ਆਸਟ੍ਰੇਲੀਆ ਦੇ ਮਹਾਨ ਕ੍ਰਕਿਟਰ ਰਿੱਕੀ ਪੋਂਟਿੰਗ ਦਾ ਮੰਨਣਾ ਹੈ ਕਿ ਸ਼ੁੱਭਮਨ ਗਿੱਲ ਨੂੰ ਆਪਣੀ ਟੈਸਟ ਬੱਲੇਬਾਜ਼ੀ ’ਤੇ ਕੰਮ ਕਰਨਾ ਹੋਵੇਗਾ ਅਤੇ ਇੰਗਲੈਂਡ ਦੌਰੇ ’ਤੇ ਕਪਤਾਨੀ ਦੀ ਵਾਧੂ ਜ਼ਿੰਮੇਵਾਰੀ ਵਿਚਾਲੇ ਉਸ ਨੂੰ ਬੱਲੇਬਾਜ਼ੀ ਕ੍ਰਮ ’ਚ ਚੌਥੇ ਨੰਬਰ ’ਤੇ ਉਤਰਨਾ ਚਾਹੀਦਾ ਹੈ। ਵਿਰਾਟ ਕੋਹਲੀ ਦੇ ਸੰਨਿਆਸ ਤੋਂ ਬਾਅਦ ਭਾਰਤ ਲਈ ਚੌਥੇ ਨੰਬਰ ’ਤੇ ਬੱਲੇਬਾਜ਼ੀ ਨੂੰ ਲੈ ਕੇ ਅਟਕਲਾਂ ਲਾਈਆਂ ਜਾ ਰਹੀਆਂ ਹਨ।
ਪੋਂਟਿੰਗ ਨੇ ਕਿਹਾ ਕਿ ਕਪਤਾਨੀ ਦੇ ਸ਼ੁਰੂਆਤੀ ਦੌਰ ’ਚ ਗਿੱਲ ਇਸ ਕ੍ਰਮ ’ਤੇ ਉਤਰ ਸਕਦਾ ਹੈ। ਪੋਂਟਿੰਗ ਨੇ ਕਿਹਾ ਕਿ ਗਿੱਲ ਦੀ ਸਫੇਦ ਗੇਂਦ ਦੇ ਫਾਰਮੈੱਟ ’ਚ ਫਾਰਮ ਜ਼ਬਰਦਸਤ ਹੈ। ਉਸ ਨੂੰ ਟੈਸਟ ਬੱਲੇਬਾਜ਼ੀ ’ਤੇ ਕੁਝ ਕੰਮ ਕਰਨਾ ਹੋਵੇਗਾ। ਜੇਕਰ ਤੁਸੀਂ ਨਵੇਂ ਕਪਤਾਨ ਹੋ ਤਾਂ ਇਹ ਆਸਾਨ ਨਹੀਂ ਹੁੰਦਾ। ਨਵੇਂ ਕਪਤਾਨ ਲਈ ਆਪਣੀ ਬੱਲੇਬਾਜ਼ੀ ਨੂੰ ਲੈ ਕੇ ਸੋਚਣਾ ਸੌਖਾ ਨਹੀਂ ਹੁੰਦਾ। ਉਸ ਨੇ ਕਿਹਾ ਕਿ ਭਾਰਤ ਨੇ ਗਿੱਲ ਨੂੰ ਕਪਤਾਨ ਬਣਾ ਕੇ ਸਹੀ ਫੈਸਲਾ ਲਿਆ ਹੈ। 2 ਵਾਰ ਦੇ ਵਿਸ਼ਵ ਕੱਪ ਜੇਤੂ ਕਪਤਾਨ ਪੋਂਟਿੰਗ ਨੇ ਕਿਹਾ ਕਿ ਗਿੱਲ ਲੰਮੇ ਸਮੇਂ ਤੱਕ ਕਪਤਾਨੀ ਕਰੇਗਾ।