ਭਾਰਤੀ ਮੂਲ ਦੇ ਪਾਇਲਟ ਸਮਿਤ ਮਛਾਰ ਨੇ ਆਪਣੀ ਜਾਨ ਦੀ ਪਰਵਾਹ ਕੀਤੇ ਬਿਨਾਂ ਫਲਾਈਦੁਬਈ ਦੇ ਜਹਾਜ਼ ਨੂੰ ਹਾਦਸੇ ਤੋਂ ਬਚਾ ਕੇ ਭਾਵੇਂ ਹੀ ਖੂਬ ਪ੍ਰਸ਼ੰਸਾ ਬਟੋਰੀ ਹੋਵੇ ਪਰ ਉਨ੍ਹਾਂ ਦਾ ਮੰਨਣਾ ਹੈ ਕਿ ਉਹ ਸਿਰਫ਼ ਆਪਣੀ ਜ਼ਿੰਮੇਵਾਰੀ ਨਿਭਾ ਰਹੇ ਸਨ। ਸ਼੍ਰੀ ਮਛਾਰ ਨੇ ਇਕ ਨਿਊਜ਼ ਏਜੰਸੀ ਨਾਲ ਵਿਸ਼ੇਸ਼ ਗੱਲਬਾਤ 'ਚ ਬੇਹੱਦ ਨਿਮਰਤਾ ਨਾਲ ਉਸ ਖੌਫ਼ਨਾਕ ਘਟਨਾ ਨੂੰ ਯਾਦ ਕਰਦੇ ਹੋਏ ਕਿਹਾ,''ਇਕ ਪਾਇਲਟ ਵਜੋਂ ਮੈਂ ਸਿਰਫ਼ ਆਪਣਾ ਕੰਮ ਕਰ ਰਿਹਾ ਸੀ। ਪਲੇਨ ਸੁਰੱਖਿਅਤ ਲੈਂਡ ਹੋ ਗਿਆ ਅਤੇ ਸਾਰੇ ਸੁਰੱਖਿਅਤ ਹਨ, ਮੇਰੇ ਲਈ ਇਹ ਕਾਫ਼ੀ ਹੈ।''
ਇਹ ਭਿਆਨਕ ਘਟਨਾ ਦੁਬਈ ਤੋਂ ਇਜ਼ਰਾਈਲ ਜਾ ਰਹੀ ਫਲਾਈਦੁਬਈ ਦੀ ਉਡਾਣ 'ਚ ਵਾਪਰੀ। ਉਡਾਣ ਦੌਰਾਨ, ਸਹਿ-ਪਾਇਲਟ ਦਾ ਵਿਵਹਾਰ ਅਚਾਨਕ ਹਿੰਸਕ ਹੋ ਗਿਆ। ਉਸ ਨੇ ਕਥਿਤ ਤੌਰ 'ਤੇ ਕੈਪਟਨ ਮਛਾਰ 'ਤੇ ਹਮਲਾ ਕੀਤਾ ਅਤੇ ਜਹਾਜ਼ ਨੂੰ ਹਾਈਜੈਕ ਕਰਨ ਅਤੇ ਕਰੈਸ਼ ਕਰਨ ਦੀ ਕੋਸ਼ਿਸ਼ ਕੀਤੀ। ਇਜ਼ਰਾਈਲੀ ਪ੍ਰਧਾਨ ਮੰਤਰੀ ਬੈਂਜਾਮਿਨ ਨੇਤਨਯਾਹੂ ਨੇ ਬਾਅਦ 'ਚ ਇਸ ਘਟਨਾ ਨੂੰ 9/11 ਵਰਗੇ ਸੰਭਾਵਿਤ ਆਤਮਘਾਤੀ ਹਮਲੇ ਵਜੋਂ ਦਰਸਾਇਆ। ਗੰਭੀਰ ਸੱਟਾਂ ਅਤੇ ਖੂਨ ਵਹਿਣ ਦੇ ਬਾਵਜੂਦ, ਕੈਪਟਨ ਮਛਾਰ ਨੇ ਬਹਾਦਰੀ ਨਾਲ ਜਵਾਬੀ ਲੜਾਈ ਲੜੀ, ਐਮਰਜੈਂਸੀ ਪ੍ਰੋਟੋਕੋਲ ਨੂੰ ਐਕਟੀਵੇਟ ਕੀਤਾ ਅਤੇ ਕਾਕਪਿਟ ਦਾ ਦਰਵਾਜ਼ਾ ਖੁੱਲ੍ਹਵਾਇਆ।
ਇਸ ਨਾਲ ਸੁਚੇਤ ਚਾਲਕ ਦਲ ਦੇ ਮੈਂਬਰਾਂ ਅਤੇ ਬਹਾਦਰ ਯਾਤਰੀ ਅੰਦਰ ਪਹੁੰਚ ਗਏ, ਹਮਲਾਵਰ ਨੂੰ ਕਾਬੂ ਕੀਤਾ ਅਤੇ ਐਮਰਜੈਂਸੀ ਲੈਂਡਿੰਗ ਤੋਂ ਪਹਿਲਾਂ ਜਹਾਜ਼ ਨੂੰ ਸੁਰੱਖਿਅਤ ਸਥਿਤੀ 'ਚ ਲਿਆ। ਕੈਪਟਨ ਸਮਿਤ ਮਛਾਰ, ਜਿਨ੍ਹਾਂ ਕੋਲ 9,700 ਘੰਟਿਆਂ ਤੋਂ ਵੱਧ ਉਡਾਣ ਦਾ ਤਜਰਬਾ ਹੈ, ਮੂਲ ਰੂਪ 'ਚ ਮੁੰਬਈ ਦੇ ਘਾਟਕੋਪਰ ਦੇ ਰਹਿਣ ਵਾਲੇ ਹਨ। ਜਹਾਜ਼ ਨੂੰ ਕੋ-ਪਾਇਲਟ ਦਾ ਕਾਕਪਿਟ 'ਚ ਹਮਲਾ ਇੱਕ ਵੱਡੇ ਅੱਤਵਾਦੀ ਹਮਲੇ ਨੂੰ ਦੁਹਰਾਉਣ ਦੀ ਕੋਸ਼ਿਸ਼ ਸੀ। ਸਮਝਦਾਰੀ ਦਿਖਾਉਣ ਵਾਲੇ ਯਾਤਰੀਆਂ ਅਤੇ ਚਾਲਕ ਦਲ ਨੇ ਦਖਲ ਦਿੱਤਾ ਅਤੇ ਖ਼ਤਰੇ ਨੂੰ ਟਾਲ ਦਿੱਤਾ, ਜਿਸ ਨਾਲ 174 ਯਾਤਰੀਆਂ ਦੀ ਸੁਰੱਖਿਆ ਯਕੀਨੀ ਬਣਾਈ ਗਈ।