨਾਲ ਹੀ ਕੰਪਨੀ ਨੇ ਪਹਿਲੀ ਤਿਮਾਹੀ ਦੀ ਆਪਣੀ ਹੁਣ ਤੱਕ ਦੀ ਸਭ ਤੋਂ ਵੱਧ 53,661 ਟਰੈਕਟਰਾਂ ਦੀ ਵਿਕਰੀ ਨਾਲ 23.1 ਫੀਸਦੀ ਦਾ ਜ਼ਬਰਦਸਤ ਵਾਧਾ ਹਾਸਲ ਕੀਤਾ ਹੈ। ਉਦਯੋਗ ਦੇ ਪ੍ਰਦਰਸ਼ਨ (ਅੰਦਾਜ਼ਨ 18.3 ਫੀਸਦੀ) ਨੂੰ ਪਿੱਛੇ ਛੱਡਦੇ ਹੋਏ ਸੋਨਾਲੀਕਾ ਅਪ੍ਰੈਲ-ਜੂਨ 2026 ਦੌਰਾਨ ਘਰੇਲੂ ਬਾਜ਼ਾਰ ’ਚ ਸਭ ਤੋਂ ਜ਼ਿਆਦਾ ਮਾਰਕੀਟ ਸ਼ੇਅਰ ’ਚ ਵਾਧਾ ਹਾਸਲ ਕਰਨ ਵਾਲੀ ਕੰਪਨੀ ਵੀ ਬਣ ਗਈ ਹੈ। ਨਵੀਂ ਪ੍ਰਾਪਤੀ ’ਤੇ ਆਪਣੇ ਵਿਚਾਰ ਰੱਖਦੇ ਹੋਏ ਕੰਪਨੀ ਦੇ ਜੁਆਇੰਟ ਮੈਨੇਜਿੰਗ ਡਾਇਰੈਕਟਰ ਰਮਨ ਮਿੱਤਲ ਨੇ ਕਿਹਾ, ‘‘ਸਾਨੂੰ ਮਾਣ ਹੈ ਕਿ ਅਸੀਂ 3 ਮਹੀਨਿਆਂ ’ਚ 50,000 ਟਰੈਕਟਰਾਂ ਦੀ ਵਿਕਰੀ ਦਾ ਅੰਕੜਾ ਪਾਰ ਕਰ ਲਿਆ ਹੈ।’’