ਦੱਖਣੀ ਕੋਰੀਆ ਦਾ ਸ਼ੇਅਰ ਬਾਜ਼ਾਰ ਮੰਗਲਵਾਰ ਨੂੰ ਬੁਰੀ ਤਰ੍ਹਾਂ ਟੁੱਟ ਗਿਆ। ਦੇਸ਼ ਦਾ ਪ੍ਰਮੁੱਖ ਸ਼ੇਅਰ ਸੂਚਕ ਅੰਕ ਕੋਸਪੀ ਇਕ ਸਮੇਂ 8 ਫੀਸਦੀ ਤੱਕ ਡਿੱਗ ਗਿਆ, ਜਿਸ ਤੋਂ ਬਾਅਦ ਟ੍ਰੇਡਿੰਗ ਨੂੰ ਪੂਰੇ ਬਾਜ਼ਾਰ ’ਚ 20 ਮਿੰਟ ਲਈ ਕਾਰੋਬਾਰ ਰੋਕਣਾ ਪਿਆ। ਹਾਲਾਂਕਿ, ਟ੍ਰੇਡਿੰਗ ਦੁਬਾਰਾ ਸ਼ੁਰੂ ਹੋਣ ਤੋਂ ਬਾਅਦ ਵੀ ਬਿਕਵਾਲੀ ਨਹੀਂ ਰੁਕੀ ਅਤੇ ਆਖਿਰ ’ਚ ਕੋਸਪੀ ਲੱਗਭਗ 10 ਫੀਸਦੀ ਦੀ ਗਿਰਾਵਟ ਨਾਲ ਬੰਦ ਹੋਇਆ।
ਇਹ ਗਿਰਾਵਟ ਅਜਿਹੇ ਸਮੇਂ ਆਈ ਹੈ ਜਦੋਂ ਦੱਖਣੀ ਕੋਰੀਆ ਦਾ ਬਾਜ਼ਾਰ ਪਿਛਲੇ ਇਕ ਸਾਲ ਤੋਂ ਲਗਾਤਾਰ ਰਿਕਾਰਡ ਉਚਾਈਆਂ ’ਤੇ ਪਹੁੰਚ ਰਿਹਾ ਸੀ ਪਰ ਹੁਣ ਨਿਵੇਸ਼ਕਾਂ ਨੇ ਮੁਨਾਫਾਵਸੂਲੀ ਸ਼ੁਰੂ ਕਰ ਦਿੱਤੀ ਹੈ, ਜਿਸ ਨਾਲ ਬਾਜ਼ਾਰ ’ਚ ਭਾਰੀ ਦਬਾਅ ਦੇਖਣ ਨੂੰ ਮਿਲਿਆ।
ਬਲੂਮਬਰਗ ਦੀ ਰਿਪੋਰਟ ਦੇ ਮੁਤਾਬਕ, ਵਿਦੇਸ਼ੀ ਨਿਵੇਸ਼ਕਾਂ ਨੇ ਮੰਗਲਵਾਰ ਨੂੰ ਕਰੀਬ 5 ਟ੍ਰਿਲੀਅਨ ਵੌਨ ਦੇ ਸ਼ੇਅਰ ਵੇਚੇ। ਜਦੋਂ ਵੱਡੇ ਵਿਦੇਸ਼ੀ ਫੰਡ ਲਗਾਤਾਰ ਮੁਨਾਫ਼ਾਵਸੂਲੀ ਕਰਦੇ ਹਨ ਤਾਂ ਬਾਜ਼ਾਰ ’ਤੇ ਦਬਾਅ ਹੋਰ ਵਧ ਜਾਂਦਾ ਹੈ। ਇਸ ਨਾਲ ਨਿਵੇਸ਼ਕਾਂ ’ਚ ਵੀ ਘਬਰਾਹਟ ਫੈਲਦੀ ਹੈ ਅਤੇ ਬਿਕਵਾਲੀ ਤੇਜ਼ ਹੋ ਜਾਂਦੀ ਹੈ।
ਸੈਮਸੰਗ ਅਤੇ ਐੱਸ. ਕੇ. ਹਾਈਨਿਕਸ ’ਚ ਭਾਰੀ ਗਿਰਾਵਟ
ਦੱਖਣੀ ਕੋਰੀਆ ਦੇ ਬਾਜ਼ਾਰ ’ਚ ਸਭ ਤੋਂ ਜ਼ਿਆਦਾ ਦਬਾਅ 2 ਵੱਡੀਆਂ ਕੰਪਨੀਆਂ ਸੈਮਸੰਗ ਇਲੈਕਟ੍ਰਾਨਿਕਸ ਅਤੇ ਐੱਸ. ਕੇ. ਹਾਈਨਿਕਸ ’ਤੇ ਦੇਖਣ ਨੂੰ ਮਿਲਿਆ। ਸੈਮਸੰਗ ਦਾ ਸ਼ੇਅਰ 10 ਫੀਸਦੀ ਤੋਂ ਜ਼ਿਆਦਾ ਅਤੇ ਐੱਸ. ਕੇ. ਹਾਈਨਿਕਸ 12 ਫੀਸਦੀ ਤੋਂ ਜ਼ਿਆਦਾ ਟੁੱਟ ਗਿਆ। ਇਨ੍ਹਾਂ ਦੋਵਾਂ ਕੰਪਨੀਆਂ ਦਾ ਕੋਸਪੀ ਇੰਡੈਕਸ ’ਚ ਬਹੁਤ ਵੱਡਾ ਯੋਗਦਾਨ ਹੈ।
ਅਮਰੀਕੀ ਟੈੱਕ ਸ਼ੇਅਰਾਂ ਦੀ ਕਮਜ਼ੋਰੀ ਦਾ ਵੀ ਅਸਰ
ਏਸ਼ੀਆਈ ਬਾਜ਼ਾਰਾਂ ’ਤੇ ਅਮਰੀਕੀ ਬਾਜ਼ਾਰ ਦੀ ਕਮਜ਼ੋਰੀ ਦਾ ਵੀ ਅਸਰ ਦੇਖਣ ਨੂੰ ਮਿਲਿਆ। ਸੋਮਵਾਰ ਨੂੰ ਅਮਰੀਕੀ ਟੈਕਨਾਲੋਜੀ ਸ਼ੇਅਰਾਂ ਵਾਲਾ ਨੈਸਡੈਕ ਇੰਡੈਕਸ 1.3 ਫੀਸਦੀ ਤੋਂ ਜ਼ਿਆਦਾ ਡਿੱਗਿਆ ਸੀ। ਇਸ ਤੋਂ ਇਲਾਵਾ ਨਿਵੇਸ਼ਕ ਮਾਈਕ੍ਰੋਨ ਟੈਕਨਾਲੋਜੀ ਦੇ ਨਤੀਜਿਆਂ ਦਾ ਇੰਤਜ਼ਾਰ ਕਰ ਰਹੇ ਹਨ।