ਮੁੰਬਈ : ਬਾਲੀਵੁੱਡ ਸੁਪਰਸਟਾਰ ਆਮਿਰ ਖਾਨ ਨੇ ਖੁਲਾਸਾ ਕੀਤਾ ਹੈ ਕਿ 2009 ਦੀ ਬਲਾਕਬਸਟਰ "3 ਇਡੀਅਟਸ" ਵਿੱਚ ਉਨ੍ਹਾਂ ਦੁਆਰਾ ਨਿਭਾਇਆ ਗਿਆ ਕਿਰਦਾਰ 'ਫੁਨਸੁਖ ਵਾਂਗੜੂ', ਸਿੱਖਿਆ ਸ਼ਾਸਤਰੀ ਅਤੇ ਜਲਵਾਯੂ ਕਾਰਕੁਨ ਸੋਨਮ ਵਾਂਗਚੁਕ 'ਤੇ ਆਧਾਰਿਤ ਨਹੀਂ ਹੈ। ਆਮਿਰ ਨੇ ਇਹ ਗੱਲ ਲੰਡਨ ਇੰਡੀਅਨ ਫਿਲਮ ਫੈਸਟੀਵਲ ਵਿੱਚ ਕਹੀ, ਜਦੋਂ ਇੱਕ ਦਰਸ਼ਕ ਨੇ ਉਨ੍ਹਾਂ ਨੂੰ ਪੁੱਛਿਆ ਕਿ, ਕੀ ਸੋਨਮ ਵਾਂਗਚੁਕ '3 ਇਡੀਅਟਸ' ਲਈ ਪ੍ਰੇਰਨਾ ਸਨ।
ਇਸ 'ਤੇ ਆਮਿਰ ਨੇ ਜਵਾਬ ਦਿੱਤਾ: "ਨਹੀਂ, ਅਸਲ ਵਿੱਚ ਅਜਿਹਾ ਨਹੀਂ ਹੈ। ਇਹ ਇੱਕ ਗਲਤਫਹਿਮੀ ਹੈ।" ਆਮਿਰ ਨੇ ਕਿਹਾ ਕਿ ਜਦੋਂ ਅਸੀਂ ਫਿਲਮ ਬਣਾ ਰਹੇ ਸੀ ਤਾਂ ਉਨ੍ਹਾਂ ਨੂੰ ਸੋਨਮ ਵਾਂਗਚੁਕ ਬਾਰੇ ਕੋਈ ਜਾਣਕਾਰੀ ਨਹੀਂ ਸੀ। ਮੈਂ ਹਾਲ ਹੀ ਵਿੱਚ ਚਤੁਰ (ਓਮੀ ਵੈਦ) ਦਾ ਇੱਕ ਵੀਡੀਓ ਦੇਖਿਆ, ਜਿਸ ਵਿੱਚ ਉਨ੍ਹਾਂ ਨੇ ਅਜਿਹਾ ਕਿਹਾ ਸੀ, ਪਰ ਉਹ ਗਲਤ ਹਨ। ਹੋ ਸਕਦਾ ਹੈ ਕਿ ਚਤੁਰ ਅਜਿਹਾ ਸੋਚ ਰਹੇ ਹੋਣ। ਆਮਿਰ ਨੇ ਸਪੱਸ਼ਟ ਕੀਤਾ ਕਿ ਨਾ ਹੀ ਨਿਰਦੇਸ਼ਕ ਰਾਜਕੁਮਾਰ ਹਿਰਾਨੀ ਅਤੇ ਨਾ ਹੀ ਲੇਖਕ ਅਭਿਜਾਤ ਜੋਸ਼ੀ ਉਸ ਸਮੇਂ ਸੋਨਮ ਬਾਰੇ ਜਾਣਦੇ ਸਨ। ਆਮਿਰ ਅਨੁਸਾਰ, ਸੋਨਮ ਵਾਂਗਚੁਕ ਨੇ ਵੀ ਖੁਦ ਇਸ ਗੱਲ ਦੀ ਸਪੱਸ਼ਟਤਾ ਦਿੱਤੀ ਹੈ ਕਿ ਇਹ ਕਿਰਦਾਰ ਉਨ੍ਹਾਂ 'ਤੇ ਆਧਾਰਿਤ ਨਹੀਂ ਹੈ। ਉਨ੍ਹਾਂ ਅੱਗੇ ਕਿਹਾ ਕਿ ਸੋਨਮ ਜੋ ਕੰਮ ਕਰ ਰਹੇ ਹਨ, ਉਹ ਬਹੁਤ ਵਧੀਆ ਕੰਮ ਹੈ। ਉਨ੍ਹਾਂ ਦੀ ਇੱਜਤ ਕਰਨ ਲਈ ਉਨ੍ਹਾਂ ਦਾ '3 ਇਡੀਅਟਸ' ਦੇ ਕਿਰਦਾਰ 'ਤੇ ਆਧਾਰਿਤ ਹੋਣਾ ਜ਼ਰੂਰੀ ਨਹੀਂ ਹੈ।
ਇਸ ਤੋਂ ਇਲਾਵਾ, ਆਮਿਰ ਨੇ ਸੋਨਮ ਵਾਂਗਚੁਕ ਦੀ ਭੁੱਖ ਹੜਤਾਲ 'ਤੇ ਵੀ ਚਿੰਤਾ ਪ੍ਰਗਟਾਈ। ਉਨ੍ਹਾਂ ਨੇ ਕਿਹਾ, "ਅਸੀਂ ਸਾਰੇ ਉਨ੍ਹਾਂ ਦੀ ਸਿਹਤ ਅਤੇ ਜ਼ਿੰਦਗੀ ਨੂੰ ਲੈ ਕੇ ਬਹੁਤ ਚਿੰਤਤ ਹਾਂ ਅਤੇ ਉਮੀਦ ਕਰਦੇ ਹਾਂ ਕਿ ਸਭ ਕੁੱਝ ਠੀਕ-ਠਾਕ ਹੋ ਜਾਵੇ। ਅਸੀਂ ਇਹੀ ਚਾਹੁੰਦੇ ਹਾਂ ਕਿ ਉਹ ਆਪਣੀ ਭੁੱਖ ਹੜਤਾਲ ਖਤਮ ਕਰਨ ਅਤੇ ਆਪਣੀ ਸਿਹਤ ਦਾ ਧਿਆਨ ਰੱਖਣ।"
ਦੱਸ ਦੇਈਏ ਕਿ ਰਾਜਕੁਮਾਰ ਹਿਰਾਨੀ ਦੁਆਰਾ ਨਿਰਦੇਸ਼ਤ “3 ਇਡੀਅਟਸ” ਵਿੱਚ ਆਮਿਰ ਖਾਨ, ਆਰ. ਮਾਧਵਨ ਅਤੇ ਸ਼ਰਮਨ ਜੋਸ਼ੀ ਮੁੱਖ ਭੂਮਿਕਾਵਾਂ ਵਿੱਚ ਹਨ, ਜਦੋਂ ਕਿ ਕਰੀਨਾ ਕਪੂਰ, ਬੋਮਨ ਈਰਾਨੀ, ਮੋਨਾ ਸਿੰਘ ਅਤੇ ਓਮੀ ਵੈਦ ਸਹਾਇਕ ਭੂਮਿਕਾਵਾਂ ਵਿੱਚ ਹਨ।