ਸਾਉਣੀ ਦੀਆਂ ਫਸਲਾਂ ਲਈ ਬੀਜਾਂ ਦਾ ਭਰਪੂਰ ਭੰਡਾਰ, ਚੁਣੌਤੀ ਹੁਣ ਸਮੇਂ ਸਿਰ ਕਿਸਾਨਾਂ ਤੱਕ ਪਹੁੰਚਾਉਣ ਦੀ

ਦੇਸ਼ ਦੀਆਂ ਨਿੱਜੀ ਬੀਜ ਕੰਪਨੀਆਂ ਨੇ ਸਾਉਣੀ ਦੇ ਫਸਲ ਸੀਜ਼ਨ ਲਈ ਇਸ ਵਾਰ ਆਮ ਨਾਲੋਂ ਵੱਧ ਤਿਆਰੀ ਕੀਤੀ ਹੈ। ਕੰਪਨੀਆਂ ਕੋਲ 20 ਤੋਂ 30 ਫੀਸਦੀ ਵਾਧੂ ਬੀਜ ਭੰਡਾਰ ਉਪਲੱਬਧ ਹੈ ਪਰ ਅਲ-ਨੀਨੋ ਕਾਰਨ ਮਾਨਸੂਨ ’ਚ ਸੰਭਾਵਿਤ ਦੇਰੀ ਅਤੇ ਕਮਜ਼ੋਰ ਬਾਰਿਸ਼ ਵਿਚਾਲੇ ਲੋੜਵੰਦ ਖੇਤਰਾਂ ਤੱਕ ਸਮੇਂ ਸਿਰ ਬੀਜ ਪਹੁੰਚਾਉਣਾ ਸਭ ਤੋਂ ਵੱਡੀ ਚੁਣੌਤੀ ਮੰਨਿਆ ਜਾ ਰਿਹਾ ਹੈ।

ਫੈੱਡਰੇਸ਼ਨ ਆਫ ਸੀਡ ਇੰਡਸਟਰੀ ਆਫ ਇੰਡੀਆ (ਐੱਫ. ਐੱਸ. ਆਈ. ਆਈ.) ਦੇ ਚੇਅਰਮੈਨ ਅਜੇ ਰਾਣਾ ਨੇ ਦੱਸਿਆ ਕਿ ਮੱਕੀ, ਝੋਨਾ ਅਤੇ ਮੋਟੇ ਅਨਾਜ (ਮਿਲੇਟਸ) ਦੇ ਰਿਕਾਰਡ ਬੀਜ ਉਤਪਾਦਨ ਕਾਰਨ ਇਸ ਸਾਲ ਉਦਯੋਗ ਪੂਰੀ ਤਰ੍ਹਾਂ ਤਿਆਰ ਹੈ। ਉਨ੍ਹਾਂ ਕਿਹਾ ਕਿ ਆਮ ਤੌਰ ’ਤੇ ਕੰਪਨੀਆਂ 15 ਤੋਂ 20 ਫੀਸਦੀ ਬਫਰ ਸਟਾਕ ਰੱਖਦੀਆਂ ਹਨ ਪਰ ਇਸ ਵਾਰ ਬਿਹਤਰ ਉਤਪਾਦਨ ਦੌਰਾਨ ਕਈ ਕੰਪਨੀਆਂ ਕੋਲ 20 ਤੋਂ 30 ਫੀਸਦੀ ਤੱਕ ਵਾਧੂ ਬੀਜ ਉਪਲੱਬਧ ਹੈ।

ਹਾਲ ਹੀ ’ਚ ਇਕ ਹਜ਼ਾਰ ਕਿਸਾਨਾਂ ’ਤੇ ਕੀਤੇ ਸਰਵੇਖਣ ਅਨੁਸਾਰ 75 ਫੀਸਦੀ ਕਿਸਾਨ ਪਹਿਲਾਂ ਹੀ ਬੀਜ ਖਰੀਦ ਚੁੱਕੇ ਹਨ, ਜਦੋਂਕਿ 25 ਫੀਸਦੀ ਕਿਸਾਨ ਮਾਨਸੂਨ ਦੀ ਸ਼ੁਰੂਆਤ ਦਾ ਇੰਤਜ਼ਾਰ ਕਰ ਰਹੇ ਹਨ। ਅਜਿਹੇ ’ਚ ਬਿਜਾਈ ਦੀ ਮਿਆਦ ਖਤਮ ਹੋਣ ਤੋਂ ਪਹਿਲਾਂ ਪ੍ਰਭਾਵਿਤ ਜ਼ਿਲਿਆਂ ਤੱਕ ਬੀਜ ਦੀ ਸਮੇਂ ਸਿਰ ਸਪਲਾਈ ਯਕੀਨੀ ਕਰਨਾ ਬੇਹੱਦ ਜ਼ਰੂਰੀ ਹੋਵੇਗਾ।

ਸਰਕਾਰੀ ਅੰਕੜਿਆਂ ਮੁਤਾਬਕ ਸਾਉਣੀ ਦੇ ਸੀਜ਼ਨ ਲਈ 192.43 ਲੱਖ ਕੁਇੰਟਲ ਪ੍ਰਮਾਣਿਤ ਬੀਜ ਉਪਲੱਬਧ ਹੈ, ਜਦੋਂਕਿ ਕੁੱਲ ਲੋੜ ਕਰੀਬ 173 ਲੱਖ ਕੁਇੰਟਲ ਹੈ। ਭਾਵ ਲੋੜ ਨਾਲੋਂ 11.2 ਫੀਸਦੀ ਵੱਧ ਬੀਜ ਉਪਲੱਬਧ ਹਨ। ਦੇਸ਼ ’ਚ ਨਿੱਜੀ ਖੇਤਰ ਇਕ ਕਰੋੜ ਤੋਂ ਵੱਧ ਕਿਸਾਨਾਂ ਤੱਕ 10 ਲੱਖ ਤੋਂ ਜ਼ਿਆਦਾ ਪ੍ਰਚੂਨ ਵਿਕ੍ਰੇਤਾਵਾਂ (ਰਿਟੇਲਰਾਂ) ਦੇ ਨੈੱਟਵਰਕ ਰਾਹੀਂ ਕਰੀਬ 70 ਫੀਸਦੀ ਬੀਜ ਦੀ ਸਪਲਾਈ ਕਰਦਾ ਹੈ।