ਵਾਸ਼ਿੰਗਟਨ ਡੀਸੀ : ਕਾਨਸ ਫਿਲਮ ਫੈਸਟੀਵਲ 2026 ਵਿੱਚ ਭਾਰਤ ਦੀ ਮਜ਼ਬੂਤ ਮੌਜੂਦਗੀ ਦੇਖਣ ਨੂੰ ਮਿਲੇਗੀ। ਇਹ ਇਵੈਂਟ 12 ਮਈ ਤੋਂ 23 ਮਈ ਤੱਕ ਫਰਾਂਸ ਵਿੱਚ ਆਯੋਜਿਤ ਹੋਵੇਗਾ, ਜਿਸ ਵਿੱਚ ਖੇਤਰੀ ਸਿਨੇਮਾ ਤੋਂ ਲੈ ਕੇ ਬਾਲੀਵੁੱਡ ਦੇ ਦਿੱਗਜ ਅਦਾਕਾਰ, ਨਿਰਮਾਤਾ ਕੋਮਾਂਤਰੀ ਮੰਚ 'ਤੇ ਭਾਰਤ ਦੀ ਨੁਮਾਇੰਦਗੀ ਕਰਨਗੇ।
ਅਦਾਕਾਰ-ਗਾਇਕ ਐਮੀ ਵਿਰਕ ਪਹਿਲੀ ਵਾਰ ਕਾਨਸ ਵਿੱਚ ਸ਼ਾਮਲ ਹੋਣਗੇ। ਉਹ ਆਪਣੀ ਫਿਲਮ 'ਚਾਰਦੀਕਲਾ' ਦੀ ਪ੍ਰਮੋਸ਼ਨ ਲਈ ਉਥੇ ਪਹੁੰਚ ਰਹੇ ਹਨ। ਉਨ੍ਹਾਂ ਨਾਲ ਉਨ੍ਹਾਂ ਦੀ ਸਹਿ-ਕਲਾਕਾਰ ਰੂਪੀ ਗਿੱਲ ਵੀ ਇਸ ਇਵੈਂਟ ਵਿੱਚ ਸ਼ਾਮਲ ਹੋਵੇਗੀ, ਜਿਸ ਨਾਲ ਇਹ ਅੰਤਰਰਾਸ਼ਟਰੀ ਪਲੇਟਫਾਰਮ 'ਤੇ ਪੰਜਾਬੀ ਫਿਲਮ ਇੰਡਸਟਰੀ ਲਈ ਇੱਕ ਯਾਦਗਾਰ ਪਲ ਬਣ ਜਾਵੇਗਾ।
ਫਿਲਮ ਨਿਰਮਾਤਾ ਆਸ਼ੂਤੋਸ਼ ਗੋਵਾਰੀਕਰ ਵੀ ਭਾਰਤ ਦੇ ਅਧਿਕਾਰਤ ਵਫ਼ਦ ਦੇ ਮੈਂਬਰ ਵਜੋਂ ਇਸ ਫੈਸਟੀਵਲ ਦਾ ਹਿੱਸਾ ਹੋਣਗੇ। ਉਹ ਅੰਤਰਰਾਸ਼ਟਰੀ ਫਿਲਮ ਫੈਸਟੀਵਲ ਆਫ਼ ਇੰਡੀਆ (IFFI) ਦੇ ਨਿਰਦੇਸ਼ਕ ਵਜੋਂ ਆਪਣੀ ਭੂਮਿਕਾ ਵਿੱਚ ਦੇਸ਼ ਦੀ ਨੁਮਾਇੰਦਗੀ ਕਰਨਗੇ।
ਇਸ ਸਾਲ ਕਾਨਸ ਵਿੱਚ ਮਰਾਠੀ ਸਿਨੇਮਾ ਵੀ ਨਜ਼ਰ ਆਵੇਗਾ। ਦਿੱਗਜ ਅਦਾਕਾਰ ਅਸ਼ੋਕ ਸਰਾਫ, ਨਿਵੇਦਿਤਾ ਸਰਾਫ, ਅਦਾਕਾਰਾ ਪ੍ਰਾਜਕਤਾ ਮਾਲੀ ਅਤੇ ਨਿਰਮਾਤਾ ਕੇਦਾਰ ਜੋਸ਼ੀ ਰਵਾਇਤੀ ਮਰਾਠੀ ਪਹਿਰਾਵੇ ਵਿੱਚ ਭਾਰਤੀ ਸਭਿਆਚਾਰ ਦੀ ਝਲਕ ਪੇਸ਼ ਕਰਨਗੇ। ਉਥੇ ਹੀ ਗੁਜਰਾਤੀ ਸਿਨੇਮਾ ਦੀ ਨੁਮਾਇੰਦਗੀ ਅਦਾਕਾਰ-ਨਿਰਮਾਤਾ ਮਾਨਸੀ ਪਾਰੇਖ ਅਤੇ ਗਾਇਕ ਪਾਰਥਿਵ ਗੋਹਿਲ ਕਰਨਗੇ। ਮਲਿਆਲਮ ਫਿਲਮ ਉਦਯੋਗ ਤੋਂ, ਫਿਲਮ ਨਿਰਮਾਤਾ ਚਿਦੰਬਰਮ ਆਪਣੀ ਫਿਲਮ 'ਬਾਲਨ: ਦਿ ਬੁਆਏ' ਨੂੰ ਕਾਨਸ ਮਾਰਕੀਟ ਵਿੱਚ ਪੇਸ਼ ਕਰਨਗੇ।
ਬਾਲੀਵੁੱਡ ਦੀ ਵੀ ਇਸ ਫੈਸਟੀਵਲ ਵਿੱਚ ਮਜ਼ਬੂਤ ਮੌਜੂਦਗੀ ਹੋਵੇਗੀ। ਐਸ਼ਵਰਿਆ ਰਾਏ ਬੱਚਨ ਲੋਰੀਅਲ ਲਈ ਗਲੋਬਲ ਅੰਬੈਸਡਰ ਵਜੋਂ ਵਾਪਸੀ ਕਰੇਗੀ। ਅਦਾਕਾਰਾ ਆਲੀਆ ਭੱਟ ਦੇ ਵੀ ਸ਼ਾਮਲ ਹੋਣ ਦੀ ਉਮੀਦ ਹੈ। ਫਿਲਮ ਨਿਰਮਾਤਾ ਕਰਨ ਜੌਹਰ, ਅਦਾਕਾਰ ਤਾਰਾ ਸੁਤਾਰੀਆ, ਮੌਨੀ ਰਾਏ ਅਤੇ ਪੂਜਾ ਬੱਤਰਾ ਵੀ ਇਸ ਪ੍ਰੋਗਰਾਮ ਵਿੱਚ ਮੌਜੂਦ ਰਹਿਣਗੇ।