ਚਾਲੂ ਮਾਲੀ ਸਾਲ 2026-27 ਦੀ ਪਹਿਲੀ ਤਿਮਾਹੀ ’ਚ ਯਾਤਰੀ ਕਾਰਾਂ ਦੀ ਥੋਕ ਵਿਕਰੀ 25.90 ਫੀਸਦੀ ਵਧ ਕੇ ਰਿਕਾਰਡ 12,73,811 ਇਕਾਈ ’ਤੇ ਪਹੁੰਚ ਗਈ। ਸਿਆਮ ਨੇ ਇਹ ਜਾਣਕਾਰੀ ਦਿੰਦੇ ਹੋਏ ਕਿਹਾ ਕਿ ਪੱਛਮੀ ਏਸ਼ੀਆ ਜੰਗ ਤੋਂ ਪੈਦਾ ਹੋਈਆਂ ਚੁਣੌਤੀਆਂ ਦੇ ਬਾਵਜੂਦ ਮਜ਼ਬੂਤ ਘਰੇਲੂ ਮੰਗ ਕਾਰਨ ਇਹ ਵਾਧਾ ਦਰਜ ਕੀਤਾ ਗਿਆ ਹੈ।
ਸੋਸਾਇਟੀ ਆਫ਼ ਇੰਡੀਅਨ ਆਟੋਮੋਬਾਈਲ ਮੈਨੂਫੈਕਚਰਰਜ਼ (ਸਿਆਮ) ਨੇ ਕਿਹਾ ਕਿ ਮਾਲੀ ਸਾਲ 2025-26 ਦੀ ਪਹਿਲੀ (ਅਪ੍ਰੈਲ-ਜੂਨ) ਤਿਮਾਹੀ ’ਚ ਯਾਤਰੀ ਕਾਰਾਂ ਦੀ ਥੋਕ ਵਿਕਰੀ 10,11,884 ਇਕਾਈ ਰਹੀ ਸੀ। ਇਸ ਤੋਂ ਪਹਿਲਾਂ, 2024-25 ਦੀ ਅਪ੍ਰੈਲ-ਜੂਨ ਤਿਮਾਹੀ ’ਚ ਰਿਕਾਰਡ ਲੱਗਭਗ 10.3 ਲੱਖ ਕਾਰਾਂ ਦੀ ਵਿਕਰੀ ਦਰਜ ਕੀਤੀ ਗਈ ਸੀ।
ਟੂ-ਵ੍ਹੀਲਰਜ਼ ਦੀ ਥੋਕ ਵਿਕਰੀ 20.3 ਫੀਸਦੀ ਵਧੀ
ਸਿਆਮ ਨੇ ਦੱਸਿਆ ਕਿ ਪਹਿਲੀ ਤਿਮਾਹੀ ’ਚ ਟੂ-ਵ੍ਹੀਲਰਜ਼ ਦੀ ਥੋਕ ਵਿਕਰੀ 20.3 ਫੀਸਦੀ ਵਧ ਕੇ 56,28,675 ਇਕਾਈ ਰਹੀ, ਜੋ ਇਕ ਸਾਲ ਪਹਿਲਾਂ ਦੀ ਇਸੇ ਮਿਆਦ ’ਚ 46,77,990 ਇਕਾਈ ਸੀ। ਇਨ੍ਹਾਂ ਤੋਂ ਇਲਾਵਾ, ਥ੍ਰੀ-ਵ੍ਹੀਲਰਜ਼ ਥੋਕ ਵਿਕਰੀ ਵੀ ਪਹਿਲੀ ਤਿਮਾਹੀ ’ਚ ਹੁਣ ਤੱਕ ਦੇ ਸਭ ਤੋਂ ਉੱਚੇ ਪੱਧਰ 2,14,339 ਇਕਾਈ ’ਤੇ ਪਹੁੰਚ ਗਈ। ਇਹ ਪਿਛਲੇ ਮਾਲੀ ਸਾਲ ਦੀ ਇਸੇ ਮਿਆਦ ਦੀ 1,65,211 ਇਕਾਈ ਦੇ ਮੁਕਾਬਲੇ 29.7 ਫੀਸਦੀ ਜ਼ਿਆਦਾ ਹੈ। ਮਾਲੀ ਸਾਲ 2026-27 ਦੀ ਪਹਿਲੀ ਤਿਮਾਹੀ ’ਚ ਕਮਰਸ਼ੀਅਲ ਗੱਡੀਆਂ ਦੀ ਵਿਕਰੀ ਵੀ ਰਿਕਾਰਡ 2.65 ਲੱਖ ਯੂਨਿਟ ਰਹੀ, ਜੋ ਪਿਛਲੇ ਸਾਲ ਦੀ ਇਸੇ ਤਿਮਾਹੀ ਦੇ ਮੁਕਾਬਲੇ 18.3 ਫੀਸਦੀ ਜ਼ਿਆਦਾ ਹੈ।
ਫਿਲਹਾਲ ਖਪਤਕਾਰ ਧਾਰਨਾ ਅਤੇ ਮੰਗ ਸਥਿਰ
ਸਿਆਮ ਦੇ ਪ੍ਰਧਾਨ ਸ਼ੈਲੇਸ਼ ਚੰਦਰਾ ਨੇ ਕਿਹਾ, ‘‘ਪੱਛਮੀ ਏਸ਼ੀਆ ’ਚ ਤਣਾਅ ਤੋਂ ਪੈਦਾ ਹੋਈਆਂ ਚੁਣੌਤੀਆਂ ਦੇ ਬਾਵਜੂਦ ਮਾਲੀ ਸਾਲ 2026-27 ਦੀ ਪਹਿਲੀ ਤਿਮਾਹੀ ’ਚ ਸਾਰੇ ਵਾਹਨ ਵਰਗ ਦਾ ਮਜ਼ਬੂਤ ਪ੍ਰਦਰਸ਼ਨ ਘਰੇਲੂ ਮੰਗ ਦੇ ਸਮਰਥਨ, ਜੀ. ਐੱਸ. ਟੀ. ਦੀਆਂ ਘੱਟ ਦਰਾਂ, ਵਿੱਤਪੋਸ਼ਣ ਲਾਗਤ ’ਚ ਨਰਮੀ, ਘੱਟ ਆਧਾਰ ਪ੍ਰਭਾਵ ਅਤੇ ਨਵੇਂ ਮਾਡਲਾਂ ਦੀ ਪੇਸ਼ਕਸ਼ ਦਾ ਨਤੀਜਾ ਹੈ।’’ ਉਨ੍ਹਾਂ ਨੇ ਕਿਹਾ ਕਿ ਫਿਲਹਾਲ ਖਪਤਕਾਰ ਧਾਰਨਾ ਅਤੇ ਮੰਗ ਸਥਿਰ ਬਣੀ ਹੋਈ ਹੈ ਪਰ ਉਦਯੋਗ ਨੇ ਖੇਤੀਬਾੜੀ ਉਤਪਾਦਨ ਅਤੇ ਪੇਂਡੂ ਮੰਗ ’ਤੇ ਸੰਭਾਵੀ ਅਸਰ ਨੂੰ ਦੇਖਦੇ ਹੋਏ ਭੂ-ਸਿਆਸੀ ਘਟਨਾਚੱਕਰ ਅਤੇ ਮਾਨਸੂਨ ਦੀ ਤਰੱਕੀ ’ਤੇ ਕਰੀਬੀ ਨਜ਼ਰ ਬਣਾਈ ਹੋਈ ਹੈ।