ਟਾਟਾ ਪਾਵਰ ਨੇ ਬਿਜਲੀ ਉਤਪਾਦਨ, ਟ੍ਰਾਂਸਮਿਸ਼ਨ, ਵੰਡ, ਨਵਿਆਉਣਯੋਗ ਊਰਜਾ ਅਤੇ ਨਿਰਮਾਣ ਸਮੇਤ ਆਪਣੇ ਸਾਰੇ ਕਾਰੋਬਾਰੀ ਖੇਤਰਾਂ ’ਚ ਵਿਸਥਾਰ ਦੇ ਨਾਲ 2030 ਤੱਕ 1 ਲੱਖ ਕਰੋੜ ਰੁਪਏ ਦਾ ਮਾਲੀਆ ਅਤੇ 10,000 ਕਰੋੜ ਰੁਪਏ ਦਾ ਲਾਭ ਹਾਸਲ ਕਰਨ ਦਾ ਟੀਚਾ ਰੱਖਿਆ ਹੈ।
ਟਾਟਾ ਪਾਵਰ ਦੇ ਚੇਅਰਮੈਨ ਐੱਨ. ਚੰਦਰਸ਼ੇਖਰਨ ਨੇ ਸਾਲਾਨਾ ਆਮ ਬੈਠਕ (ਏ. ਜੀ. ਐੱਮ.) ’ਚ ਕਿਹਾ ਕਿ ਕੰਪਨੀ ਓਡਿਸ਼ਾ ’ਚ 10 ਗੀਗਾਵਾਟ ਦਾ ਨਵਾਂ ਪ੍ਰਾਜੈਕਟ ਜੋੜ ਕੇ ਸੂਰਜੀ ਯੰਤਰ ਨਿਰਮਾਣ ਸਮਰੱਥਾ ਦਾ ਵਿਸਥਾਰ ਕਰਨ ਦੀ ਵੀ ਯੋਜਨਾ ਬਣਾ ਰਹੀ ਹੈ। ਇਸ ਪ੍ਰਾਜੈਕਟ ਦਾ ਰਸਮੀ ਐਲਾਨ ਅਗਲੇ ਕੁਝ ਮਹੀਨਿਆਂ ’ਚ ਕੀਤਾ ਜਾਵੇਗਾ।
ਏ. ਜੀ. ਐਮ. ’ਚ ਸਵਾਲ-ਤਵਾਬ ਸੈਸ਼ਨ ਦੌਰਾਨ ਚੰਦਰਸ਼ੇਖਰਨ ਨੇ ਕਿਹਾ, ‘‘ਟਾਟਾ ਪਾਵਰ ਅੱਜ ਰਿਹਾਇਸ਼ੀ ਅਤੇ ਵਪਾਰਕ ਤੇ ਉਦਯੋਗਿਕ (ਸੀ. ਐਂਡ ਆਈ.) ਗਾਹਕਾਂ ਨੂੰ ਸਵੱਛ ਅਤੇ ਗ੍ਰੀਨ ਹੱਲ ਅਪਣਾਉਣ ’ਚ ਸਮਰੱਥ ਬਣਾ ਕੇ ‘ਐਨਰਜੀ ਐਜ਼ ਏ ਸਰਵਿਸ’ (ਸੇਵਾ ਦੇ ਤੌਰ ’ਤੇ ਊਰਜਾ) ਪਹੁੰਚ ਦੀ ਅਗਵਾਈ ਕਰ ਰਹੀ ਹੈ।’’ ਉਨ੍ਹਾਂ ਕਿਹਾ ਕਿ ਕੰਪਨੀ ਬਿਜਲੀ ਉਤਪਾਦਨ, ਟ੍ਰਾਂਸਮਿਸ਼ਨ, ਵੰਡ, ਨਵਿਆਉਣਯੋਗ ਊਰਜਾ, ਰੂਫਟਾਪ ਸੋਲਰ ਊਰਜਾ, ਇਲੈਕਟ੍ਰਾਨਿਕ ਵਾਹਨ (ਈ. ਵੀ.) ਚਾਰਜਿੰਗ ਅਤੇ ਨਿਰਮਾਣ ਸਮੇਤ ਆਪਣੇ ਸਾਰੇ ਕਾਰੋਬਾਰੀ ਖੇਤਰਾਂ ’ਚ ਵਿਸਥਾਰ ਕਰ ਰਹੀ ਹੈ।