ਨਵੀਂ ਦਿੱਲੀ : ਭਾਰਤ ’ਚ ਇਲੈਕਟ੍ਰਾਨਿਕਸ ਦੀ ਵਧਦੀ ਖਪਤ, ਸਰਕਾਰੀ ਇਨਸੈਂਟਿਵ ਅਤੇ ਗਲੋਬਲ ਸੈਮੀਕੰਡਕਟਰ ਸਪਲਾਈ ਲੜੀ ’ਚ ਬਦਲਾਅ ਨਾਲ ਘਰੇਲੂ ਚਿੱਪ ਨਿਰਮਾਣ ਖੇਤਰ ਲਈ ਮਜ਼ਬੂਤ ਮੌਕੇ ਬਣੇ ਹਨ। ਬੋਸਟਨ ਕੰਸਲਟਿੰਗ ਗਰੁੱਪ (ਬੀ. ਸੀ. ਜੀ.) ਦੇ ਮੈਨੇਜਿੰਗ ਡਾਇਰੈਕਟਰ ਅਤੇ ਭਾਈਵਾਲ ਅੰਕੁਸ਼ ਵਢੇਰਾ ਨੇ ਇਹ ਗੱਲ ਕਹੀ।
ਉਨ੍ਹਾਂ ਕਿਹਾ ਕਿ ਆਰਟੀਫੀਸ਼ੀਅਲ ਇੰਟੈਲੀਜੈਂਸ (ਏ. ਆਈ.) ਦੇ ਜ਼ਿੰਮੇਦਾਰ ਵਿਕਾਸ ਨੂੰ ਲੈ ਕੇ ਚੱਲ ਰਹੀਆਂ ਚਰਚਾਵਾਂ ਮਹੱਤਵਪੂਰਨ ਹਨ ਪਰ ਇਸ ਨਾਲ ਸੈਮੀਕੰਡਕਟਰ ਦੀ ਮੰਗ ਹੌਲੀ ਹੋਣ ਦਾ ਕੋਈ ਕਾਰਨ ਨਹੀਂ ਦਿਸਦਾ। ਉਨ੍ਹਾਂ ਅਨੁਸਾਰ ਏ. ਆਈ. ਦਾ ਵਿਸਥਾਰ ਜੀ. ਪੀ. ਯੂ., ਕੰਪਿਊਟਿੰਗ ਸਮਰੱਥਾ ਅਤੇ ਮੈਮੋਰੀ ਦੀ ਮੰਗ ਨੂੰ ਵਧਾਉਂਦਾ ਰਹੇਗਾ ਅਤੇ ਸੈਮੀਕੰਡਕਟਰ ਤੇ ਏ. ਆਈ. ਦਾ ਆਪਸੀ ਸਬੰਧ ਹੋਰ ਮਜ਼ਬੂਤ ਹੋਵੇਗਾ।
ਵਢੇਰਾ ਨੇ ਕਿਹਾ ਕਿ ਭਾਰਤ ’ਚ ਸੈਮੀਕੰਡਕਟਰ ਖੇਤਰ ਲਈ ਇਹ ਮਹੱਤਵਪੂਰਨ ਸਮਾਂ ਹੈ। ਇਲੈਕਟ੍ਰਾਨਿਕਸ ਦੀ ਵਧਦੀ ਖਪਤ ਅਤੇ ਦੁਨੀਆ ਦੇ ਤੇਜ਼ੀ ਨਾਲ ਡਿਜੀਟਲੀਕਰਨ ਕਾਰਨ ਚਿੱਪ ਦੀ ਮੰਗ ਲਗਾਤਾਰ ਵਧ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਭਾਰਤ ਨੇ ਘਰੇਲੂ ਸੈਮੀਕੰਡਕਟਰ ਸਮਰੱਥਾ ਵਿਕਸਤ ਕਰਨ ’ਚ ਜ਼ਿਕਰਯੋਗ ਤਰੱਕੀ ਕੀਤੀ ਹੈ। ਕਈ ਪ੍ਰਾਜੈਕਟਾਂ ਦਾ ਐਲਾਨ ਹੋ ਚੁੱਕਾ ਹੈ ਅਤੇ ਕੁਝ ਪਲਾਂਟਾਂ ਨੇ ਵਪਾਰਕ ਉਤਪਾਦਨ ਵੀ ਸ਼ੁਰੂ ਕਰ ਦਿੱਤਾ ਹੈ। ਵਢੇਰਾ ਮੁਤਾਬਕ ਨਿਵੇਸ਼ ਦਾ ਘੇਰਾ ਸਿਰਫ ਚਿੱਪ ਨਿਰਮਾਣ ਪਲਾਂਟਾਂ ਅਤੇ ਅਸੈਂਬਲੀ ਇਕਾਈਆਂ ਤੱਕ ਸੀਮਤ ਨਹੀਂ ਹੈ, ਸਗੋਂ ਇਸ ਨਾਲ ਵਿਆਪਕ ਸੈਮੀਕੰਡਕਟਰ ਮੁੱਲ ਲੜੀ ’ਚ ਵੀ ਨਿਵੇਸ਼ ਨੂੰ ਉਤਸ਼ਾਹ ਮਿਲ ਰਿਹਾ ਹੈ।