ਆਪਣੇ ਸਾਊ ਸੁਭਾਅ ਤੇ ਸੁਰੀਲੀ ਗਾਇਕੀ ਲਈ ਜਾਣੇ ਜਾਂਦੇ ਪੰਜਾਬੀ ਸੰਗੀਤ ਜਗਤ ਦੇ ਮਸ਼ਹੂਰ ਗਾਇਕ ਪ੍ਰਭ ਗਿੱਲ ਨੇ ਹਾਲ ਹੀ ਵਿੱਚ ਆਪਣੇ ਫੇਸਬੁੱਕ ਅਕਾਊਂਟ 'ਤੇ ਇੱਕ ਪੋਸਟ ਸਾਂਝੀ ਕਰਦਿਆਂ ਉਨ੍ਹਾਂ ਲੋਕਾਂ ਨੂੰ ਲੰਮੇ ਹੱਥੀਂ ਲਿਆ ਹੈ, ਜੋ ਪੌਡਕਾਸਟਾਂ ਵਿੱਚ ਬੈਠ ਕੇ ਨਾਮਵਰ ਕਲਾਕਾਰਾਂ ਬਾਰੇ ਅਪਸ਼ਬਦ ਬੋਲਦੇ ਹਨ ਜਾਂ ਉਨ੍ਹਾਂ ਦੀ ਮਿਹਨਤ ਦਾ ਨਿਰਾਦਰ ਕਰਦੇ ਹਨ।
ਗਾਇਕ ਨੇ ਆਪਣੀ ਪੋਸਟ ਵਿੱਚ ਲਿਖਿਆ, ਪੌਡਕਾਸਟਾਂ ਵਿੱਚ ਬੈਠ ਕੇ ਕੋਈ ਵੀ ਕਿਸੇ ਨਾਮਵਰ ਆਰਟਿਸਟ ਲਈ ਕੁਝ ਵੀ ਬੋਲ ਰਿਹਾ ਹੈ। ਮੈਂ ਇਨ੍ਹਾਂ ਨੂੰ ਇਹੀ ਸਲਾਹ ਦਿਆਂਗਾ ਕੇ ਚੱਲਣਾ ਤੁਸੀਂ ਐਦਾਂ ਵੀ ਨਹੀਂ। ਪ੍ਰਮਾਤਮਾ ਸਾਫ ਨੀਅਤ ਰੱਖਣ ਵਾਲਿਆਂ 'ਤੇ ਆਪਣੀ ਖਾਸ ਕਿਰਪਾ ਕਰਦਾ ਹੈ, ਨਾ ਕਿ ਤੁਹਾਡੇ ਵਰਗੇ ਸਾੜਾ ਰੱਖਣ ਵਾਲਿਆਂ 'ਤੇ।
ਇਸ ਦੇ ਨਾਲ ਹੀ ਗਾਇਕ ਨੇ ਵਿਵਾਦ ਪੈਦਾ ਕਰਨ ਵਾਲੇ ਸਵਾਲ ਪੁੱਛਣ ਵਾਲੇ ਅਜਿਹੇ ਪੌਡਕਾਸਟ ਹੋਸਟਾਂ ਨੂੰ ਵੀ ਚੰਗੀ ਝਾੜ ਪਾਈ। ਉਨ੍ਹਾਂ ਕਿਹਾ, ਜੇ ਤੁਸੀਂ ਬਹੁਤ ਗੁਣਵਾਨ ਹੋ ਤਾਂ ਬਿਨਾਂ ਕਿਸੇ ਨੈਗਟਿਵਿਟੀ ਤੋਂ ਸਾਫ ਇੰਟਰਵਿਊ ਵੀ ਕਰਕੇ ਦਿਖਾ ਦਿਓ। ਮਸ਼ਹੂਰ ਹੋਣ ਦੀ ਕੋਸ਼ਿਸ਼ ਵਿੱਚ ਅਜਿਹਾ ਕਰਕੇ ਤੁਸੀਂ ਕਦੇ ਕਾਮਯਾਬ ਨਹੀਂ ਹੋਵੋਗੇ, ਸਗੋਂ ਤੁਹਾਡੀ ਇਹ ਕੋਸ਼ਿਸ਼ ਨਵੇਂ ਸ਼ੁਰੂ ਹੋਏ ਕਲਾਕਾਰ ਦਾ ਨੁਕਸਾਨ ਹੀ ਕਰਦੀ ਹੈ। ਪ੍ਰਭ ਗਿੱਲ ਦੀ ਇਸ ਪੋਸਟ ਤੋਂ ਬਾਅਦ ਸੰਗੀਤ ਜਗਤ ਦੇ ਹੋਰ ਕਲਾਕਾਰਾਂ ਅਤੇ ਪ੍ਰਸ਼ੰਸਕਾਂ ਨੇ ਵੀ ਉਨ੍ਹਾਂ ਦਾ ਸਮਰਥਨ ਕੀਤਾ ਹੈ।