ਰੋਹਿਤ ਸ਼ਰਮਾ ਅਤੇ ਵਿਰਾਟ ਕੋਹਲੀ ਇਸ ਸਮੇਂ ਸਿਰਫ ਵਨਡੇ ਫਾਰਮੇਟ 'ਚ ਹੀ ਖੇਡ ਰਹੇ ਹਨ। ਦੋਵਾਂ ਦਿੱਗਜਾਂ ਨੇ 2024 'ਚ ਟੀ-20 ਵਿਸ਼ਵ ਕੱਪ ਤੋਂ ਬਾਅਦ ਟੀ-20 ਅੰਤਰਰਾਸ਼ਟਰੀ ਕ੍ਰਿਕਟ 'ਚੋਂ ਵੀ ਸੰਨਿਆਸ ਲੈ ਲਿਆ ਸੀ। ਸਾਬਕਾ ਭਾਰਤੀ ਕ੍ਰਿਕਟਰ ਰੌਬਿਨ ਉਥੱਪਾ ਨੇ ਵਿਰਾਟ ਕੋਹਲੀ ਅਤੇ ਰੋਹਿਤ ਸ਼ਰਮਾ ਦੇ ਟੈਸਟ ਕ੍ਰਿਕਟ 'ਚੋਂ ਸੰਨਿਆਸ ਨੂੰ ਲੈ ਕੇ ਸਵਾਲ ਖੜ੍ਹੇ ਕੀਤੇ ਹਨ। ਮਈ ਮਹੀਨੇ 'ਚ ਜਦੋਂ ਇਸ ਦਿੱਗਜ ਜੋੜੀ ਨੇ ਅਚਾਨਕ ਟੈਸਟ ਕ੍ਰਿਕਟ 'ਚੋਂ ਸੰਨਿਆਸ ਲੈਣ ਦਾ ਐਲਾਨ ਕੀਤਾ ਤਾਂ ਇਸ ਫੈਸਲੇ ਨੇ ਪੂਰੀ ਕ੍ਰਿਕਟ ਦੁਨੀਆ ਨੂੰ ਹੈਰਾਨ ਕਰ ਦਿੱਤਾ। ਫਿਲਹਾਲ 'ਰੋ-ਕੋ' ਸਿਰਫ ਵਨਡੇ ਫਾਰਮੇਟ 'ਚ ਹੀ ਭਾਰਤ ਲਈ ਖੇਡ ਰਹੇ ਹਨ।
ਕੀ ਰੋ-ਕੋ ਨੂੰ ਟੈਸਟ 'ਚੋਂ ਸੰਨਿਆਸ ਲਈ ਮਜਬੂਰ ਕੀਤਾ ਗਿਆ?
ਆਪਣੇ ਯੂਟਿਊਬ ਚੈਨਲ 'ਤੇ ਜਾਰੀ ਇਕ ਵੀਡੀਓ 'ਚ ਰੌਬਿਨ ਉਥੱਪਾ ਨੇ ਦਾਅਵਾ ਕੀਤਾ ਕਿ ਰੋਹਿਤ ਸ਼ਰਮਾ ਅਤੇ ਵਿਰਾਟ ਕੋਹਲੀ ਦਾ ਟੈਸਟ ਕ੍ਰਿਕਟ 'ਚੋਂ ਸੰਨਿਆਸ ਲੈਣਾ ਬਿਲਕੁਲ ਵੀ ਸੁਭਾਵਿਕ ਨਹੀਂ ਲਗਦਾ। ਉਨ੍ਹਾਂ ਕਿਹਾ ਕਿ ਇਸ ਅਚਾਨਕ ਫੈਸਲੇ ਦੀ ਅਸਲੀ ਵਜ੍ਹਾ 'ਤੇ ਗੱਲ ਕਰਨਾ ਖੁਦ ਇਨ੍ਹਾਂ ਦੋਵਾਂ ਖਿਡਾਰੀਆਂ 'ਤੇ ਨਿਰਭਰ ਕਰਦਾ ਹੈ ਪਰ ਉਨ੍ਹਾਂ ਨੂੰ ਇਹ ਫੈਸਲਾ ਕਿਸੇ ਮਜਬੂਰੀ ਵਰਗਾ ਮਹਿਸੂਸ ਹੁੰਦਾ ਹੈ।
ਉਥੱਪਾ ਨੇ ਕਿਹਾ ਕਿ ਮੈਨੂੰ ਨਹੀਂ ਪਤਾ ਕਿ ਇਹ ਜ਼ਬਰਨ ਕੀਤਾ ਗਿਆ ਆਤਮਸਮਰਪਣ ਸੀ ਜਾਂ ਨਹੀਂ ਪਰ ਇਹ ਬਿਲਕੁਲ ਵੀ ਸੁਭਾਵਿਕ ਵਿਦਾਈ ਨਹੀਂ ਲਗਦੀ। ਸੱਚਾਈ ਕੀ ਹੈ, ਇਹ ਉਹ ਦੋਵੇਂ ਹੀ ਆਪਣੇ ਸਮੇਂ 'ਤੇ ਦੱਸਣਗੇ ਪਰ ਮੈਨੂੰ ਨਹੀਂ ਲਗਦਾ ਕਿ ਇਹ ਫੈਸਲਾ ਸੁਭਾਵਿਕ ਸੀ।
ਰੋਹਿਤ ਸ਼ਰਮਾ ਅਤੇ ਵਿਰਾਟ ਕੋਹਲੀ ਦਾ ਟੈਸਟ ਕ੍ਰਿਕਟ 'ਚੋਂ ਅਚਾਨਕ ਸੰਨਿਆਸ ਲੈਣਾ ਕਾਫੀ ਹੈਰਾਨ ਕਰਨ ਵਾਲਾ ਰਿਹਾ। ਪਿਛਲੇ ਸਾਲ ਆਸਟ੍ਰੇਲੀਆ 'ਚ ਹੋਈ ਬਾਰਡਰ ਗਾਵਸਕਰ ਟਰਾਫੀ 'ਚ ਖਰਾਬ ਪ੍ਰਦਰਸ਼ਨ ਤੋਂ ਬਾਅਦ ਦੋਵਾਂ ਨੇ ਲੰਬੇ ਸਮੇਂ ਬਾਅਦ ਰਣਜੀ ਟਰਾਫੀ 'ਚ ਵਾਪਸੀ ਕੀਤੀ ਸੀ, ਤਾਂ ਜੋ ਆਪਣੇ ਟੈਸਟ ਕਰੀਅਰ ਨੂੰ ਅੱਗੇ ਵਧਾਇਆ ਜਾ ਸਕੇ। ਹਾਲਾਂਕਿ, ਇਸਦੇ ਬਾਵਜੂਦ ਮਈ ਮਹੀਨੇ 'ਚ ਦੋਵਾਂ ਨੇ ਰਹੱਸਮਈ ਤਰੀਕੇ ਨਾਲ ਟੈਸਟ ਕ੍ਰਿਕਟ ਨੂੰ ਅਲਵਿਦਾ ਆਖ ਦਿੱਤਾ। ਇਸੇ ਦੌਰਾਨ ਇੰਗਲੈਂਡ ਦੇ ਖਿਲਾਫ ਟੈਸਟ ਸੀਰੀਜ਼ ਤੋਂ ਪਹਿਲਾਂ ਸ਼ੁਭਮਨ ਗਿੱਲ ਨੂੰ ਨਵਾਂ ਟੈਸਟ ਕਪਤਾਨ ਨਿਯੁਕਤ ਕੀਤਾ ਗਿਆ।
ਉਥੱਪਾ ਨੇ ਅੱਗੇ ਕਿਹਾ ਕਿ ਜਦੋਂ ਆਸਟ੍ਰੇਲੀਆ ਦੌਰੇ 'ਤੇ ਰੋਹਿਤ ਦੌੜਾਂ ਨਹੀਂ ਬਣਾ ਪਾ ਰਹੇ ਸਨ ਉਦੋਂ ਮੈਨੂੰ ਲੱਗਾ ਸੀ ਕਿ ਉਨ੍ਹਾਂ ਨੂੰ 6 ਮਹੀਨਿਆਂ ਦੀ ਬ੍ਰੇਕ ਲੈ ਕੇ ਆਪਣੀ ਫਿਟਨੈੱਸ 'ਤੇ ਕੰਮ ਕਰਨਾ ਚਾਹੀਦਾ ਹੈ। ਮੈਨੂੰ ਪੂਰੀ ਭਰੋਸਾ ਸੀ ਕਿ ਰੋਹਿਤ ਜਲਦੀ ਹੀ ਟੈਸਟ 'ਚ ਵੀ ਧਮਾਕੇਦਾਰ ਵਾਪਸੀ ਕਰਨਗੇ ਪਰ ਅਜਿਹਾ ਨਹੀਂ ਹੋਇਆ।