ਵੇਦਾਂਤਾ ਸਮੂਹ ਦੇ ਆਇਰਨ ਓਰ ਮਾਈਨਿੰਗ ਅਤੇ ਸਟੀਲ ਕਾਰੋਬਾਰ ਨੇ ਪਿਛਲੇ 5 ਸਾਲਾਂ ’ਚ ਵੱਖ-ਵੱਖ ਸਥਿਰਤਾ ਅਤੇ ਵਾਤਾਵਰਣ ਸੁਰੱਖਿਆ ਪਹਿਲਕਦਮੀਆਂ ਰਾਹੀਂ ਲੱਗਭਗ 25 ਲੱਖ ਟਨ ਕਾਰਬਨ ਨਿਕਾਸੀ ਨੂੰ ਘੱਟ ਜਾਂ ਸੋਖਿਆ ਹੈ। ਵਿਸ਼ਵ ਵਾਤਾਵਰਣ ਦਿਵਸ ਮੌਕੇ ਕੰਪਨੀ ਨੇ ਘੱਟ-ਕਾਰਬਨ ਭਵਿੱਖ ਦੇ ਨਿਰਮਾਣ ਪ੍ਰਤੀ ਆਪਣੀ ਵਚਨਬੱਧਤਾ ਨੂੰ ਦੁਹਰਾਉਂਦੇ ਹੋਏ ਕਿਹਾ ਕਿ ਉਸ ਦੇ ਯਤਨ ਰਾਸ਼ਟਰੀ ਅਤੇ ਗਲੋਬਲ ਪੌਣ-ਪਾਣੀ ਟੀਚਿਆਂ ਦੇ ਅਨੁਕੂਲ ਹਨ।
ਕੰਪਨੀ ਅਨੁਸਾਰ ਸਵੱਛ ਤਕਨਾਲੋਜੀ ਅਪਣਾਉਣ, ਨਵਿਆਉਣਯੋਗ ਊਰਜਾ ਦੀ ਵਰਤੋਂ ਅਤੇ ਵਾਤਾਵਰਣ ਬਹਾਲੀ ਦੇ ਪ੍ਰੋਗਰਾਮਾਂ ਨੇ ਇਸ ਪ੍ਰਾਪਤੀ ’ਚ ਮਹੱਤਵਪੂਰਨ ਯੋਗਦਾਨ ਪਾਇਆ ਹੈ। ਇਲੈਕਟ੍ਰਿਕ ਵਾਹਨਾਂ, ਵ੍ਹੀਲ ਲੋਡਰਾਂ ਅਤੇ ਫੋਰਕਲਿਫਟਾਂ ਦੀ ਵਰਤੋਂ ਨਾਲ ਪ੍ਰਤੀ ਸਾਲ ਲੱਗਭਗ 800 ਕਿਲੋਲੀਟਰ ਡੀਜ਼ਲ ਦੀ ਬਚਤ ਹੋ ਰਹੀ ਹੈ। ਉੱਥੇ ਹੀ ਜਲ ਮਾਰਗ ਆਵਾਜਾਈ ਨੂੰ ਉਤਸ਼ਾਹਿਤ ਕਰਨ ਨਾਲ ਵਿੱਤੀ ਸਾਲ 2025-26 ’ਚ ਲੱਗਭਗ 2.1 ਲੱਖ ਟਰੱਕ ਯਾਤਰਾਵਾਂ ਦੇ ਬਰਾਬਰ ਆਵਾਜਾਈ ਘੱਟ ਹੋਈ, ਜਿਸ ਨਾਲ 1.08 ਕਰੋੜ ਲੀਟਰ ਡੀਜ਼ਲ ਦੀ ਬਚਤ ਅਤੇ ਲੱਗਭਗ 28,900 ਟਨ ਕਾਰਬਨ ਡਾਇਆਕਸਾਈਡ ਨਿਕਾਸੀ ’ਚ ਕਮੀ ਆਈ।
ਗੋਆ ਦੇ ਅਮੋਨਾ ਅਤੇ ਝਾਰਖੰਡ ਦੇ ਬੋਕਾਰੋ ਪਲਾਂਟਾਂ ’ਚ ਵੇਸਟ ਹੀਟ ਰਿਕਵਰੀ ਪ੍ਰਾਜੈਕਟਾਂ ਰਾਹੀਂ 100 ਮੈਗਾਵਾਟ ਬਿਜਲੀ ਉਤਪਾਦਨ ਸਮਰੱਥਾ ਵਿਕਸਤ ਕੀਤੀ ਗਈ ਹੈ, ਜਿਸ ਨਾਲ 24 ਲੱਖ ਟਨ ਕਾਰਬਨ ਡਾਇਆਕਸਾਈਡ ਨਿਕਾਸੀ ਤੋਂ ਬਚਾਅ ਹੋਇਆ। ਕੰਪਨੀ ਨੇ ਗੋਆ ’ਚ 7.5 ਲੱਖ ਤੋਂ ਵੱਧ ਰੁੱਖ ਲਾਏ ਹਨ, ਜਦੋਂਕਿ ਮਿਆਵਾਕੀ ਪੱਧਤੀ ਸਮੇਤ ਹੋਰ ਜੰਗਲਾਤ ਮੁਹਿੰਮਾਂ ਤਹਿਤ ਵੀ ਵੱਡੇ ਪੱਧਰ ’ਤੇ ਰੁੱਖ ਲਾਏ ਗਏ ਹਨ। ਕੰਪਨੀ ਦੇ ਸੀ. ਈ. ਓ. ਪੰਕਜ ਕੁਮਾਰ ਸ਼ਰਮਾ ਨੇ ਕਿਹਾ ਕਿ ਟਿਕਾਊ ਭਵਿੱਖ ਲਈ ਉਦਯੋਗਾਂ ਨੂੰ ਊਰਜਾ, ਆਵਾਜਾਈ ਅਤੇ ਵਾਤਾਵਰਣ ਪ੍ਰਤੀ ਆਪਣੇ ਦ੍ਰਿਸ਼ਟੀਕੋਣ ’ਚ ਬਦਲਾਅ ਲਿਆਉਣਾ ਹੋਵੇਗਾ।