ਭਾਰਤੀ ਕੰਪਨੀਆਂ ਨੇ ਵਿੱਤੀ ਸਾਲ 2025-26 ’ਚ 360 ਤੋਂ ਵੱਧ ਸ਼ੁਰੂਆਤੀ ਜਨਤਕ ਇਸ਼ੂ (ਆਈ. ਪੀ. ਓ.) ਰਾਹੀਂ ਲੱਗਭਗ 1.90 ਲੱਖ ਕਰੋੜ ਰੁਪਏ ਜੁਟਾਏ। ਗ੍ਰਾਂਟ ਥਾਰਨਟਨ ਭਾਰਤ ਦੀ ਰਿਪੋਰਟ ਅਨੁਸਾਰ ਗਲੋਬਲ ਬੇਨਿਯਮੀਆਂ ਅਤੇ ਬਾਜ਼ਾਰ ’ਚ ਉਤਰਾਅ-ਚੜ੍ਹਾਅ ਦੇ ਬਾਵਜੂਦ ਭਾਰਤ ਦੁਨੀਆ ਦੇ ਸਭ ਤੋਂ ਸਰਗਰਮ ਪ੍ਰਾਇਮਰੀ ਬਾਜ਼ਾਰਾਂ ’ਚ ਬਣਿਆ ਰਿਹਾ। ਹਾਲਾਂਕਿ ਨਿਵੇਸ਼ਕਾਂ ਦਾ ਰੁਖ ਹੁਣ ਪਹਿਲਾਂ ਦੇ ਮੁਕਾਬਲੇ ਵੱਧ ਚੌਕਸ ਹੋ ਗਿਆ ਹੈ।
ਵਿੱਤੀ ਸਾਲ ਦੌਰਾਨ ਮੁੱਖ ਸ਼ੇਅਰ ਬਾਜ਼ਾਰ ’ਚ ਰਿਕਾਰਡ 109 ਆਈ. ਪੀ. ਓ. ਆਏ ਅਤੇ ਇਨ੍ਹਾਂ ਰਾਹੀਂ ਲੱਗਭਗ 1.77 ਲੱਖ ਕਰੋੜ ਰੁਪਏ ਜੁਟਾਏ ਗਏ। ਵਿੱਤੀ ਸਾਲ 2024-25 ’ਚ 80 ਆਈ. ਪੀ. ਓ. ਰਾਹੀਂ 1.63 ਲੱਖ ਕਰੋੜ ਰੁਪਏ ਜੁਟਾਏ ਗਏ ਸਨ। ਮਾਰਚ 2026 ’ਚ ਗਲੋਬਲ ਆਈ. ਪੀ. ਓ. ’ਚ ਭਾਰਤ ਦੀ ਹਿੱਸੇਦਾਰੀ 14 ਫੀਸਦੀ ਰਹੀ ਅਤੇ ਚੀਨ ਤੋਂ ਬਾਅਦ ਭਾਰਤ ਦੂਜੇ ਸਥਾਨ ’ਤੇ ਰਿਹਾ।
ਨਿਵੇਸ਼ਕ ਹੁਣ ਕਰ ਰਹੇ ਹਨ ਗੰਭੀਰ ਜਾਂਚ
ਰਿਪੋਰਟ ਅਨੁਸਾਰ ਨਿਵੇਸ਼ਕ ਹੁਣ ਮਜ਼ਬੂਤ ਕਾਰੋਬਾਰੀ ਬੁਨਿਆਦ, ਬਿਹਤਰ ਸੰਚਾਲਨ ਵਿਵਸਥਾ, ਸਪੱਸ਼ਟ ਆਮਦਨ ਵਾਧਾ ਅਤੇ ਸੰਤੁਲਿਤ ਮੁੱਲਾਂਕਣ ਵਾਲੀਆਂ ਕੰਪਨੀਆਂ ਨੂੰ ਪਹਿਲ ਦੇ ਰਹੇ ਹਨ। ਵਿੱਤੀ ਸਾਲ 2025-26 ’ਚ ਆਈ. ਪੀ. ਓ. ਦਾ ਔਸਤ ਸਬਸਕ੍ਰਿਪਸ਼ਨ ਘਟ ਕੇ 39 ਗੁਣਾ ਰਹਿ ਗਿਆ, ਜਦੋਂ ਕਿ ਇਕ ਸਾਲ ਪਹਿਲਾਂ ਇਹ 71 ਗੁਣਾ ਸੀ। ਆਈ. ਪੀ. ਓ. ’ਚ ਸੂਚੀਬੱਧ ਹੋਣ ਦੇ ਪਹਿਲੇ ਦਿਨ ਦਾ ਔਸਤ ਲਾਭ 29 ਫੀਸਦੀ ਤੋਂ ਘਟ ਕੇ 7 ਫੀਸਦੀ ਰਹਿ ਗਿਆ। ਉਥੇ ਹੀ ਸੂਚੀਬੱਧ ਆਈ. ਪੀ. ਓ. ਕੰਪਨੀਆਂ ਦਾ ਔਸਤ ਸਾਲਾਨਾ ਪ੍ਰਦਰਸ਼ਨ 17 ਫੀਸਦੀ ਨਾਂਹ-ਪੱਖੀ ਰਿਹਾ।
ਐੱਸ. ਐੱਮ. ਈ. ਬਾਜ਼ਾਰ ’ਚ ਵੀ ਤੇਜ਼ੀ
ਵਿੱਤੀ ਸਾਲ 2025-26 ’ਚ 258 ਐੱਸ. ਐੱਮ. ਈ. ਆਈ. ਪੀ. ਓ. ਰਾਹੀਂ 12,030 ਕਰੋੜ ਰੁਪਏ ਜੁਟਾਏ ਗਏ, ਜਦੋਂ ਕਿ ਪਿਛਲੇ ਵਿੱਤੀ ਸਾਲ ’ਚ 242 ਆਈ. ਪੀ. ਓ. ਰਾਹੀਂ 9,900 ਕਰੋੜ ਰੁਪਏ ਜੁਟੇ ਸਨ। ਰਿਪੋਰਟ ਮੁਤਾਬਕ ਮਜ਼ਬੂਤ ਘਰੇਲੂ ਨਿਵੇਸ਼ਕ ਆਧਾਰ ਅਤੇ ਆਰਥਿਕ ਵਾਧੇ ਕਾਰਨ ਅੱਗੇ ਵੀ ਭਾਰਤੀ ਆਈ. ਪੀ. ਓ. ਬਾਜ਼ਾਰ ’ਚ ਤੇਜ਼ੀ ਬਣੇ ਰਹਿਣ ਦੀ ਉਮੀਦ ਹੈ।