ਭਾਰਤੀ ਏਅਰਟੈੱਲ ਦੇ ਚੇਅਰਮੈਨ ਸੁਨੀਲ ਭਾਰਤੀ ਮਿੱਤਲ ਨੇ ਕਿਹਾ ਕਿ ਕੰਪਨੀ ਨੇ ਪਿਛਲੇ ਇਕ ਦਹਾਕੇ ’ਚ ਡਿਜੀਟਲ ਬੁਨਿਆਦੀ ਢਾਂਚੇ ਦੇ ਨਿਰਮਾਣ ’ਚ 3.3 ਲੱਖ ਕਰੋੜ ਰੁਪਏ ਤੋਂ ਵੱਧ ਦਾ ਨਿਵੇਸ਼ ਕੀਤਾ ਹੈ ਅਤੇ ਹੁਣ ਵਾਧੇ ਦੇ ਅਗਲੇ ਪੜਾਅ ਲਈ ਵਿੱਤੀ ਸੇਵਾਵਾਂ, ਡਾਟਾ ਕੇਂਦਰਾਂ ਅਤੇ ਕਲਾਊਡ ਸੇਵਾਵਾਂ ’ਤੇ ਵੱਡਾ ਦਾਅ ਲਾ ਰਹੀ ਹੈ।
ਕੰਪਨੀ ਦੀ ਸਾਲਾਨਾ ਰਿਪੋਰਟ ’ਚ ਮਿੱਤਲ ਨੇ ਕਿਹਾ ਕਿ ਏਅਰਟੈੱਲ ਨੇ ਨਵੇਂ ਵਿਕਾਸ ਖੇਤਰਾਂ ਨੂੰ ਤਿਆਰ ਕਰਨ ਲਈ ਸੋਚ-ਸਮਝ ਕੇ ਕਦਮ ਚੁੱਕੇ ਹਨ। ਇਨ੍ਹਾਂ ਯਤਨਾਂ ਨਾਲ ਕੰਪਨੀ ਨੂੰ ਮਜ਼ਬੂਤ ਨਤੀਜੇ ਮਿਲੇ ਹਨ ਅਤੇ ਹੁਣ ਉਸ ਨੂੰ ਵਿੱਤੀ ਸੇਵਾਵਾਂ, ਡਾਟਾ ਕੇਂਦਰ ਅਤੇ ਏਅਰਟੈੱਲ ਕਲਾਊਡ ਖੇਤਰ ’ਚ ਅੱਗੇ ਵਧਣ ਦੀਆਂ ਚੰਗੀਆਂ ਸੰਭਾਵਨਾਵਾਂ ਦਿਸ ਰਹੀਆਂ ਹਨ।
ਉਨ੍ਹਾਂ ਕਿਹਾ ਕਿ ਭਾਰਤੀ ਏਅਰਟੈੱਲ ਨੇ ਆਪਣੀ ਗੈਰ-ਬੈਂਕਿੰਗ ਵਿੱਤੀ ਕੰਪਨੀ (ਐੱਨ. ਬੀ. ਐੱਫ. ਸੀ.) ਏਅਰਟੈੱਲ ਮਨੀ ’ਚ 20,000 ਕਰੋੜ ਰੁਪਏ ਦੇ ਨਿਵੇਸ਼ ਦਾ ਐਲਾਨ ਕੀਤਾ ਹੈ। ਉੱਥੇ ਹੀ ਕੰਪਨੀ ਦੀ ਡਾਟਾ ਸੈਂਟਰ ਇਕਾਈ ਨੈਕਸਟ੍ਰਾ ਨੇ ਇਕ ਗੀਗਾਵਾਟ (ਜੀ. ਡਬਲਯੂ.) ਸਮਰੱਥਾ ਵਿਕਸਤ ਕਰਨ ਦੀ ਯੋਜਨਾ ਤਹਿਤ ਹਾਲ ਹੀ ’ਚ ਇਕ ਅਰਬ ਡਾਲਰ (ਕਰੀਬ 9,500 ਕਰੋੜ ਰੁਪਏ) ਇਕੱਠੇ ਕੀਤੇ ਹਨ।
ਮਿੱਤਲ ਨੇ ਕਿਹਾ ਕਿ ਭਾਰਤੀ ਰਿਜ਼ਰਵ ਬੈਂਕ (ਆਰ. ਬੀ. ਆਈ.) ਨੇ ਏਅਰਟੈੱਲ ਮਨੀ ਨੂੰ ਗੈਰ-ਜਮ੍ਹਾ ਸਵੀਕਾਰ ਕਰਨ ਵਾਲੀ ਗੈਰ-ਬੈਂਕਿੰਗ ਵਿੱਤੀ ਕੰਪਨੀ ਦੇ ਰੂਪ ’ਚ ਕੰਮ ਕਰਨ ਦੀ ਮਨਜ਼ੂਰੀ ਦੇ ਦਿੱਤੀ ਹੈ। ਉਨ੍ਹਾਂ ਕਿਹਾ,‘‘ਇਹ ਕੰਪਨੀ ਲਈ ਇਕ ਮਹੱਤਵਪੂਰਨ ਪ੍ਰਾਪਤੀ ਹੈ ਅਤੇ ਭਾਰਤ ’ਚ ਵਿੱਤੀ ਇਨੋਵੇਸ਼ਨ ਦਾ ਘੇਰਾ ਵਧਾਉਣ ਦੇ ਵਿਆਪਕ ਟੀਚੇ ਦੀ ਦਿਸ਼ਾ ’ਚ ਵੀ ਅਹਿਮ ਕਦਮ ਹੈ।
ਮਿੱਤਲ ਨੇ ਕਿਹਾ ਕਿ ਏਅਰਟੈੱਲ ਮਨੀ ਨੂੰ ਆਉਣ ਵਾਲੇ ਸਾਲਾਂ ’ਚ ਲੋੜੀਂਦੀ ਪੂੰਜੀ ਉਪਲੱਬਧ ਕਰਵਾਈ ਜਾਵੇਗੀ। ਉਨ੍ਹਾਂ ਕਿਹਾ ਕਿ ਭਾਰਤ ’ਚ ਤੇਜ਼ੀ ਨਾਲ ਵਧਦੇ ਡਿਜੀਟਲੀਕਰਨ, ਕਲਾਊਡ ਸੇਵਾਵਾਂ ਦੀ ਵਧਦੀ ਵਰਤੋਂ ਅਤੇ ਡਾਟਾ ਨੂੰ ਦੇਸ਼ ’ਚ ਹੀ ਰੱਖਣ ਦੀਆਂ ਲੋੜਾਂ ਕਾਰਨ ਨੈਕਸਟ੍ਰਾ ਅਗਲੇ ਕੁਝ ਸਾਲਾਂ ’ਚ ਇਕ ਗੀਗਾਵਾਟ ਸਮਰੱਥਾ ਤਿਆਰ ਕਰਨ ਦੀ ਦਿਸ਼ਾ ’ਚ ਅੱਗੇ ਵਧ ਰਹੀ ਹੈ।
ਕਲਾਊਡ ਅਤੇ ਏ. ਆਈ. ਆਧਾਰਿਤ ਡਾਟਾ ਕੇਂਦਰਾਂ ’ਚ ਨਿਵੇਸ਼ ਲਈ ਸਰਕਾਰ ਵੱਲੋਂ ਦਿੱਤੀ ਲੰਮੀ ਮਿਆਦ ਦੀ ਟੈਕਸ ਛੋਟ ਇਕ ਸਮੇਂ ਦੇ ਅਨੁਕੂਲ ਪਹਿਲ ਹੈ। ਇਸ ਨਾਲ ਡਿਜੀਟਲ ਬੁਨਿਆਦੀ ਢਾਂਚੇ ’ਚ ਲਗਾਤਾਰ ਪੂੰਜੀ ਨਿਵੇਸ਼ ਨੂੰ ਉਤਸ਼ਾਹ ਮਿਲੇਗਾ ਅਤੇ ਦੇਸ਼ ’ਚ ਸੁਰੱਖਿਅਤ ਤੇ ਖੁਦਮੁਖਤਿਆਰ ਡਾਟਾ ਪ੍ਰਵਾਹ ਯਕੀਨੀ ਹੋਵੇਗਾ।’’ ਸਰਕਾਰ ਨੂੰ ਉਮੀਦ ਹੈ ਕਿ ਇਸ ਸਾਲ ਡਾਟਾ ਕੇਂਦਰ ਖੇਤਰ ’ਚ ਨਿਵੇਸ਼ 200 ਅਰਬ ਡਾਲਰ (18 ਲੱਖ ਕਰੋੜ ਰੁਪਏ ਤੋਂ ਵੱਧ) ਨੂੰ ਪਾਰ ਕਰ ਸਕਦਾ ਹੈ।
ਮਿੱਤਲ ਨੇ ਕਿਹਾ ਕਿ ਪਿਛਲੇ 10 ਸਾਲਾਂ ’ਚ ਕੰਪਨੀ ਨੇ ਭਾਰਤ ਦੇ ਸਭ ਤੋਂ ਮਜ਼ਬੂਤ ਡਿਜੀਟਲ ਬੁਨਿਆਦੀ ਢਾਂਚਾ ਮੰਚਾਂ ’ਚੋਂ ਇਕ ਤਿਆਰ ਕਰਨ ਲਈ 3.3 ਲੱਖ ਕਰੋੜ ਰੁਪਏ ਤੋਂ ਵੱਧ ਦਾ ਨਿਵੇਸ਼ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ 5ਜੀ ਅਰਥਵਿਵਸਥਾ ਦਾ ਉਭਰਨਾ ਕੰਪਨੀ ਦੇ ਵਾਧੇ ਦੇ ਅਗਲੇ ਪੜਾਅ ਨੂੰ ਤੈਅ ਕਰ ਰਿਹਾ ਹੈ ਅਤੇ ਇਸ ਨਾਲ ਵੱਖ-ਵੱਖ ਉਦਯੋਗਾਂ ’ਚ ਨਵੇਂ ਉਪਯੋਗ ਦੇ ਮੌਕੇ ਪੈਦਾ ਹੋ ਰਹੇ ਹਨ।