ਤਿਉਹਾਰੀ ਸੀਜ਼ਨ ਦੀ ਸੇਲ ਦੇ ਪਹਿਲੇ 2 ਦਿਨਾਂ ’ਚ ਈ-ਕਾਮਰਸ ਕੰਪਨੀਆਂ ਨੇ ਲੱਗਭਗ 24,000 ਕਰੋੜ ਰੁਪਏ ਦਾ ਸਾਮਾਨ ਵੇਚਿਆ ਹੈ। ਆਰਡਰਾਂ ਦੀ ਗਿਣਤੀ ’ਚ ਜ਼ਬਰਦਸਤ ਵਾਧੇ ਦੇ ਦਮ ’ਤੇ ਇਹ ਵਿਕਰੀ ਦਰਜ ਕੀਤੀ ਗਈ, ਜਿਸ ’ਚ ਕੀਮਤ ਦੇ ਹਿਸਾਬ ਨਾਲ ਮੋਬਾਈਲਾਂ ਦੀ ਹਿੱਸੇਦਾਰੀ ਸਭ ਤੋਂ ਵੱਧ ਰਹੀ। ਸਲਾਹਕਾਰ ਕੰਪਨੀ ‘ਰੈੱਡਸੀਰ ਸਟ੍ਰੈਟੇਜੀ ਕੰਸਲਟੈਂਟਸ’ ਨੇ ਇਹ ਜਾਣਕਾਰੀ ਦਿੱਤੀ ਹੈ।
ਸਲਾਹਕਾਰ ਫਰਮ ਦਾ ਅੰਦਾਜ਼ਾ ਹੈ ਕਿ ਗਾਹਕਾਂ ਨੇ ਅੈਮਾਜ਼ੋਨ, ਫਲਿੱਪਕਾਰਟ, ਮੀਸ਼ੋ, ਆਜੀਓ ਅਤੇ ਹੋਰ ਕਈ ਆਨਲਾਈਨ ਪਲੇਟਫਾਰਮਾਂ ’ਤੇ ਕੁਲ ਮਿਲਾ ਕੇ ਲੱਗਭਗ 8 ਤੋਂ 9 ਕਰੋੜ ਆਰਡਰ ਦਿੱਤੇ।
ਰੈੱਡਸੀਰ ਸਟ੍ਰੈਟੇਜੀ ਕੰਸਲਟੈਂਟਸ ਦੇ ਐਸੋਸੀਏਟ ਪਾਰਟਨਰ ਨਿਖਿਲ ਦਲਾਲ ਨੇ ਦੱਸਿਆ ਕਿ ਸ਼ੁਰੂਆਤੀ 2 ਦਿਨ ਇਹ ਦਰਸਾਉਂਦੇ ਹਨ ਕਿ ਭਾਰਤ ’ਚ ਤਿਉਹਾਰੀ ਈ-ਕਾਮਰਸ ਦਾ ਘੇਰਾ ਹੋਰ ਵਿਸ਼ਾਲ ਹੋ ਰਿਹਾ ਹੈ। ਇਸ ਵਾਧੇ ’ਚ ਆਰਡਰਾਂ ਦੀ ਗਿਣਤੀ ਦਾ ਮੁੱਖ ਯੋਗਦਾਨ ਹੈ, ਜਿੱਥੇ ਖਪਤਕਾਰ ਸਿਰਫ ਮੋਬਾਈਲ ਤੱਕ ਸੀਮਤ ਨਾ ਰਹਿ ਕੇ ਫੈਸ਼ਨ, ਇਲੈਕਟ੍ਰਾਨਿਕਸ ਅਤੇ ਘਰੇਲੂ ਉਪਕਰਨਾਂ ’ਤੇ ਵੀ ਜੰਮ ਕੇ ਖਰਚ ਕਰ ਰਹੇ ਹਨ। ਉਨ੍ਹਾਂ ਕਿਹਾ,‘‘ਸਸਤੇ ਅਤੇ ਕਿਫਾਇਤੀ ਫੈਸ਼ਨ ਉਤਪਾਦਾਂ ਦੀ ਮੰਗ ਸਭ ਤੋਂ ਵੱਖ ਨਜ਼ਰ ਆਈ ਕਿਉਂਕਿ ਦੂਜੀ ਸ਼੍ਰੇਣੀ (ਟਾਇਰ-2) ਅਤੇ ਛੋਟੇ ਸ਼ਹਿਰਾਂ ਦੇ ਗਾਹਕਾਂ ਨੇ ਕਿਫਾਇਤੀ ਕੀਮਤਾਂ ’ਤੇ ਤਿਉਹਾਰੀ ਕੱਪੜੇ ਖਰੀਦੇ।
ਸ਼ੁਰੂਆਤੀ 2 ਦਿਨਾਂ ’ਚ ਕੁਲ ਵਪਾਰਕ ਮੁੱਲ (ਜੀ. ਐੱਮ. ਵੀ.) 2.5 ਅਰਬ ਡਾਲਰ (ਲੱਗਭਗ 24,200 ਕਰੋੜ ਰੁਪਏ) ਤੋਂ ਵੱਧ ਰਿਹਾ ਅਤੇ ਲੱਗਭਗ 6 ਤੋਂ 6.5 ਕਰੋੜ ਖਰੀਦਦਾਰ ਹੁਣ ਤੱਕ ਸੇਲ ’ਚ ਹਿੱਸਾ ਲੈ ਚੁੱਕੇ ਹਨ।’’