ਪ੍ਰਸਿੱਧ ਗਾਇਕ ਗੁਰਦਾਸ ਮਾਨ ਕੈਨੇਡਾ ਵਿਖੇ ਸਫਲ ਸ਼ੋਅ ਕਰਕੇ ਵਤਨ ਪਰਤੇ

ਬਠਿੰਡਾ (ਕੁਲਜੀਤ ਸਿੰਘ ਢੀਂਗਰਾ) : ਪੰਜਾਬੀ ਗਾਇਕੀ ਦੇ ਬਾਬਾ ਬੋਹੜ ਗੁਰਦਾਸ ਮਾਨ ਤਕਰੀਬਨ 15 ਦਿਨਾਂ ਦੇ ਕੈਨੇਡਾ ਦੌਰੇ ਤੋਂ ਬਾਅਦ ਵਤਨ ਪਰਤ ਆਏ ਹਨ। ਉਨਾਂ ਦੇ ਚਾਰ ਸ਼ੋਅ ਝੱਜ ਪ੍ਰੋਡਕਸ਼ਨ ਏ.ਵੀ ਸੀ. ਫਰੈਂਡਸ ਇੰਟਰਟੇਨਮੈਂਟ ਦੀ ਪੇਸ਼ਕਾਰੀ ਹੇਠ ਟੋਰਾਂਟੋ, ਕੈਲਗਰੀ, ਐਡਮਿੰਟਨ ਤੇ ਵੈਨਕੂਵਰ ਵਿਖੇ ਹੋਏ। ਇਹ ਸਾਰੇ ਸ਼ੋ ਜਿੱਥੇ ਸੋਲਡ ਆਊਟ ਰਹਿ ਕੇ ਫੁੱਲ ਹਾਊਸ ਰਹੇ। ਤਕਰੀਬਨ ਸੱਤ ਸਾਲਾਂ ਦੇ ਲੰਬੇ ਅਰਸੇ ਬਾਅਦ ਕੈਨੇਡਾ ਸ਼ੋਅ ਤੇ ਗਏ ਗੁਰਦਾਸ ਮਾਨ ਨੂੰ ਕਨੇਡਾ ਦੇ ਪੰਜਾਬੀਆਂ ਤੇ ਗੋਰਿਆਂ ਨੇ ਖੂਬ ਮਾਣ ਸਤਿਕਾਰ ਦਿੱਤਾ ਤੇ ਉਹਨਾਂ ਵੱਲੋਂ ਗਾਏ ਗੀਤਾਂ ਤੇ ਖੂਬ ਜਿੱਥੇ ਠੁਮਕੇ ਲਾਏ ਗਏ ਤਾਂ ਮਾਨ ਵੱਲੋਂ ਕਰੀਆਂ ਗਈਆਂ ਬੇਸ਼ਕੀਮਤੀ ਗੱਲਾਂ ਤੇ ਵੀ ਸਰੋਤਿਆਂ ਤੇ ਦਰਸ਼ਕਾਂ ਨੇ ਖੂਬ ਗੌਰ ਫਰਮਾਇਆ। ਗਾਇਕ ਗੁਰਦਾਸ ਮਾਨ ਦੇ ਮੈਨੇਜਰ ਪਰਮ ਦੀ ਅਗਵਾਈ ਹੇਠ ਸਮੁੱਚਾ ਸੰਗੀਤ ਪਰਿਵਾਰ ਵੀ ਆਪਣੀ ਜਿੰਮੇਵਾਰੀ ਤੋਂ ਵੱਧ ਕੇ ਫਰਜ ਨਿਭਾ ਗਿਆ ਕਿਉਂਕਿ ਗੁਰਦਾਸ ਮਾਨ ਦੀ ਆਵਾਜ਼ ਦੇ ਨਾਲ ਨਾਲ ਮਿਊਜ਼ਿਕ ਟੀਮ ਨੇ ਵੀ ਗਾਇਕ ਮਾਨ ਦਾ ਖੂਬ ਸਾਥ ਦਿੱਤਾ। ਪੰਜਾਬੀ ਗਾਇਕੀ ਦੇ ਬਾਬਾ ਬੋਹੜ ਗੁਰਦਾਸ ਮਾਨ ਨੇ ਕੈਲਗਰੀ, ਟੋਰਾਂਟੋ, ਵੈਨਕੂਵਰ ਤੇ ਐਡਮਿੰਟਨ ਵਿਖੇ ਸ਼ੋਅ ਲਾ ਕੇ ਜਿੱਥੇ ਆਪਣੀ ਕਲਾ ਦਾ ਲੋਹਾ ਮਨਵਾਇਆ ਉੱਥੇ ਹੀ ਪੰਜਾਬੀਆਂ ਤੇ ਗੋਰਿਆਂ ਨੇ ਮਾਨ ਦੇ ਗੀਤਾਂ ਨੂੰ ਇਨਜੁਆਏ ਕੀਤਾ ਤੇ ਕਾਫੀ ਸੋਅਜ਼ ਫੁੱਲ ਹੋਣ ਦੇ ਬਾਵਜੂਦ ਵੀ ਦਰਸ਼ਕ ਖੜ ਕੇ ਗੁਰਦਾਸ ਮਾਨ‌ ਦੀ ਪ੍ਰਫਾਰਮੈਂਸ ਵਿੱਚ ਲੀਨ ਸਨ। ਇਸ ਗੱਲ ਦੀ ਗਵਾਹੀ ਵੱਖ-ਵੱਖ ਸੋਸ਼ਲ ਸਾਈਟਾਂ ਤੇ ਕੈਨੇਡਾ ਸ਼ੋਅਜ਼ ਦੀਆਂ ਵੀਡੀਓਜ ਭਰਦੀਆਂ ਹਨ। ਭਰੋਸੇਯੋਗ ਸੂਤਰਾਂ ਅਨੁਸਾਰ ਕੈਨੇਡਾ ਵਸੇ ਪੰਜਾਬੀਆਂ ਨੇ ਤੇ ਉੱਥੋਂ ਦੇ ਗੋਰਿਆਂ ਨੇ ਮਾਨ ਸਾਹਿਬ ਨੂੰ ਇੰਨਾ ਮਾਣ ਬਖਸ਼ਿਆ ਕਿ ਉਨਾਂ ਦੇ ਸਾਰੇ ਸ਼ੋਅ ਸੋਲਡ ਆਊਟ (ਫੁੱਲ ਹਾਊਸ) ਰਹੇ। ਸੱਤ ਸਾਲਾਂ ਬਾਅਦ ਕੈਨੇਡਾ ਵਿਖੇ ਪ੍ਰਫਾਰਮੈਂਸ ਕਰਨ ਗਏ ਗੁਰਦਾਸ ਮਾਨ ਦੇ ਪ੍ਰਸ਼ੰਸਕਾਂ ਭਾਵ ਕੈਨੇਡਾ ਵਾਲਿਆਂ ਦਾ ਇਸ ਗੱਲ ਤੇ ਧੰਨਵਾਦ ਤਾਂ ਕਰਨਾ ਬਣਦਾ ਹੈ। ਮਾਨ ਸਾਹਿਬ ਦੇ ਸਾਰੇ ਲਾਈਵ ਸੋਅ ਨੂੰ ਪਿਆਰ ਦਿੱਤਾ ਤਾਂ ਖੁਦ ਗੁਰਦਾਸ ਮਾਨ ਤੇ ਉਨਾਂ ਦੀ ਟੀਮ ਕੈਨੇਡਾ ਵਾਸੀਆਂ ਤੋਂ ਗਦਗਦ ਹੋ ਉੱਠੀ। ਕੈਨੇਡਾ ਤੋਂ ਵਾਪਸ ਪਰਤਣ ਸਮੇਂ ਗੁਰਦਾਸ ਮਾਨ ਨੇ ਮਣਾਂਮੂੰਹੀ ਪਿਆਰ ਦੇਣ ਲਈ ਸਮੁੱਚੇ ਪੰਜਾਬੀਆਂ ਤੇ ਗੋਰਿਆਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਤੁਹਾਡੇ ਵੱਲੋਂ ਦਿੱਤੇ ਗਏ ਪਿਆਰ ਦਾ ਹਮੇਸ਼ਾ ਕਰਜ਼ਦਾਰ ਰਹਾਂਗਾ ਤੇ ਪੰਜਾਬੀ ਮਾਂ-ਬੋਲੀ ਨੂੰ ਸਿਖਰਾਂ ਵੱਲ ਲੈ ਕੇ ਜਾਣ ਲਈ ਸ਼ੁਰੂ ਤੋਂ ਹੀ ਤੱਤਪਰ ਹਾਂ ਪਰ ਕੈਨੇਡਾ ਦੇ ਲੋਕਾਂ ਵੱਲੋਂ ਦਿੱਤੇ ਪਿਆਰ ਸਦਕਾ ਪੰਜਾਬੀ ਮਾਂ ਬੋਲੀ ਪ੍ਰਤੀ ਹੋਰ ਵੀ ਜਿੰਮੇਵਾਰੀ ਵੱਧ ਗਈ ਹੈ। ਗੁਰਦਾਸ ਮਾਨ ਨੇ ਆਪਦੇ ਸੋਸ਼ਲ ਮੀਡੀਆ ਹੈਂਡਲ ਤੇ ਕੈਨੇਡਾ ਵਾਲਿਆਂ ਦਾ ਧੰਨਵਾਦ ਕੀਤਾ‌।