ਵਾਸ਼ਿੰਗਟਨ : ਅਮਰੀਕਾ ਦਾ ਵਿਦੇਸ਼ ਮੰਤਰਾਲਾ (ਸਟੇਟ ਡਿਪਾਰਟਮੈਂਟ) ਬੀ-1 ਅਤੇ ਬੀ-2 ਸ਼੍ਰੇਣੀ ਦੇ ਵਿਜ਼ਿਟਰ ਵੀਜ਼ਾ ਬੇਨਤੀਕਰਤਾਵਾਂ ਲਈ ਇਕ ਨਵਾਂ ਪਾਇਲਟ ਪ੍ਰੋਗਰਾਮ ਸ਼ੁਰੂ ਕਰਨ ਜਾ ਰਿਹਾ ਹੈ। ਇਸ ਦੇ ਤਹਿਤ ਵਾਧੂ 750 ਡਾਲਰ ਮਤਲਬ 65,000 ਰੁਪਏ ਫੀਸ ਦਾ ਭੁਗਤਾਨ ਕਰਨ ਵਾਲੇ ਯੋਗ ਬੇਨਤੀਕਰਤਾਵਾਂ ਨੂੰ ਆਮ ਪ੍ਰਕਿਰਿਆ ਦੇ ਮੁਕਾਬਲੇ ਤੇਜ਼ੀ ਨਾਲ ਵੀਜ਼ਾ ਇੰਟਰਵਿਊ ਦੀ ਤਰੀਕ ਮੁਹੱਈਆ ਕਰਵਾਈ ਜਾਵੇਗੀ।
1 ਜੁਲਾਈ ਤੋਂ ਸ਼ੁਰੂ ਹੋਵੇਗਾ ਪ੍ਰੋਗਰਾਮ
ਫੈੱਡਰਲ ਰਜਿਸਟਰ ਵਿਚ ਇਸ ਹਫ਼ਤੇ ਛਪਣ ਵਾਲੇ ਨੋਟੀਫਿਕੇਸ਼ਨ ਅਨੁਸਾਰ ਇਹ ਪਾਇਲਟ ਪ੍ਰੋਗਰਾਮ 1 ਜੁਲਾਈ ਤੋਂ 31 ਦਸੰਬਰ, 2026 ਤੱਕ ਲਾਗੂ ਰਹੇਗਾ। ਯੋਜਨਾ ਦੇ ਤਹਿਤ ਕਾਰੋਬਾਰ (ਬੀ-1) ਅਤੇ ਸੈਰ-ਸਪਾਟਾ (ਬੀ-2) ਵੀਜ਼ਾ ਲਈ ਅਪਲਾਈ ਕਰਨ ਵਾਲੇ ਯੋਗ ਲੋਕਾਂ ਨੂੰ ਇਸ ਵਿਚ ਹਿੱਸਾ ਲੈਣ ਵਾਲੇ ਅਮਰੀਕੀ ਦੂਤਘਰਾਂ ਅਤੇ ਕੌਂਸਲੇਟਾਂ ਵਿਚ 10 ਕੰਮਕਾਜੀ ਦਿਨਾਂ ਦੇ ਅੰਦਰ ਇੰਟਰਵਿਊ ਦੀ ਅਪੁਆਇੰਟਮੈਂਟ ਮਿਲ ਸਕੇਗੀ।
ਸਾਰੇ ਦੂਤਘਰਾਂ ਵਿਚ ਨਹੀਂ ਮਿਲੇਗੀ ਸਹੂਲਤ
ਸਟੇਟ ਡਿਪਾਰਟਮੈਂਟ ਨੇ ਸਪੱਸ਼ਟ ਕੀਤਾ ਹੈ ਕਿ ਇਹ ਸਹੂਲਤ ਸਾਰੇ ਅਮਰੀਕੀ ਮਿਸ਼ਨਾਂ ਵਿਚ ਉਪਲਬਧ ਨਹੀਂ ਹੋਵੇਗੀ। ਸਿਰਫ਼ ਚੋਣਵੇਂ ਦੂਤਘਰਾਂ ਅਤੇ ਕੌਂਸਲੇਟਾਂ ਨੂੰ ਹੀ ਇਸ ਪ੍ਰੋਗਰਾਮ ਵਿਚ ਸ਼ਾਮਲ ਕੀਤਾ ਜਾਵੇਗਾ। ਇਸ ਵਿਚ ਸ਼ਾਮਲ ਮਿਸ਼ਨਾਂ ਦੀ ਸੂਚੀ ਵਿਭਾਗ ਦੀ ਅਧਿਕਾਰਤ ਵੈੱਬਸਾਈਟ ’ਤੇ ਜਾਰੀ ਕੀਤੀ ਜਾਵੇਗੀ। ਇਸ ਤੋਂ ਇਲਾਵਾ ਪ੍ਰੀਮੀਅਮ ਸ਼੍ਰੇਣੀ ਦੇ ਇੰਟਰਵਿਊ ਸਲਾਟਾਂ ਦੀ ਗਿਣਤੀ ਵੀ ਸੀਮਤ ਰਹੇਗੀ।
ਵਾਧੂ ਫੀਸ ਨਾਲ ਨਹੀਂ ਵਧੇਗੀ ਮਨਜ਼ੂਰੀ ਦੀ ਸੰਭਾਵਨਾ
ਅਮਰੀਕੀ ਅਧਿਕਾਰੀਆਂ ਨੇ ਕਿਹਾ ਹੈ ਕਿ 750 ਡਾਲਰ ਦੀ ਵਾਧੂ ਫੀਸ ਸਿਰਫ਼ ਇੰਟਰਵਿਊ ਦੀ ਤਰੀਕ ਜਲਦੀ ਲੈਣ ਲਈ ਹੋਵੇਗੀ। ਇਸ ਦਾ ਵੀਜ਼ਾ ਅਰਜ਼ੀ ਦੇ ਮੁਲਾਂਕਣ, ਫੈਸਲੇ ਜਾਂ ਮਨਜ਼ੂਰੀ ਦੀ ਸੰਭਾਵਨਾ ’ਤੇ ਕੋਈ ਅਸਰ ਨਹੀਂ ਪਵੇਗਾ। ਸਾਰੇ ਬੇਨਤੀਕਰਤਾਵਾਂ ਨੂੰ ਮੌਜੂਦਾ ਯੋਗਤਾ ਦੇ ਮਾਪਦੰਡਾਂ ਨੂੰ ਪੂਰਾ ਕਰਨਾ ਪਵੇਗਾ।
ਸੁਰੱਖਿਆ ਜਾਂਚ ਆਮ ਪ੍ਰਕਿਰਿਆ ਰਾਹੀਂ ਹੀ ਹੋਵੇਗੀ
ਵਿਭਾਗ ਨੇ ਸਪੱਸ਼ਟ ਕੀਤਾ ਹੈ ਕਿ ਇੰਟਰਵਿਊ ਜਲਦੀ ਮਿਲਣ ਦਾ ਮਤਲਬ ਇਹ ਨਹੀਂ ਹੈ ਕਿ ਵੀਜ਼ਾ ਪ੍ਰੋਸੈਸਿੰਗ ਵੀ ਤੇਜ਼ ਹੋ ਜਾਵੇਗੀ। ਸੁਰੱਖਿਆ ਜਾਂਚ, ਪ੍ਰਸ਼ਾਸਨਿਕ ਸਮੀਖਿਆ ਅਤੇ ਯੋਗਤਾ ਨਾਲ ਜੁੜੀਆਂ ਹੋਰ ਪ੍ਰਕਿਰਿਆਵਾਂ ਆਮ ਸਮੇਂ ਅਨੁਸਾਰ ਹੀ ਪੂਰੀਆਂ ਕੀਤੀਆਂ ਜਾਣਗੀਆਂ। ਜੇਕਰ ਕਿਸੇ ਮਾਮਲੇ ਵਿਚ ਵਾਧੂ ਜਾਂਚ ਦੀ ਲੋੜ ਪੈਂਦੀ ਹੈ, ਤਾਂ ਵੀਜ਼ਾ ਜਾਰੀ ਹੋਣ ’ਚ ਦੇਰੀ ਹੋ ਸਕਦੀ ਹੈ।
ਬੇਨਤੀਕਰਤਾਵਾਂ ਲਈ ਬਰਾਬਰ ਨਿਯਮ ਲਾਗੂ
ਸਟੇਟ ਡਿਪਾਰਟਮੈਂਟ ਅਨੁਸਾਰ ਪ੍ਰੀਮੀਅਮ ਅਪੁਆਇੰਟਮੈਂਟ ਲੈਣ ਵਾਲੇ ਬੇਨਤੀਕਰਤਾਵਾਂ ’ਤੇ ਵੀ ਉਹੀ ਨਿਯਮ ਲਾਗੂ ਹੋਣਗੇ, ਜੋ ਆਮ ਬੇਨਤੀਕਰਤਾਵਾਂ ’ਤੇ ਲਾਗੂ ਹੁੰਦੇ ਹਨ। ਜਲਦੀ ਇੰਟਰਵਿਊ ਮਿਲਣ ਨਾਲ ਨਾ ਤਾਂ ਵੀਜ਼ਾ ਮਿਲਣ ਦੀ ਸੰਭਾਵਨਾ ਵਧੇਗੀ ਅਤੇ ਨਾ ਹੀ ਅਰਜ਼ੀ ਦੇ ਨਤੀਜੇ ’ਤੇ ਕੋਈ ਵਿਸ਼ੇਸ਼ ਅਸਰ ਪਵੇਗਾ।
ਲੰਮੀ ਵੇਟਿੰਗ ਲਿਸਟ ਘਟਾਉਣ ਦੀ ਕੋਸ਼ਿਸ਼
ਮਾਹਿਰਾਂ ਦਾ ਮੰਨਣਾ ਹੈ ਕਿ ਇਹ ਪਹਿਲਕਦਮੀ ਉਨ੍ਹਾਂ ਬੇਨਤੀਕਰਤਾਵਾਂ ਲਈ ਰਾਹਤ ਸਾਬਿਤ ਹੋ ਸਕਦੀ ਹੈ, ਜਿਨ੍ਹਾਂ ਨੂੰ ਕਾਰੋਬਾਰੀ ਜਾਂ ਨਿੱਜੀ ਕਾਰਨਾਂ ਕਰ ਕੇ ਜਲਦੀ ਯਾਤਰਾ ਕਰਨੀ ਪੈਂਦੀ ਹੈ। ਇਸ ਦੇ ਨਾਲ ਹੀ, ਇਸ ਨਾਲ ਵੀਜ਼ਾ ਇੰਟਰਵਿਊ ਦੀ ਲੰਮੀ ਵੇਟਿੰਗ ਲਿਸਟ ਦੇ ਦਬਾਅ ਨੂੰ ਵੀ ਕੁਝ ਹੱਦ ਤੱਕ ਘੱਟ ਕਰਨ ਵਿਚ ਮਦਦ ਮਿਲ ਸਕਦੀ ਹੈ।