ਨਵੀਂ ਦਿੱਲੀ : ਮਾਰੂਤੀ ਸੁਜ਼ੂਕੀ ਇੰਡੀਆ ਲਿਮਟਿਡ (ਐੱਮ. ਐੱਸ. ਆਈ. ਐੱਲ.) ਨੇ ਚਾਲੂ ਮਾਲੀ ਸਾਲ ’ਚ ਸੀ. ਐੱਨ. ਜੀ., ਹਾਈਬ੍ਰਿਡ ਅਤੇ ਇਲੈਕਟ੍ਰਿਕ ਵਾਹਨਾਂ ਨੂੰ ਮਿਲਾ ਕੇ 10 ਲੱਖ ਗ੍ਰੀਨ ਵ੍ਹੀਕਲ ਵੇਚਣ ਦਾ ਟੀਚਾ ਰੱਖਿਆ ਹੈ। ਕੰਪਨੀ ਨੂੰ ਕੱਚੇ ਤੇਲ ਦੀਆਂ ਵਧਦੀਆਂ ਕੀਮਤਾਂ ਅਤੇ ਸੀ. ਐੱਨ. ਜੀ. ਵਾਹਨਾਂ ’ਚ ਆਟੋਮੈਟਿਕ ਟ੍ਰਾਂਸਮਿਸ਼ਨ ਦੀ ਸ਼ੁਰੂਆਤ ਤੋਂ ਇਸ ਟੀਚੇ ਨੂੰ ਹਾਸਲ ਕਰਨ ’ਚ ਮਦਦ ਮਿਲਣ ਦੀ ਉਮੀਦ ਹੈ।
ਗ੍ਰੀਨ ਵ੍ਹੀਕਲ ਅਜਿਹੇ ਵਾਤਾਵਰਣ-ਅਨੁਕੂਲ ਵਾਹਨ ਹਨ ਜੋ ਰਵਾਇਤੀ ਪੈਟਰੋਲ ਜਾਂ ਡੀਜ਼ਲ ਦੇ ਮੁਕਾਬਲੇ ਬਹੁਤ ਘੱਟ ਜਾਂ ਸਿਫਰ ਪ੍ਰਦੂਸ਼ਣ ਫੈਲਾਉਂਦੇ ਹਨ। ਕਾਰ ਬਾਜ਼ਾਰ ਦੀ ਅਗਵਾਈ ਕਰਨ ਵਾਲੀ ਕੰਪਨੀ ਨੇ ਆਪਣੇ ‘ਆਟੋ ਗ੍ਰੀਨ ਮਿਸ਼ਨ’ ਦੇ ਤਹਿਤ ਸ਼ੁੱਕਰਵਾਰ ਨੂੰ ਆਪਣੇ ਲੋਕਪ੍ਰਿਯ ਮਾਡਲ ਸਵਿਫਟ, ਡਿਜ਼ਾਇਰ ਅਤੇ ਬਲੇਨੋ ਦੇ ਆਟੋਮੈਟਿਕ ਐੱਸ-ਸੀ. ਐੱਨ. ਜੀ. ਐਡੀਸ਼ਨ ਪੇਸ਼ ਕੀਤੇ। ਕੰਪਨੀ ਦੇ ਸੀਨੀਅਰ ਕਾਰਜਕਾਰੀ ਅਧਿਕਾਰੀ (ਮਾਰਕੀਟਿੰਗ ਅਤੇ ਵਿਕਰੀ) ਪਾਰਥੋ ਬੈਨਰਜੀ ਨੇ ਦੱਸਿਆ ਕਿ ਸੀ. ਐੱਨ. ਜੀ. ਸ਼੍ਰੇਣੀ ’ਚ ਲੱਗਭਗ 70 ਫੀਸਦੀ ਬਾਜ਼ਾਰ ਹਿੱਸੇਦਾਰੀ ਰੱਖਣ ਵਾਲੀ ਐੱਮ. ਐੱਸ. ਆਈ. ਐੱਲ. ਨੂੰ ਪਹਿਲਾਂ ਇਸ ਮਾਲੀ ਸਾਲ ’ਚ 8 ਤੋਂ 9 ਲੱਖ ਗ੍ਰੀਨ ਵ੍ਹੀਕਲ ਵੇਚਣ ਦੀ ਉਮੀਦ ਸੀ।