ਰੱਖੜੀ ਤੋਂ ਪਹਿਲਾਂ ਬਾਜ਼ਾਰਾਂ ’ਚ ਖਰੀਦਦਾਰੀ ਤੇਜ਼ ਹੋ ਗਈ ਹੈ ਅਤੇ ਇਸ ਸਾਲ ਰੱਖੜੀ ਤਿਉਹਾਰ ’ਤੇ ਪੂਰੇ ਦੇਸ਼ ’ਚ ਕੁੱਲ ਕਾਰੋਬਾਰ 30,000 ਕਰੋੜ ਰੁਪਏ ਦਾ ਕਾਰੋਬਾਰ ਹੋਣ ਦਾ ਅੰਦਾਜ਼ਾ ਹੈ। ਕਨਫੈੱਡਰੇਸ਼ਨ ਆਫ ਆਲ ਇੰਡੀਆ ਟਰੇਡਰਜ਼ (ਕੈਟ) ਦੇ ਮੁਤਾਬਕ ਇਕੱਲੇ ਰੱਖੜੀਆਂ ਦਾ ਕਾਰੋਬਾਰ ਲੱਗਭਗ 25,000 ਕਰੋੜ ਰੁਪਏ ਤੱਕ ਪਹੁੰਚ ਸਕਦਾ ਹੈ। ਦਿੱਲੀ ’ਚ ਇਹ ਕਾਰੋਬਾਰ ਲੱਗਭਗ 4,000 ਕਰੋੜ ਰੁਪਏ ਰਹਿਣ ਦਾ ਅੰਦਾਜ਼ਾ ਹੈ।
28 ਅਗਸਤ ਨੂੰ ਰੱਖੜੀ ਤੋਂ ਪਹਿਲਾਂ ਦਿੱਲੀ ਦੇ ਚਾਂਦਨੀ ਚੌਕ, ਸਦਰ ਬਾਜ਼ਾਰ, ਕਰੋਲ ਬਾਗ, ਲਾਜਪਤ ਨਗਰ, ਕਮਲਾ ਨਗਰ, ਰਾਜੌਰੀ ਗਾਰਡਨ, ਗਾਂਧੀ ਨਗਰ, ਖਾਰੀ ਬਾਵਲੀ ਅਤੇ ਲਕਸ਼ਮੀ ਨਗਰ ਵਰਗੇ ਪ੍ਰਮੁੱਖ ਬਾਜ਼ਾਰਾਂ ’ਚ ਖਰੀਦਦਾਰਾਂ ਦੀ ਭੀੜ ਵਧ ਗਈ ਹੈ। ਰੱਖੜੀਆਂ ਦੇ ਨਾਲ ਮਿਠਾਈ, ਸੁੱਕੇ ਮੇਵੇ, ਕੱਪੜੇ, ਉਪਹਾਰ ਅਤੇ ਇਲੈਕਟ੍ਰਾਨਿਕ ਸਾਮਾਨ ਦੀ ਵਿਕਰੀ ਵੀ ਵਧ ਰਹੀ ਹੈ।
ਸਵਦੇਸ਼ੀ ਰੱਖੜੀਆਂ ਦਾ ਵਧਿਆ ਰੁਝਾਨ
ਕੈਟ ਦੇ ਜਨਰਲ ਸਕੱਤਰ ਪ੍ਰਵੀਨ ਖੰਡੇਲਵਾਲ ਨੇ ਕਿਹਾ ਕਿ ਪਿਛਲੇ ਕੁਝ ਸਾਲਾਂ ’ਚ ਸਵਦੇਸ਼ੀ ਅਤੇ ਸਥਾਨਕ ਉਤਪਾਦਾਂ ਨੂੰ ਲੈ ਕੇ ਗਾਹਕਾਂ ਦੇ ਰੁਝਾਨ ਤੇ ਪਸੰਦ ’ਚ ਬਦਲਾਅ ਆਇਆ ਹੈ। ਬਾਜ਼ਾਰ ’ਚ ਹੁਣ ਰਵਾਇਤੀ ਰੱਖੜੀਆਂ ਦੇ ਨਾਲ ਦੇਸ਼ਭਗਤੀ ਅਤੇ ਸਮਾਜਿਕ ਸੰਦੇਸ਼ਾਂ ਵਾਲੀਆਂ ਰੱਖੜੀਆਂ ਵੀ ਉਪਲਬਧ ਹਨ। ‘ਵਿਕਸਤ ਭਾਰਤ’, ‘ਬ੍ਰਹਮੋਸ’, ‘ਨਾਰੀ ਵੰਦਨ’ ਅਤੇ ‘ਲਖਪਤੀ ਦੀਦੀ’ ਵਰਗੇ ਵਿਸ਼ਿਆਂ ’ਤੇ ਆਧਾਰਿਤ ਰੱਖੜੀਆਂ ਵਿਸ਼ੇਸ਼ ਤੌਰ ’ਤੇ ਨੌਜਵਾਨਾਂ ਅਤੇ ਔਰਤ ਖਰੀਦਦਾਰਾਂ ਨੂੰ ਆਕਰਸ਼ਿਤ ਕਰ ਰਹੀਆਂ ਹਨ।
ਖੇਤਰੀ ਕਲਾ ਦੀ ਵੀ ਝਲਕ
ਦੇਸ਼ ਦੇ ਵੱਖ-ਵੱਖ ਹਿੱਸਿਆਂ ਦੇ ਕਾਰੀਗਰ ਆਪਣੀ ਸਥਾਨਕ ਕਲਾ ਅਤੇ ਰਵਾਇਤਾਂ ਨੂੰ ਰੱਖੜੀਆਂ ਦੇ ਡਿਜ਼ਾਈਨ ’ਚ ਸ਼ਾਮਲ ਕਰ ਰਹੇ ਹਨ। ਨਾਗਪੁਰ ਦੀ ਖਾਦੀ, ਜੈਪੁਰ ਦੀ ਸਾਂਗਾਨੇਰੀ ਕਲਾ, ਪੁਣੇ ਦੀ ਬੀਜ ਰੱਖੜੀ, ਆਸਾਮ ਦੀ ਚਾਹ-ਪੱਤੀ, ਕੋਲਕਾਤਾ ਦੀ ਜੂਟ ਅਤੇ ਬਿਹਾਰ ਦੀ ਬਾਂਸ ਅਤੇ ਮਧੂਬਨੀ ਕਲਾ ਤੋਂ ਬਣੀਆਂ ਰੱਖੜੀਆਂ ਬਾਜ਼ਾਰ ’ਚ ਉਪਲਬਧ ਹਨ।
ਕੈਟ ਅਨੁਸਾਰ ਸਵਦੇਸ਼ੀ ਰੱਖੜੀਆਂ ਦੀ ਵਧਦੀ ਮੰਗ ਨਾਲ ਮਹਿਲਾ ਉੱਦਮੀਆਂ, ਸਵੈ-ਸਹਾਇਤਾ ਸਮੂਹਾਂ ਅਤੇ ਸਥਾਨਕ ਕਾਰੀਗਰਾਂ ਨੂੰ ਵੀ ਤਿਉਹਾਰਾਂ ਦੌਰਾਨ ਰੋਜ਼ਗਾਰ ਅਤੇ ਆਮਦਨ ਦੇ ਬਿਹਤਰ ਮੌਕੇ ਮਿਲ ਰਹੇ ਹਨ।
ਖੰਡੇਲਵਾਲ ਨੇ ਵਪਾਰੀਆਂ ਅਤੇ ਖਪਤਕਾਰਾਂ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਆਉਣ ਵਾਲੇ ਸਾਰੇ ਤਿਉਹਾਰਾਂ ’ਤੇ ਭਾਰਤੀ ਉਤਪਾਦਾਂ ਨੂੰ ਤਰਜੀਹ ਦੇ ਕੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ‘ਵੋਕਲ ਫਾਰ ਲੋਕਲ’, ‘ਲੋਕਲ ਫਾਰ ਗਲੋਬਲ’ ਅਤੇ ‘ਆਤਮਨਿਰਭਰ ਭਾਰਤ’ ਦੇ ਸੰਕਲਪ ਨੂੰ ਹੋਰ ਜ਼ਿਆਦਾ ਮਜ਼ਬੂਤ ਬਣਾਉਣ।